De Vorsterman Bijbel

§ Dat .xvi. Capittel.

1

⁺ENde ick heb gehoort een groote stemme vanden tempel, seggende den seuen Engelen. Gaet henen, ende ghiet wt die seuen schalen den toren Gods inder aerde.

+ A

2

Ende deerste is wech gegaen, ende heeft zijn schale inde aerde gestort, ende daer is een quade ende schadelike wonde geworden aen dye menschen, dye dat teeken des beests hadden, ende aen die ghene die dat beest ende zijn beelt aen baden.

3

Ende die tweede Engel heeft zijn scale wtgestort in de zee, ende het is geworden bloet, als van een dode. Ende alle leuende siele is gestoruen inde zee.

4

Ende dye derde Engel heeft zijn scale wtgestort inde vloeden ende inde fonteynen der wateren, ende si zijn bloet geworden.

5

Ende ic hebbe gehoort een engel der wateren, seggende. Ghi zijt rechtuerdicht Heer, die daer is, ende die daer was heylich. Want ghi dit geordeelt hebt

6

want si tbloet der heyligen ende propheten wt gestort hebben, ende tbloet hebt ghy haer te drincken gegeuen, want si zijn waerdich.

7

Ende ick heb gehoort den anderen engel seggen Oeck Heer almachtighe God, warachtich ende rechtuaerdich zijn v oordelen.

8

⁺Ende die vierde engel heeft zijn scale wtgestort inde sonne, ende tis hem gegeuen den menschen met hitte te quellen ende vier.

+ B

9

Ende die menschen hebben heet

[p. R4v]

geworden met groter hitten, ende si hebben gheblasphemeert den naem gods, die de macht hadde ouer dese plagen: ende en hebben gheen betrouwen gehadt, op dat si hem souden glorie geuen.

10

Ende die vijfste engel heeft zijn scale wtgestort op den stoel des beests, ende zijn rijc is doncker geworden: ende si hebben haer tonghen ghegeten van smerte,

11

ende si hebben geblasphemeert den god des hemels, vann haren lasteren ende van haren sweeren, ende si en hebben gheen penitencie gedaen van haer wercken.

12

⁺Ende die seste engel heeft zijn scale wtghestort in dye grote vloet Euphrates, ende twater is drooch geworden op dat de wech der coningen bereyt soude worden vanden opganc des sons.

+ C

13

Ende ic heb gesien wten mont des draecs ende wten mont vant beest, ende wten mont des valschen propheets wtgegaen drie onreyne geesten gelijc vorschen:

14

want het zijn geesten der duuelen, doende teekenen dat si mogen wtgaen totten coningen van dye geheel aerde, om haer te vergaderen totten strijt des daechs, vanden groten almachtigen god.

15

Siet, ic come als een dief. ⁺ Salich is dye daer waect, ende bewaert zijn cleeder, op dat hi niet naect en wandelt, ende dat si zijn scamelheit niet en sien.

+ Mat. 24. Luce. xij.c. i.Tes. v.a i.Pet. iij.c

16

Ende hi heeft haer vergadert totter plaets, die genoemt wort int Hebreeusch Armageddon.

17

⁺Ende die seuenste Engel heeft zijn scale wtgestort inde lucht, ende daer is een grote stemme wten hemel gecomen vanden stoel seggende Tis geschiet.

+ D

18

Ende daer zijn geschiet blixemen ende stemmen, ende donderslagen, ende een grote aertbeuinge isser geschiet, alsser noyt geweest en is, van datter menschen op aerde geweest zijn alsodanige aertbeuinge also groot.

19

Ende dye grote stadt is tot drie die deelen geworden, ende die steden der heydenen zijn geuallen. Ende dye grote Babylon is in hoochnis gecomen voor god, dat hy haer geuen soude den kelck des wijns, vande onwaerdicheyt zijn torens

20

Alle eylandt heeft geuloden, ende die berghen en zijn niet geuonden

21

Ende een grote hagel als een pont is vanden hemel gedaelt opten menschen, ende die menschen hebben god geblasphemeert om die plaghe des hagels, want zijn plage is seer groot geweest.