De Vorsterman Bijbel

§ Dat .iij. Capittel.

1

⁺O Ghi onuerstandighe Galaten, wie heeft v betoouert, die waerheyt niet onderdanich te zijn? Den welcken Iesus Christus voor ooghen bethoont was, onder v ghecruyst zijnde.

+ A

2

Ick wil dat alleen van v leeren, Hebt ghi den gheest ontfanghen, wt die wercken des wets, oft wt den ghehoor des gheloofs?

3

Sijt ghy alsoo sot, dat ghi door den gheest beghonnen hebt, ghy nv door den vleesche voleyndt wort?

4

hebt ghy so veel te vergheefs gheleden? ist anders oock te vergheefs.

5

Aldus die v den gheest aendient, ende werct crachten in v doet hi dat wten wercken des wets, oft wt den ghehoor des gheloofs? ⁺

+ Genesis. xv.b

6

Gelijckerwijs ghescreuen is, Abraham heeft God ghelooft, ende tis hem tot rechtueerdicheyt gherekent.

7

Aldus weet dan, dat die wtet gheloof zijn, dat zijn Abrahams kinderen.

8

Die scriftuer voorsiende, dat God den heydenen wtet gheloof rechtueerdich maket, ⁺ heeft hy eerst Abrahe te kennen ghegheuen, In v sullen alle heydens ghebenedijt worden.

+ Ge. xxij.d

9

Aldus die wtet gheloof zijn die worden met den gheloouighen Abraham ghebenedijt,

10

want al die wten wercken des wets zijn, zijn onder gheworpen die vermaledidinge, Want daer staet geschreuen, ⁺ Vermaledijt is alle, dye nyet en blijft, in alle dat ghene datter ghescre-

+ Deut. xxij

[p. L2v]

uen is int boeck des wets, om dat te doen.

11

Ende dat wt die wet niemant gherechtueerdicht en wort by God, ⁺ is openbaer, want die rechtueerdighe wtet geloof leeft.

+ Abac. ij.a.

12

Die wet en is wtet gheloof nyet, maer die dat ghene dat si ghebiet doet, die sal daer in leuen.

13

Christus heeft ons verlost, van die vermaledidinge des wets, als hy voor ons gheworden is vermaledidinge, want daer staet ghescreuen, ⁺ Vermaledijt is alle die ghene die int hout hanct,

+ Leui. xv.a Deu. xxi.d Roma. x.b Hebre. x.d. Hebre. ix.c

14

op dat die ghebenedidinge van Abraham in die heydens comen soude, door Christum Iesum, om dat wi die belofte des geests ontfanghen souden door tgheloof.

15

⁺Broeders, ick spreec naden mensch, Al ist eens menschen testament, nochtans ist dattet gheconfirmeert is, niemant en verworptet, oft en doeter wat toe.

+ C

16

+ Abraham zijn beloftenissen gheseyt, ende zijn saet, hi en seyt niet, ende zijn saden, als in veel, maer als in een, ende in v saet, dwelc is Christus.

17

Ende dit seg ick, dat testament geuesticht van God, dat en maect die wet niet te niet, die na vierhondert ende veertich iaer bestaen heeft, om die belofte verloren te maken.

18

Want, is wt dye wet dat erfnis, so en ist nv niet wt die beloftenis, maer God heeftet Abraham door die beloftenis ghegeuen.

19

Wat is dan die wet? om die ouertredingen is si geset, tot dattet saet quame, welcke beloeft was, gheoordineert door die enghelen, in die hant des middelaers.

20

Ende een middelaer en is niet van een, maer god is een.

21

Is dan die wet teghen die beloftenissen Gods? Geensins. Want waert datter een wet ghegeuen waer, die welcke leuent maken mochte, so soude die rechtueerdicheyt voorwaer wt die wet wesen.

22

Mer die scriftuer heeftet al onder die sonde besloten, op dat die beloftenis wtet geloof Iesu Christi ghegeuen soude worden, den geloouighen. *

23

⁺Voort, eer dattet gheloof quam, werden wi onder die wet bewaert besloten zijnde tot dat gheloof, datter gheopenbaert soude worden.

+ D

24

Hierom heeft die wet onse kinder meester geweest tot Christum, op dat wi door tghelooue gherechtueerdicht souden worden.

25

Maer na dattet ghelooue ghecomen is, en zijn wy nyet meer onder dye kinder meester,

26

Want ghi zijt alle gader kinderen Gods door tgeloof, dat welc is in Christo Iesu.

27

Want alle ghy, dye ghedoopt zijt in [kolom] Christo Iesu, hebt Christum aenghedaen.

28

Daer en is gheen Iode, noch Grieck, daer en is gheen knecht, noch vrije, daer en is man noch vrou, want ghi zijt alle gader een in Christo Iesu,

29

Ende ist dat ghy Christo toebehoort, so zijt ghi Abrahams saet, ende na die belofte erfghenamen.