De Vorsterman Bijbel

§ Dat .xiij. Capittel.

1

⁺ENde ic heb gesien een beest opclimmen wter zee, hebbende seuen hoofden ende thien hoorrnen, ende op zijn hoornen .x. cronen, ende op zijn hoofden den naem des blasphemijs.

+ A

2

Ende tbeest dat ic gesien hebbe was gelijc een pardus, ende die voeten gelijc eens beers, ende sinen mont ghelijc die mont eens leeus, ende de draeck heeft hem zijn cracht ghegeuen, ende groote macht.

3

Ende ic heb gesien een van zijn hoofden, als geslagen totter doot, ende dye plaghe zijns doots is gesont gemaect. Ende een verwonderen heeft gheweest in al de aerde nae tbeest,

4

ende si hebben den draec aengebeden, welcke den beest macht gegeuen heeft, ende si hebben aengebeden tbeest, seggende. Wie is gelijc den beest, ende wie sal met hem mogen vechten?

5

Ende hem is gegeuen eenen mont, sprekende grote dingen ende blasphemien. Ende hem is ghegeuen macht om te maken .xlij. maenden,

6

ende heuet sinen mont op gedaen tot blasphemy tegen God, op dattet blasphemeren soude sinen naem, ⁺ ende zijn tabernakel, ende die ghene die inden hemel wonen.

+ B

7

Ende hem is ghegeuen strijt te maken met die heylighen, ende haer te verwinnen, en hem is macht gegeuen in alle geslacht ende volc, ende tale, ende heyden,

8

ende si hebben hem aengebeden al die inder aerden woonen, welcker namen niet ghescreuen en zijn int boeck des leuens des lams, welcke is gedoot vande oorspronck des werelts,

9

wie een oore heeft, die hoore.

10

Die in gheuanghenis brenct, die sal gaen in geuangenis. Die metten swaerde doot, die moet metten swaerde gedoot worden. Hier is die verduldicheyt ende geloof der heyligen.

11

Ende ic heb gesien een ander beest, opclimmende vander aerden, ende thadde twee hoornen gelijc des lams, ⁺ ende tsprac gheliken den draeck, ⁺

+ C

+ Genesis. ix.c. Mat. 26.c Phi. 4.a

12

ende het doet alle de macht des eersten beests in zijn tegenwoordicheyt. Ende het doet die aerde ende die daer in wonende zijn, aenbidden teerste [kolom] beest, wiens plaghe des doots gesont ghemaect is,

13

ende het doet groote teekenen, dattet ooc tvier dede vanden hemel dalen inder aerden, voor die menschen.

14

Ende het heeft verleyt die daer wonende zijn inder aerde, om die teekenen die hem gegeuen zijn, om te doen voor tbeest seggende tot die daer wonende zijn inde aerde, op dat si maken een beelt des beests, welcke heeft die plage des swaerts, ende verwonnen heeft.

15

Ende hem is gegeuen dat hi een geest soude geuen den beelt des beests, ⁺ ende dattet beelt des beests spreken soude, ende tsal maken dat alle die ghene die niet en aenbidden tbeelt des beestes, gedoot sullen worden.

+ D

16

Ende het doot alle, cleyne ende groote, rijcke ende arme, ende vrije ende eygen, ende die een teeken ontfangen in haer rechter hant, oft in haer voorhoofden.

17

Ende dat nyemant en mach coopen oft vercoopen, dan die dit teyken heeft, oft die naem des beests, oft tghetal zijns naems.

18

Hier is wijsheyt. Die verstant heeft, die rekent tgetal des beests, want tis tgetal des menschen, ende zijn getal is ses hondert, ses en tsestich.