De Vorsterman Bijbel

§ Dat .xi. Capittel.

1

⁺ENde als si Ierusalem nakende waren, ende Bethanien, ⁺ bi den olijuen berch, seynde hy twee van sinen discipulen wt,

+ A

+ Luce. xvi.e Ioan. xij.b.

2

ende seyde haer. Gaet int casteel dat tegen v is, ende ter stont daer in gaende, sult ghi een vuelken ghebonden vinden, daer gheen mensche op gheseten heeft, ontbindet, ende leydet tot hier.

3

Ende ist dat v yemant seyde. Wat doet ghi? Segghet, dat die heere dat te doen heeft, ende ter stont sal hy hem herwaert laten.

4

Ende wech gaende, hebben gheuonden een vuelken by een dore gebonden, in een twee wech ende si ontbinden hem.

5

Ende sommige van die ghene die daer stonden, seyden haer. Wat doet ghi, die vuel ontbindende?

6

Ende si hebben haer gheseyt, ghelijckerwijs als Iesus haer beuolen hadde. Ende si hebben hem ghelaten.

7

Ende si hebben dye vuel tot Ihesum ghebrocht, ende hebben haer cleederen daer op gheleyt, ende hi is daer op gheseten

8

Ende veel hebben haer cleederen inden wech ghespreyt.

⁺ Ende dye andere sneden tacken van dye boomen ende spreydense inden wech.

+ B

9

Ende dye daer voorby ghinghen, ende daer nae volchden, riepen, segghende. Osanna, ghebenedijt, die daer coemt inden naem des Heeren.

10

Ghebenedijt, dattet rijck coeme inden naem des Heeren, ons vaders Dauid, osanna int alderhoochste.

11

Ende hi is te Hierusalem inden tempel ghecomen. Ende als hijt al ront om ghesien hadde, ende twas vre des auonts, ⁺ so is hi met zijn xij. te Bethanien ghegaen.

+ Mat. xij.b

12

Ende sdaechs daer nae als hy wt Bethanien gegaen was, heeft hem gehongert,

13

ende als hy een vigeboom van verre ghesien hadde, blanderen hebbende, so quam hi om te sien, oft hy wat in haer vinden soude. Ende als hy tot haer gecomen was, heeft hi niet dan bladeren gheuonden want het en was der vijghen tijt niet.

14

Ende antwoordende, heeft hem gheseyt. Hier nae en moet niemant wt v vrucht eten, inder eewicheyt. Ende zijn discipulen hoordent.

15

Ende si comen te Ierusalem, ende Iesus inden tempel ghegaen zijnde, heeft beghinnen wt te worpen die ghene die daer vercochten, ende cochten inden tempel, ende die tafelen der wisselaren, ende die stoelen der duyuen vercoopers heeft hy om ghekeert,

16

ende hy en heeft nyet ghehengt, dat yemant

[p. D6v]

een vat door den tempel droech.

17

⁺Ende hi leerde, seggende haer. Ist niet gescreuen? ⁺ Mijn huys sal alle heydenen, een huys des bedens genoemt worden? Maer ghi hebbet gemaect een spelunc der moordenaren. ⁺

+ C

+ Esaie. lvi. Hiere. vij.

+ Mat. xxi Luc. xix. ende xx. ende .xxij Ioan. vij

18

Ende die scriben ende princen der priesteren dit gehoort hebbende, sochten, hoe dat si hem souden dooden, want si vreesden hem, dat die geheele schare zijn leere verwonderde.

19

Ende alst nv auont was, is hi wt die stadt gegaen,

20

ende smorgens voorby gaende, hebben si den vijgheboon ghesien dorre gheworden, tot die wortel toe

21

Ende Petrus gedacht hebbende, seyt hem. Rabbi: siet die vijgeboom, die ghi vermaledijt hebt, is dorre geworden.

22

Ende Iesus antwoordende seyt haer Hebt dat gelooue gods.

23

Voorwaer segge ic v, dat so wie tot desen berch seggen sal, wert ghenomen, ende in die zee geworpen, ende hy in zijn herte nyet en twifelde, maer gheloofde dattet ghescien sal, ⁺ dat hi seyt, hem sal gheschien al dat hy seggen sal. *

+ Mat. xxi c Ioan. xiiij.b

24

Daer om seg ic v wat ghi biddende begeert ghelooft dat ghijt ontfanct, ende tsal v geworden.

25

Ende als ghi staen sult biddende, vergeeft, ist dat ghi yet tegens yemant hebt, op dat v vader die in die hemelen is, v uwe misdaden vergeuen mach. ⁺

+ Mat. vi.d

26

Ist dat ghi niet en vergeeft, so en sal v vader die in den hemel is, v uwe sonden oec niet vergeuen.

27

⁺Ende si comen wederom te Ierusalem, ende als hy wandelde inden tempel, comen tot hem die princen der priesteren, ende scriben, ende ouders,

+ D

28

ende segghen hem. In wat macht doet ghi dese dinghen? ende wie heeft v dese macht gegeuen, ⁺ dat ghi dese dinghen doet?

+ Mat. ij.c Luce. xx.a.

29

Ende Iesus antwoordende, heeft haer geseyt. Ick sal van v oec een woort vraghen, ende antwoort my, ende ick sal v segghen in wat macht dat ick dese dingen doe.

30

Tdoopsel van Ioannes wast wten hemel, oft wten menschen? Antwoort mi.

31

Ende si dochten by hem seluen, seggende. Ist dat wi segghen wt den hemel, so sal hy seggen, waer om en hebt ghy hem dan nyet gheloeft?

32

Ende seggen wi wt den menschen, wij vreesen tvolck. Want si alle gader hielden, dat Ioannes een propheet was.

33

Ende antwoordende, seggen si tot Iesum. Wi en wetens niet Ende antwoordende, seyt Iesus tot haer. Noch ick en segge v oeck niet in wat macht ick dese dinghen doe.