De Vorsterman Bijbel

§ Dat .vi. Capittel.

1

⁺+ HIer na is Iesus wech gegaen ouer die zee van Galileen, ⁺ welck is Tiberiadis,

+ A

+ Mat. vi.c. mar. xiiij b Luce. ix.b.

2

ende hem volchde een grote schare, want si sagen zijn teekenen, die hi dede ouer die gheen, die daer cranc waren.

3

Ende Iesus is geclommen op eenen berch, ende sadt daer met zijn discipulen.

4

Ende den dach des hoochtijts vander ioden paeschen was nakende.

5

+ Daer om als Iesus opgebuert had zijn ooghen, ende gesien had, dat veel scharen tot hem quamen, so seyde hi tot Philippum, Waer sullen wi broot coopen, dat dese eten mogen?

6

Dit seyde hi, hem tempterende, want hi wist wat hi doen soude.

7

Philippus heeft hem geantwoort. Brooden voor twee hondert penningen, en zijn dese niet genoech, op dat een yegelic een weynich ontfanct. Een van zijn discipulen

8

Andreas, die broeder van Symon Petrus, seyde hem.

9

Hier is een kint, dat vijf ghersten brooden heeft, ende twee visschen, maer wat is dit onder so veel?

10

⁺Ende Iesus heeft geseyt. Doet die menschen sitten, ende daer was veel gras in die plaets. So zijn si dan neder geseten, by na int ghetal vijf duysent mannen.

+ B

11

Ende Iesus heeft ghenomen die brooden, ende als hy ghedanct hadde: deelde hy die daer saten. Des gelijcs ooc van desen visschen, also veel als si wouden.

12

Ende nae dat dese versadicht zijn, seyt hy zijn discipulen: vergadert die brocken, die daer ouer zijn, op datter niet en vergae.

13

Daer om hebben sise vergadert, ende veruult twalef manden met stucken, wt die vijf ghersten brooden, ende twee visschen, welck daer ouer gebleuen waren, den ghenen dye daer ghegeten hadden.

14

Daer om dye menschen als si ghesien hadden, dat Iesus gedaen hadde dit teeken, soe seyden si. Dit is waerachtich die propheet die daer toecomende is in die werelt. *

15

Daer omme als Ihesus wiste, dat si comen souden, hem nemen, om hem coninck te maken, is hy wech gegaen, weder alleen op den berch.

16

Maer na dattet auont was, zijn zijn discipulen neder gheclommen tot dye zee,

17

ende

[p. G6r]

als si in een schip geclommen waren, zijn si ghecomen ouer dye zee, tot Capharnaum. Ende duyster gheworden wesende, Iesus en was by haer niet ghecomen.

18

Ende wanter een grote wint waeyde, so verhief hem die zee.

19

Als si dan gheuaren hadden, bi na .xxv. oft .xxx. stadien, so sien si Iesum wandelen op die zee ende genakende tottet schip, ende si hebben geureest.

20

Ende hy seyt haer. Ick bent, en wilt niet vreesen.

21

Daer om hebben si hem willen int schip nemen, ende ter stont was tschip aen tlant, daer si na voeren.

22

⁺Daechs daer na, die schare die ouer dye zee stont, heeft ghesien datter gheen ander scheepken en was dan dat een, ende dat Iesus niet met zijn discipulen int scheepken gegaen en was, maer zijn discipulen alleen wech ghegaen waren.

+ C

23

Maer daer zijn ander scheepkens op gecomen van Tiberias, bi die plaets, daer si tbroot gegeten hadde: danckende god.

24

Als dan die schare gesien hadde, dat Iesus daer niet en was, noch zijn discipulen, zijn si oock in die scheepkens geclommen, ende zijn te Capharnaum gecomen sueckende Iesum.

25

Ende als si hem ouer die zee geuonden hadden, hebben si hem gheseyt. Rabbi, wanneer zijt ghi hier gecomen?

26

Iesus heeft haer geantwoort, ende geseyt. Voorwaer voorwaer seg ick v, ghi en suect my niet om dat ghi teekenen gesien hebt, maer om dat ghy vanden brooden ghegeten hebt, ende versadicht geweest zijt

27

Werct niet spijs die vergaet, maer dye ouer blijft int eewige leuen, welck v die soon des menschen geuen sal. Want dese heeft die vader god beteykent.

28

⁺Daer om hebben si tot hem geseyt. Wat sullen wi doen, op dat wij gods wercken mogen wercken?

+ D

29

Iesus heeft geantwoort, ende haer geseyt. Dat is gods werck, dat ghi ghelooft in hem, die hy gesonden heeft.

30

Daer om hebben si hem geseyt. Wat teeken doet ghi dan, op dat wijt mogen sien, ende v geloouen wat werct ghy? ⁺

+ Mar 8.b.

31

Onse vaders hebben manna gegeten in die voestine, alsser gescreuen staet. ⁺ Broot wten hemel heeft hi haer gegeuen te eten.

+ psal. 77.

32

Daer om heeft Iesus haer gheseyt. Voorwaer voorwaer segge ick v. Moyses en heeft v dat broot wten hemel nyet gegeuen, maer mijn vader gheeft v twarachtighe broot vanden hemel.

33

Want het is warachtich broot dat vanden hemel gedaelt is, ende tgheeft leuen die werelt.

34

Daer om seyden si tot hem. Heer, geeft ons altijt dit broot.

