De Vorsterman Bijbel

§ Dat .xix. Capittel.

1

⁺+ ENde ingegaen wesende: doerwandelde hi Hierico.

+ A

2

Ende siet een man ghenoemt Zacheus, ende die selfde was een prins der publicanen, ende hy was rijck,

3

ende begeerde Iesum te sien, wie dat hy was, ende en mocht niet van die schare, ouermidts dat hi cleyn was van stature.

4

Ende voor lopende, is opgeclommen eenen wilden vijchboom, dat hi hem sien soude, want hi soude daer voorby gaen.

5

Ende doen hy gecomen was totter plaetsen. Iesus opsiende heeft hem ghesien, ende heeft geseyt. Zachee haest: climt neder, want huyden soe moet ick blijuen in v huys.

6

Ende haestende, is hi neder gheclommen, ende heeft hem blidelick ontfanghen.

7

Ende als si dit alle saghen, murmureerdense, seggende, dat hy met eenen sondaer verkeerde.

8

⁺Ende Zacheus staende, heeft ghesproken. Heer. Siet, die helft van mijnre goeden gheue ick den armen, Ende ist, dat ick yemant bedrogen hebbe, dat gheue ick vieruout weder om

+ B

9

Iesus sprac tot hem, heden is geschiet salicheyt desen huse, ouermidts dat hi ooc is een soen van Abraham.

10

Want die soon des menschen is gecomen om te soecken, ende salich te maken, dat verloren was. *

11

Sy dit hoorende, heeft hi gesproken een parabel, ouermidts dat hi bi Ierusalem was, ende dat si vermoeden datter stont, dat rijc gods verthoont soude worden.

12

Daer om heeft hy geseit. ⁺ Een edel man, is gereist in een vreemt lant, dat hi soude ontfangen een rijc, ende soude weder comen.

+ mat. xxv.a mar. xiij.d

13

Ende geroepen wesende zijn thien knechten, heeft haer gegeuen thien penningen, ende sprac tot haer. Doet comenschap ter tijt toe, dat ick comen sal.

14

Ende zijn borgeren hateden hem, ende hebben na hem boden wt ghesonden: seggende. Wi en willen niet, dat dese ouer ons regneren sal. [kolom]

15

⁺Ende het is geschiet, dat hi weder quam, ontfangen hebbende trijc. Ende heeft gheboden. dat zijn knechten geroepen souden worden, die hy tghelt ghegeuen hadde, om dat hy soude weten, hoe veel een yegelic gecomenschapt hadde.

+ C

16

Ende die eerste is ghecomen, seggende. Heer, v penninc heeft vercregen thien penningen.

17

Ende hy sprac tot hem. Ey goede knecht want ghi int minste getrou geweest zijt, soe sult ghy macht wesen hebbende ouer thien steden.

18

Ende de ander is ghecomen, seggende Heer, uwe penninc heeft gewonnen vijf penninghen.

19

Ende tot desen sprack hy. Ende weest ghy ouer vijf steden.

20

⁺Ende die ander quam, ⁺ seggende, Heer siet, uwen penninc, den welcken ic geborgen hebbe ghehadt in eenen doec,

+ D

+ Mat. xv.b

21

want ick vreesde v, want ghi zijt een wreet mensche, nemende dat ghi niet geleyt en hebt, ende mayende dat ghi niet gesaeyt en hebt.

22

Hi seyde tot hem. Wt uwen mont oordeel ick v boose knecht. Ghi wist, dat ic ben een wreet mensche, nemende, dat ick niet geleyt en hebbe, ende mayende, dat ick nyet gesaeyt en hebbe,

23

ende waer om en hebt ghi niet gegeuen mijn ghelt aen die wisselbanc, ende ick comende, soude dat sekerlick weder om gheeyst hebben met woecker?

24

Ende hi heeft geseyt tot die daer by stonden. Neemt van hem den penninck, ende gheeft hem, den welcken daer heeft .x. penningen.

