De Vorsterman Bijbel

§ Dat .iiij. Capittel.

1

⁺DAer om, nae dat Ihesus wist dat die Pharizeen ghehoort hadden, dat Ihesus meer discipulen maecte ende doopte, dan Ioannes,

+ A

2

al wast dat Ihesus selue nyet en doopte, maer zijn discipulen,

3

so heeft hi Iudeam ghelaten, ende is weder om ghegaen in Galileam.

[p. G4v]

4

+ Ende hy moest gaen door tmiddel van Samarien.

5

Daer om quam hy in een stadt van Samarien die Sichar hiet, by dat erf twelck Iacob Ioseph zijn soon ghegheuen hadde,

6

ende daer was Iacobs fonteyne.

Aldus Iesus vermoeyt zijnde vanden wech sadt soo op die fonteyne, ende dye vre was ontrent sessen.

7

Een Samaritaensche vrou is gecomen om water te putten, ende Ihesus seyt haer. Geeft mi drincken,

8

want zijn discipulen waren in die stadt ghegaen, om spijs te coopen

9

Daer om seyt tot hem dese Samaritaensche vrouwe. Hoe coemtet dat ghi een Iode wesende drincken van my begheert, dye welcke een Samaritaensche vrou ben? Want die Ioden en hebben gheen ghemeenscap met die Samaritanen.

10

Ihesus heeft gheantwoordt, ende sprack tot haer. Waert dat ghi wist dye gaue gods, ende wie dat is die v seyt, geeft mi drincken, ghi soudt by auontuer van hem begeert hebben, ende hi soude v gegeuen hebben leuendich water.

11

⁺Die vrou seyde hem. Here ghi en hebt niet daer ghy mede putten moghet, ende die put is diep. Daer om, van waen hebt ghi dat leuende water?

+ B

12

Sijt ghi meerder dan onse vader Iacob, welcke ons desen put ghegeuen heeft, ende hi heefter wt ghedroncken, ende zijn kinderen, ende beesten?

13

Ihesus heuet gheantwoort, ende heeft haer geseyt. Alle die gheen die drinct wt dit water, die sal weder dorsten,

14

mer die drinct wt dat water dat ick hem geuen sal, die en sal niet dorsten inder eewicheyt. Mer dat water dat ick hem geuen sal, sal worden in hem een fonteyn des springhenden waters, in een eewighe leuen.

15

⁺Die vrou seyde hem. Here, geeft mi dit water, dat ic niet en dorste, ende niet en come hier om te putten.

+ C

16

Ihesus seyde haer. Gaet roept v man, ende coemt hier.

17

Die vrouwe heeft gheantwoordt ende sprack. Ick en heb ghenen man. Ihesus seyde haer. Ghy hebt wel gheseyt, ick en heb ghenen man,

18

want ghi hebt vijf mans ghehadt, ende die ghi nv hebt, en is v man niet, dat hebt ghy warachtich geseyt.

19

Die vrou seyde hem. Heer, ick sie dat ghi een propheet zijt.

20

Onse vaders hebben in desen berch aen ghebeden, ende ghi segt, dat te Hierusalem is daermen moet aenbidden.

21

Iesus seyde haer. Vrou, gelooft mi, die vre sal comen, dat ghi noch hier in desen berch, noch te Hierusalem die vader aenbidden sult.

22

Ghi aenbidt dat ghi niet en kent, wij aenbidden dat wi kennen, want dye salicheyt is wt den [kolom] Ioden.

23

⁺Maer die vre coemt, ende is nv, dat die warachtige aenbidders sullen aenbidden den vader inden geest ende warachticheyt, want die vader sodanigen soect die hem aenbidden.

+ D

24

God is een geest, ende die hem aenbidden, moeten hem inden geest ende warachticheyt aenbidden.

25

Dye vrou seyt hem. Ick weet dat Messias coemt, die welcke Christus heet. Daer om, als die comen sal, so sal hy ons alle dingen vercondighen.

26

Ihesus seyde haer. Ick bent die met v spreke.

27

Ende ter stont so zijn zijn discipulen gecomen, ende verwonderden dat hi met dye vrouwe sprac. Nochtans nyemant en heeft gheseyt, wat vraecht ghy? oft wat spreect ghi met haer?

