De Vorsterman Bijbel

§ Dat .ij. Capittel.

1

⁺SCrijft den engel des kercs van Epheso. Dit seyt hi, die welcke hout in zijn rechter hant die seuen sterren, de welck wandelt int midden der seuen gouden candelaren.

+ A

2

Ick weet v [kolom] wercken, ende arbeyt, ende verduldicheyt, ende dat ghi die quaden niet en moecht verdragen, ende ghi hebt haer ondersocht. Welcke seggen haer te wesen apostelen, ende en zijns niet: ende ghi hebt haer geuonden logenachtich,

3

ende ghi hebt verduldicheyt, ende ghi hebtet verdragen, ouermits minen naem, ende ghi en zijt niet geflaut.

4

Mer ic heb tegen v weynich, dat ghi verlaten hebt die eerste liefte.

5

Daer om weest gedachtich van waer ghi geuallen zijt, ende doet penitencie ende doet die eerste wercken. Ist anders, ic sal v comen, ende ic sal versetten v candelaers van haer plaets, ten si dat ghi penitencie doet.

6

⁺Maer dat hebt ghi, want ghi hebt gehaet die wercken der Nicolaiten, welcken ic oec gehaet heb

+ B

7

Die een oor heeft die hore wat die geest seyt den kercken. Ic sal geuen die daer verwinnende is, te eten van dat hout des leuens, welcke is int middel des paradijs mijns Gods.

8

Ende scrijft den Engel des kercs van Smirne, dit seyt die eerste, ende leste, die welcke doot is geweest ende leeft.

9

Ic weet v verdriet ende armode, maer ghi zijt rijck, ende ghy woort geblasphemeert van die ghene die haer noemen Ioden te wesen ende zijns niet. ⁺ Mer si zijn een vergaderinghe des duuels.

+ C

10

Nyet deser dingen en ontsiet, twelcke ghi sult liden. Siet: die duuel sal senden sommige wt v inden kercker, op dat ghi sult mogen beproeft worden, ende ghy sult hebben tribulacie thien dagen. Weest trou totter doot toe, ende ick sal v geuen die crone des leuens.

11

Die een oore heeft die hore wat die geest seyt den kercken. Die verwinnen sal, die en sal niet gequest worden vanden anderen doot.

12

⁺Ende scrijft den engel des kercs van Pergamo. Dit seyt welc heeft een sweert scherp wesende aen beyde siden.

+ D

13

Ick weet waer ghy woont, waer de stoel is des duuels, ende ghy hout minen naem, ende en hebt mijn geloef niet

versaect. Ende in dien dage is Antipas mijn getrou getuych, welc by v is doot geslagen, daer die duuel is wonende.

14

Maer ic heb weynich tegen v, want ghy hebt al daer die onderhoudende zijn die leeringe van Balaam welcke leerde scande te senden in Balac: voor die kinderen van Israel, te eten ende oncuysheyt te doen,

15

also hebt ghi den ghenen die onderhoudende zijn die leeringe der Nicolaiten.

16

Des gelijcs doet penitencie, anders so sal ick v comen geringe: ende sal met haer vechten mettet sweert mijns monts.

17

Die heeft een oore, die hore wat dye geest seyt den kercken. Ick sal geuen die daer verwint te eten hemels broot ende ick sal hem geuen eenen blinckende steen, ende in desen steen gescreuen eenen nyeuwen naem,

[p. Q6v]

welcke nyemant en weet dan diese ontfanct.

18

⁺Ende scrijft den Engel des kercs van Thyatire. Dit seyt die soon gods, welcke heeft oogen als een vlamme des vuers, ende zijn voeten zijn als gloyende coper.

+ E

19

Ic kenne v wercken, ende liefte, ende dienst, ende geloef, ende v verduldicheyt, ende v leste wercken, meer dan die eerste.

20

Maer ic heb een weynich tegens v, want ghy toelaet die vrouwe Hiezabel, dwelcke seyt datse een prophetesse is: ende welcke oec leert ende verleyt mijn knechten ouerspel te doen, ende teten van tgheen dat den afgoden geoffert wort.

21

Ende ick heb haer een tijt gegeuen, ⁺ op dat si penitencie soude doen van haer oncusheyt, nochtans en wilse gheen penitencie doen van haer oncuysheyt.

+ Iob. xxiiij

22

⁺Siet ick sende haer int bedde, ende die te doen heeft met haer in ouerspel sullen wesen in dat alre grooste verdriet, ten ware dat si penitencie deden van haer wercken,

+ F

23

ende ick sal haer kinderen te niet doen metten doot. Ende alle die kercken sullen weten dat ick ben dye ghene die daer ondersoeckende is dye nieren ende herten, ende ick sal een yegelick van v geuen nae zijn wercken.

24

⁺Ic segge v, ende ander die te Thyatire zijn, also wie niet en heeft dese leeringe, ⁺ ende niet gekent en hebben die diepheden des duuels: gelijckerwijs si segghen, ick en sal op v anders ghenen last senden,

+ G

+ Hie. xvij.b

25

nochtans dat ghene dat ghi hebt, hout dat totter tijt toe dat ic sal comen.

26

Ende die sal verwinnen, ende sal bewaren totten eynde toe mijn wercken: dien sal ic geuen macht ouer den heydenen, ⁺

+ Psalm. ij.

27

ende hi sal haer regeren met een yseren roede, ende si sullen gebroken worden als vaten des potbackers:

28

als ick heb ontfangen van minen vader, ende ic sal hem geuen die morgensterre.

29

Die ghene die een oor heeft die hore, wat die gheest seyt den kercken.