De Vorsterman Bijbel

§ Dat .xxi. Capittel.

1

⁺+ ENde opsiende, heeft gesien die gene die daer ghiften in die kisten worpen, ⁺ rijcken

+ A

+ Mar. xij.d

2

Ende heeft ghesien een arm weeuken twee minuten ghelts worpende,

3

ende hi heeft gheseyt. Voorwaer seg ick v, dat dese arme weduwe heeft meer gheworpen dan alle gader:

4

Want alle dese hebben tot gods ghiften geworpen van tghene dat haer oueruloedich was, mer dese heeft van haer armode af haer substancie geworpen.

5

Ende sommige seggende vanden tempel dat hy met schoonen steenen, ende ghiften verciert was, heeft hi gheseyt.

6

⁺Die daghen sullen comen, ⁺ inden welcken van tghene dat ghi siet, die een steen op den anderen steen niet ghelaten sal worden, die nyet wtgeroeyt en sal worden.

+ B

+ Mat. 24 a mar. xiij.b

7

Ende si hebben hem geuraecht segghende. Meester, wanneer sullen dese dinghen wesen? Ende wat teeken, wanneer dese dinghen toecomende zijn?

8

⁺Ende hy heeft gheseyt. Siet dat ghy nyet verleyt en wort, want daer salder veel comen onder mijnen naem, segghende: dat si Christus zijn, ende die tijt naect, daer om en gaet haer nyet na.

+ C

9

+ Voort als ghi hooren sult oorloghen, ende oploopen, en wilt niet veruaert worden, want dese dinghen moeten geschien, maer ten is ter stont gheen eynde.

10

Doen seyde hy haer. Dat volc sal tegen volc op staen, ende rijck tegen rijck,

11

ende grote aertbeuingen sullen daer wesen op plaetsen, ende dier tijden, ende pestilencien, ende veruaernissen, ende grote teekenen sullen daer inden hemel wesen.

12

Maer voor alle dese, so sullen si haer handen in v slaen, ende veruolgen, leuerende in die Synagogen ende kerckeren: treckende totten coninghen ende rechters om mijnen naem,

13

mer tsal v gebueren tot getuychnisse.

14

Daer om sedt op in v herten, dat ghi niet te voren

[p. F8r]

en denct om te verantwoorden.

15

Want ic sal v gheuen eenen mont ende wijsheyt, den welcken niet en sullen mogen wederstaen al die gene die v tegen zijn sullen.

16

Ghi sult gheleuert worden oeck van v ouders, ende broeders, ende magen, ende vrienden, ende sullen den sommigen wt v den doot aendoen.

17

Ende ghi sult van allen menschen gehaet worden om mijnen naem

18

ende een hayr wt v hooft en sal daer niet verloren gaen.

19

In v verduldicheyt suldy v sielen besitten. *

20

⁺+ Ende als ghi siet dat Hierusalem omgecingelt wert vanden heerscaren, dan sult ghi weten dat haer verlatenis aenstaet.

+ D

21

Die dan in Iudea zijn, die vlien totten bergen, ende die int midden van haer zijn, die gaen wech, ende die inde landen zijn, die en gae daer niet in,

22

want dyt zijn die dagen des wraecs, op dattet al volbracht worde datter ghescreuen staet.

23

Maer wee die beurucht zijn, ende voeden in die dagen want daer sal een grote tribulacie op de aerde wesen, ende toornicheyt in dit volck.

24

Ende si sullen int scerp vant sweert vallen, ⁺ si sullen gheuangen geleyt worden in allen nacien ende Ierusalem sal verlaten worden vanden Heydenen tot dat de tijden der nacien veruult worden.

+ Ione. ij.c Mat. 24.c mar. xiij.b

25

⁺+ Ende daer sullen teekenen zijn in die sonne, ende maen, ende sterren, ende inder aerden verdriet der menschen, ouermits confuys vant geluyt der zee, ende der vloeden,

+ E

26

ende die menschen sullen verdwinen van vrees, ende verwachtinge der dinghen die de ganse werelt ouer comen sullen. *

Want de crachten der hemelen sullen beroert worden:

27

ende dan sullen si den soon des menschen sien comen in een wolck met grote cracht, ende maiesteyt.

28

Ende als dese dinghen beghinnen te geschien soe siet op, ende heft v hoofden op, want v verlossinghe is nakende.

29

Ende hi seyde haer een ghelijkenis. Besiet den vijchboom, ende alle boomen,

30

als si vruchten wt haer voortbrenghen, so weet ghi dat die somer aenstaet.

31

Alsoe als ghi dese dinghen siet geschien, so sult ghy weten, dattet rijck gods na by is.

32

Voorwaer seg ic v, Dit gheslacht en sal niet voorby gaen, eer dat alle dese dinghen geschiet sullen wesen.

33

Hemel ende aerde sullen voorby gaen, maer mijn woorden en sullen nyet voorby gaen. *

34

⁺+ Wacht v dat by auonture v herten nyet beswaert en worden met gulsicheyt, ende dronckenschap, ende sorchfuldicheyt van dit leuen dat dien dach onuersiens v nyet ouer come.

+ F

35

Want als een strick, sal hi ouercomen op alle, [kolom] dye daer sitten op dat aensicht des gheheel aertrijcks.

36

Daer om so waect, alle tijt biddende, op dat ghy weerdich moecht worden gheuonden tontvlien, al dese dinghen dye daer toecomende zijn, ende staen voor den soon des menschen. *

37

Ende daechs was hy leerende inden tempel mer snachts wtgaende bleef inden berch die ghenoemt wort der olyuen.

38

Ende al tvolck quam inden dageraet tot hem, op dat si hem inden tempel horen souden.