35

Ende Iesus heeft gheseyt. Ick ben tbroot des leuens. Die tot mi coemt, en sal niet hongeren, [kolom] ende die mi gelooft, en sal niet dorsten inder eewicheyt.

36

Maer ick heb v gheseyt, dat ghi hebt mi gesien, ende en hebt niet ghelooft.

37

Al dat die vader mi gheeft, dat sal tot mi comen ende die tot mi coemt, en sal ick niet buyten worpen.

38

Want ick ben vanden hemel geclommen niet om te doen mijnen wille, maer den wil des ghenen die mi gesonden heeft,

39

Dit is den wil des gheens die my ghesonden heeft, des vaders dat ic niet en sal verliesen van al tghene dat mi mijn vader gegeuen heeft, mer dat ick dat verwecken sal inden laesten dage.

40

Dit is den wille mijns vaders die mi gesonden heeft dat al die den soon siet, ende in hem ghelooft hebbe dat eewich leuen, ende ick sal hem verwecken inden laesten dach.

41

⁺Daer om so murmureerden die ioden daer van dat hi geseit hadde. Ic ben dat leuende broot, die vanden hemel gedaelt ben. Ende seyden.

+ E

42

En is dit niet Iosephs soon, wiens vader ende moeder wi hebben gekent? Hoe seyt hi dan: want ick ben gedaelet vanden hemel?

43

Daer om heeft Iesus geantwoort, ende haer geseyt En wilt niet murmureren onder v.

44

+ Niemant en mach comen tot my, ten si dat die vader, die mi gesonden heeft, hem trecken sal: ende ick sal hem verwecken inden laesten dach.

45

Daer is gescreuen inden propheten. Ende si sullen alle gader bequaem wesen, van god gheleert te worden. ⁺ Al die vanden vader gehoort, ende gheleert heeft, die coemt tot mi.

+ Esa. liiij.c.

46

Niet dat yemant den vader gesien heeft, dan die ghene, die is van god, dese heeft den vader ghesien.

47

Voorwaer, voorwaer seg ick v. Die mi gelooft, heeft dat eewighe leuen.

48

Ick ben dat broot des leuens.

49

V vaders hebben Manna gegeten in die woesteny, ende si zijn gestoruen.

50

Dit is dat broot vanden hemel dalende, op dat, isser yemant, dye daer van eten sal, niet en sterue.

51

Ic ben dat leuendich broot, die welcke vanden hemel gedaelt ben.

52

Ist dat yemant eten sal van dit broot, die sal inder eewicheyt leuen. Ende tbroot dat ick gheuen sal, dat is mijn vleesch voor tleuen der werelt. *

53

⁺Daer om keuen die ioden onder haer: seggende. Hoe mach ons dese zijn vleesch gheuen te eten?

+ F

54

Daer om heeft Iesus haer geseyt. Voorwaer voorwaer seg ick v. ⁺ Ten si dat ghi eten sult tvleesch van die soon des menschen, ende drincken sult zijn bloet, ghi en sult gheen leuen in v hebben.

+ i.Cor. xi.g

55

Die mijn vleesch eet, ende mijn bloet drinct, die heeftet eewige leuen: ende ic sal hem verwecken inden laesten dach.

56

+ Want mijn vleesch is warachtelick spijs, ende mijn bloet is warachtelic dranc.

57

Die mijn

[p. G6v]

vleesch eedt, ende mijn bloet drinct, dye blijft in mi, ende ick in hem.

58

Ghelijc die leuende vader mi ghesonden heeft, ende ick om den vader leef alsomede, die mi eedt, die selfde sal oec doer mi leuen.

59

Dit is dat broot dat vanden hemel neder gedaelt is, niet als v vaders Manna ghegeten hebben, ende zijn ghestoruen. Die dyt broot eedt, die sal inder eewicheyt leuen. *

60

Dit heeft hy geseyt in die synagoge, leerende in Capharnaum.

61

Daer om veel van zijn discipulen als si dit gehoort hadden, hebben gheseyt. Dit woort is hert, ende wie mach dat hooren?

62

Ende Iesus by hem seluen wetende, dat zijn discipulen daer af murmureerden: heeft haer geseyt. ⁺ Dat scandalizeert v?

+ G

63

Wat dan? Ist dat ghi sult sien den soon des menschen opclimmende, daer hy te voren was?

64

Die gheest is die leuendich maect, tvleesch en baet niet. Die woorden die ick v spreec: zijn gheest ende leuen.

65

Maer daer zijn sommighe van v, die niet en geloouen. Want Iesus wist van tbeginsel, wie geloouende waren, ende wie dat hem verraden soude.

66

Ende seyde. Daer om heb ic v geseyt, dat nyemant tot mi comen en mach, ten waer dattet hem van mijn vader ghegeuen waer.

67

Van die tijt af, zijn veel van zijn discipulen achter gegaen, ende si en wandelden niet meer met hem.

68

Daer om heeft Iesus gheseyt tot dye twalef. En wylt nyet mede wech gaen?

69

Daer om heeft hem Symon Petrus gheantwoort. Heer, tot wien sullen wij ghaen? ghy hebt die woorden des eewighen leuens.

70

Ende wi gheloouen, ende bekennen, dat ghi zijt Christus Gods soon.

71

Ihesus heeft hem gheantwoort. En heb ick v niet twalef wt ghecoren ende een wt v is een duyuel? ⁺

+ Mat. xvi c

72

Dat seyde hi van Iudas Symonis scariotis, want dese was hem verradende, al wast, dat hy een vanden twaleuen was.