25

Ende si hebben tot hem geseyt. Heer hi heeft .x. penningen.

26

Want ic segge v, dat al die ghene die heeft, sal gegeuen worden ende hy sal oueruloeyen. ⁺ Maer van dien dye niet en heeft, ende ooc dat hi heeft, sal hem af genomen worden.

+ E

27

Maer oock brenct herwaerts tot mi die mine vianden, die welcke niet en wouden dat ick ouer haer regneren soude, ende dootse voor mi.

28

Ende dese dinghen gheseyt wesende, ghinc voor, climmende na Hierusalem.

29

Ende het is gheschiet, doen hy nakede tot Betphage ende Bethanien, biden berch, die ghenoemt is, der olyuen, heeft hy gesonden twee van zijnen discipulen, ⁺

+ Mat. xxi a Mar. xi.a. Ioan. xij.b

30

segghende. Gaet int casteel dat teghens v ouer leyt, int welck ingaende, suldi vinden een ionc vuelken met een ezelinne ghebonden, op twelck nyemant van menschen gheseten en heeft, ontbint dat, ende brenghet hier.

31

Ende ist, dat v yemandt vraecht, waer om ghijt ontbint, ghy sult so hem segghen: dat dye heer hem van noode heeft.

32

Ende die gesonden waren, zijn gegaen, ende hebben tvuelken gheuonden, staende als hy haer gheseyt hadde.

33

Ende si ontbindende tvuelken, hebben ghesproken die heeren van

[p. F7r]

dien tot haer. ⁺ Waer om ontbindy dat vuelken?

+ F

34

Ende si hebben gheseyt, want die heer heeft hem van noot,

35

ende hebbent gheleyt tot Iesum. Ende werpende haer cleederen op tvuelken, hebbender Ihesum op gheset.

36

Ende hy wech gaende, hebbense haer cleederen onder ghespreyt inden weghe.

37

Ende als hy te hans nakede aent neder climmen des berchs der olyuen. Alle die menichte hem verblijdende, hebben begonnen gode te louen met groter stemmen, van alle die crachtige wercken, die welcke si gesien hadden,

38

segghende Ghebenedijt die coninck, die daer coemt inden naem des heeren vrede inden hemel ende bliscap inden hoochsten.

39

Ende sommighe wter scharen der pharizeen, hebben tot hem geseyt. Meester straft v discipulen.

40

Den welcken hy gheseyt heeft Ick segge v. Want ist dat dese swighen, die steenen sullen roepen.

41

+ Ende als hi genaect heeft, siende die stadt heeft op haer ghescreyt: seggende.

42

⁺Och, oft ghi bekende, ⁺ ende voorwaer in desen uwen daghe, zijn tot uwen vrede, maer nv zijn si verborgen van uwen ooghen.

+ G

+ Mat. 24 a Mar. xiij a Ioan. ij.c

43

Want daer sullen comen daghen teghens v, ende uwe vianden sullen v omcinghelen met bolwerck, ende sullen v om belegghen, ende sullen v aen alle canten benauwen,

44

ende sullen v werpen totter aerden, ende v kinderen die in v zijn. Ende si en sullen niet laten in v den eenen steen opten anderen, ouermidts dat ghi niet ghekent en hebt die tijt uwes besoeckens.

45

Ende ingegaen wesende inden tempel, ⁺ heeft begonnen wt te worpen, die daer waren vercoopende, ende coopende,

+ Esa. lvi.c Hiere. 7.b

46

seggende haer. Daer is ghescreuen. Mijn huys is een huys des gebets, ghi hebt dat ghemaect een spelonc der moordenaren.

47

Ende hi was daghelicx leerende inden tempel. *

Maer die princen der priesteren, ende scriben sochten hem te verderuen, ende ooc mede die princen des volcs,

48

ende si en vonden nyet, wat si hem doen souden, want al tgeheel volc was op getoghen hoorende hem.