28

Daer om heeft die vrouwe haer bornkan achter ghelaten, ende is ghegaen in die stadt, ende seyde den volck.

29

Coemt, ende siet een mensche die mi gheseyt heeft, al dat ic ghedaen hebbe. Oft dese niet Christus en is?

30

Daer om zijnse wt die stadt gegaen, ende quamen tot hem.

31

Hier en tusschen baden die discipulen, segghende. ⁺ Rabbi, eedt,

+ E

32

ende hi heeft haer gheseyt. Ic heb spijs te eten die ghi niet en weet

33

Daer om seyden die discipulen onder malcanderen, heeft hem yemant wat te eten gebrocht?

34

Ihesus seyde haer. Mijn spijs is, dat ick doe sinen wille, dye my ghesonden heeft, ende volbrenge zijn werck.

35

Segt ghy niet, daer zijn noch vier maenden, ende den oext coemt? Siet, ick segghe v, heft v oogen op, ende siet dye velden, want si nv wit zijn totten oext.

36

Ende die daer maeyt, ontfanct loon, ende vergadert vrucht in dat eewige leuen, op dat, dye daer saeyt, mede blijde mach zijn, ende die daer maeyt.

37

Want daer in is dat woort waer, dattet een ander is, die daer saeyt, ende een ander dye daer maeyt.

38

Ick hebbe v ghesonden om te maeyen, dat ghi nyet bearbeyt en hebt, ander hebbent bearbeyt, Ende ghy zijt in haren arbeyt ghegaen.

39

Ende wt die stadt hebbender veel van dye Samaritanen in hem gelooft, om dat woort des vrous die getuychnis was geuende, want hi mi gheseyt heeft al dat ick ghedaen heb.

40

⁺Daer om als die Samaritanen tot hem gecomen waren, hebben si hem ghebeden dat hi daer blijuen soude, ende hi is daer gebleuen twee dagen.

+ F

41

Ende veel meer heefter gelooft ouermidts zijn woort,

42

ende si seyden die vrouwe. Nv en gelouen wij niet om v segghens wille, want wij hebben seluer gehoort, ende wi weten dat dit is warachtich die behouder des werelts. *

[p. G5r]

43

Na twee daghen is hy wtgegaen van daer, ende is gegaen in Galileen, ⁺

+ Mar. vi.a Luce. iiij.c

44

want Iesus hadde seluer betuycht, dat een propheet in zijn landt gheen eer en heeft.

45

Daer om als hy gecomen was in Galileen, hebben die Galileesche hem ontfangen, als si al ghesien hadden, dat hy te Ierusalem in die hoochtijt gedaen hadde: want si tot dye hoochtijt ghecomen waren.

46

Daer omme is Ihesus weder ghecomen te Cana in Galileen, daer hy van water wijn ghemaect hadde.

⁺ + Ende daer was een conincxken, wiens soon sieck was in Capharnaum,

+ G

47

dese als hi ghehoort hadde dat Iesus comen soude van Iudea in Galileen, is gegaen tot hem, ende badt hem dat hi neder soude climmen, ende zijn soon gesont maken, want hy begonst te steruen.

48

Daer om heeft Iesus gheseyt tot hem. Ten si dat ghi teekenen ende miraculen siet, so en gheloeft ghi niet.

49

Dat conincxken seyde tot hem. Heer climt neder, eer dat mijn soon sterft.

50

Iesus seyde hem. Gaet, v soon leeft. Die mensche heeft geloeft dat woort, dwelck Iesus hem geseyt heeft, ende ghinck.

51

Ende als hy nv neder was climmende, zijn hem die knechten tegen ghecomen, ende hebben gebootscapt seggende, dat zijn soon leefde.

52

Daer om heeft hy gheuraget van haer die vre, in welck hy ghebetert was, ende si hebben hem geseyt. Ghisteren te seuen vren, heeft hem de koorts gelaten.

53

Daer om heeft de vader bekent, dat dat die vre was, in welck Iesus hem geseyt hadde. V soon leeft. Ende hi heeft gheloeft, ende al zijn geheel huys. *

54

Dit tweede teeken heeft Iesus weder gedaen, nae dien, dat hy van Iudeen in Galileen comen was.