De Vorsterman Bijbel

§ Dat .xvi. Capittel.

1

⁺UOort vanden aelmis die den heyligen geschiet, ghelijc ick gheordineert heb in die kercke van Galacien, also doet oock ghi

+ A

2

in een nae den sabothen, so legghe een yeghelic van v bi hem aen een si, dat hem belieft, op dat die ghiften niet en geschien, als ick sal comen.

3

Ende als ic comen sal, soo wie ghi daer toe bequaem ordeelt door brieuen, sal ick senden, op dat si uwe weldaet moghen brengen tot Ierusalem.

4

Ende ist dattet van noode ware, dat ick oock selue reysen sal, soo sullen si met mi reysen.

5

Ick wil tot v comen als ick Macedonien door reyse, want ick sal door Macedonien reysen

6

Ende sal by auontueren by v blijuen, ofte oock mijn winter houden, op dat ghi mi geleyden muecht, werwaerts dat ic reyse.

7

⁺Want ick en wil v nv int door reysen niet sien, maer ick hoop dat ick een wijl tijts by v sal bliuen. Ist dattet die heer toe laet.

+ B

8

Ick

[p. K4v]

sal tot Ephesien bliuen te Pinxter toe,

9

want mi is een groote ende openbare dore op gedaen, ende vele wederstaenders.

10

Ist dat Timotheus coemt, siet dat hi sonder vreese bi v si, want hi werct dat werck des Heeren, ghelijck als ick.

11

Dat hem dan nyemant en versmade, ende leydt hem in vrede, dat hy tot mi mach comen, want ick verwacht hem metten broeders.

12

Vanden broeder Apollo, laet ick v weten, dat ick hem zeer ghebeden heb, dat hy tot v soude ghaen met den broederen, ende hi en had al heel gheenen wil nv te comen, maer hi sal comen, alst te pas coemt.

13

Waect staet int geloof, doet manliken, weest sterc

14

laet alle dinghen bi v met lieften geschien.

15

⁺Ic bidde v broeders. Ghi kent dat huysgesin Stephane ende Fortunati ende Achaici, want si zijn die eerste vruchten van Achayen, ende dat si hen seluen ten dienst hebben gheoordineert den heylighen,

+ C

16

dat ghi oock dusdanighen onderdanich wilt zijn, ende alle den ghenen die helpen ende arbeyden.

17

Ick verblide mi vander teghenwoordicheit Stephane ende Fortunati ende Achaici, want dat v luyden gebrack, hebben si veruult,

18

want si hebben minen gheest ende uwen vermaect. Aldus bekennet dusdanighen.

19

Die kercken van Asien groeten v. Aquila ende Priscilla, met die vergaderinge die in haeren huyse is,

20

die groeten v zeer inden Heere, by den welcken ic geherbercht worde. Die broeders al te samen groeten v.

Groet malcanderen met eenen heylighen cusse.

21

Mijn groete met Paulus handt.

22

Ist dat yemant niet lief en heeft den heere Iesum Christum, die moet zijn vermaledijnge, Maran, Atha. ⁺

+ Vermalendidinghe Maran, Atha, dat is die Christus niet lief en heeft, die is verbannen totter doot.

23

Die gracie des heeren si met v,

24

mijn liefte si met v allen, in Cristo Iesu, Amen.

§ Die eerste Epistel totten Corinthen was gescreuen wt Asien van Philippis, door Stephanam ende Fortunatum, ende Achaicum, ende Thimotheum.

§ Hier na volcht die tweede Epistel die Sinte Pauwels ghescreuen heeft tot die van Corinthien.