De Vorsterman Bijbel

§ Dat .xxi. Capittel.

1

⁺ENde als si ghenaecten Hierusalem, ende tot Bethphage ghecomen waren, ⁺ totten berch van Oliueten: heeft Iesus twee discipulen ghesonden,

+ A

+ Mar. xi.a. Luc. xix.c Ioan. 22.a

2

seggende haer. Gaet int casteelken, dat teghen v is, ende ter stont sult ghi een eselin ghebonden vinden, ende een vuelken met haer. Ontbintse, ende leytse tot my.

3

Ende oft v yemant wat seyt, segghet. Die heere heeft dese van noode. Ende ter stont sal hy haer laten.

4

Ende dit is gheschiet, op dat veruult soude worden, datter ghesproken is door den Propheet, seggende. ⁺

+ Esa. lxij.b

5

Segghet die dochter van Syon. Siet, v coninck coemt v sachtmoedich, sittende op een eselinne, ende die ionghe des iucdragenden ezels.

6

Ende die discipulen gaende, hebben ghedaen als Ihesus haer beuolen hadde.

7

Ende hebben die ezelinne ende die ionghe ghebracht, ende hebben haer cleederen op haer gheleyt, ende hebben hem daer op doen sitten.

8

Ende veel scaren hebben haer cleederen inden wech ghespreyt. Ende dander sneden tacken van die boomen, ende spreydense inden wech.

9

⁺Ende die scaren die voorghingen ende na volchden, riepen seggende. Osanna den soon Dauid, gebenedijt is hi, dye daer coemt inden naem des heeren. Osanna int alder hoochsten. *

+ B

10

+ Ende als hy ghegaen was in Hierusalem, is alle die gantse stadt beroert geweest, segghende. Wie is dese?

11

Ende dat volck seyde. Dit is Ihesus een Propheet van Nazareth Galilee.

12

Ende Iesus is inden tempel Gods ghegaen, ⁺ ende worp wt al die coopende ende vercoopende waren inden tempel, ende die tafelen vanden wisselaren, ende die stoelen van dye duyuen vercochten, heeft hy om ghekeert.

+ Ioan. ij.c Mar. xi.b Esa. lvi.c Hiere 7 b

13

Ende heeft haer gheseyt. Daer is gescreuen. Mijn huys sal een bede huys ghenoemt worden. Ende ghy hebt dat een moortcuyl

[p. C3r]

gemaect.

14

Ende daer zijn tot hem gecomen inden tempel blinde ende cruepelen, ende hi heeftse gesont gemaect.

15

Die princen der priesteren ende scriben, gesien hebbende die wonderlike dingen, dwelcke hi gedaen had, ende die kinderen inden tempel roepende ende seggende osanna den soon Dauid. So zijn si toornich gheweest

16

ende hebben hem gheseyt. Hoort ghi wel wat dese segghen? Ende Iesus seyt haer. Ia ick en trouwe. Hebt ghi noeyt ghelesen. Want wt den mont der kinderen ende die suyghende zijn, ⁺ hebt ghi dat lof volmaket?

+ Psal. viij

17

ende als hi haer ghelaten hadde is hy wter stadt ghehaen in Bethanien, ende is daer gebleuen

18

* Smorghens weder in dye stadt keerende, heeft hem gehongert.

19

Ende siende eenen vijch boom bi den wech, isser bi gecomen, ende en heeft nyet in haer geuonden, dan bladeren allene. Ende hy heeft tot haer gheseyt. Nae dese tijt en moet wt v gheen vrucht wassen inder eewicheyt. Ende die vigheboom is ter stont dorre geworden.

20

Ende alst die discipulen gesien hadden, hebben si hen verwondert seggende. Hoe isse so gheringe verdroocht? ⁺

+ Mar. xi.b Ioan. xiiij b

21

Ende Iesus antwoordende seyt haer ⁺ Voorwaer seg ick v, waert dat ghi gheloof hadt, ende niet en twifelde, so sout ghi niet alleen doen, dat den vijgeboom geschiet is, maer al seyde ghi, desen berch heft v op, ende werpt v in die zee, het sal geschien.

+ C

22

Ende al dat gheen dat ghi bidden sout in v gebet, gelouende sult ghijt vercrigen

23

+ Ende als hi gecomen was inden tempel, so zijn tot hem gecomen daer hi was leerende die princen der priesteren, ende ouders des volcs, segghende. In wat macht doet ghi dit? Ende wie heeft v dese macht gegeuen?

24

Iesus antwoordende, heeft haer geseit Ic sal ooc v een woort vragen, ⁺ twelck ist sake dat ghijt mi segt, so sal ic ooc segghen, in wat macht dat ic dit doe.

+ Luce 2 a

25

Ioannes doopsel van wien wast? wten hemel oft wten menschen? Ende si hebben by haer seluen ghedocht, segghende. Seggen wi wt den hemel so sal hi ons seggen, waer om en hebt ghi dan hem niet gelooft?

26

Ende ist dat wi seggen, wten menschen, so vreesen wi die scaren, want si hadden Ioannem al te samen voor een propheet

27

Ende Ihesu antwoordende, hebben si gheseyt: wi en wetens niet. Ende hy heeft tot haer geseyt. Noch ic en segghe v ooc nyet, in wat macht dat ic dit doe. *

28

Mer wat dunct v? een mensch had twee sonen, ende gaende totten eersten heeft gheseyt Sone gaet heden, ende werct in minen wijn-[kolom]gaert.

29

Ende hi antwoordende, sprack. Ick en wil. Ende daer na berou crigende, ghinc hi henen.

30

Ende gaende totten ander, heeft des gelijcs geseyt. Ende die antwoordende, sprack. Ic gae heer. Ende hi en is niet gegaen.

31

Wie van dese twee heeft gedaen den wil des vaders? Ende si seggen hem: die eerste. Iesus sprack tot haer Voorwaer seg ic v, dat die publicanen ende hoeren voor v sullen gaen int rijck gods,

32

want Ioannes is tot v gecomen doer den wech des rechtuerdicheyts, ende ghi en hebt hem niet gelooft, die publicanen ende die hoeren hebben hem ghelooft. Ende ghi siende en hebt gheen penitencie gedaen, daer na om hem te geloouen.

33

§ Hoort een parabel.

⁺ + Een mensch wasser, een vader des huysgesins, die welcke geplant heeft eenen wijngaert, ⁺ ende heefter eenen tuyn om gheleet, ende heeft een pers daer in ghegrauen, ende een toren ghetimmert, ende heeft hem die boulieden verhuert, ende is pelgrimagie gereyst

+ D

+ Luce. ij.b Mar. xij.a

34

Ende als die tijt der vruchten ghenaect was so heeft hi gesonden zijn knechten tot die ackerlieden, op datse die vruchten ontfangen souden.

35

Ende de boulieden zijn knechten gegrepen hebbende, hebben den eenen gesleghen, dander gedoot, den derden gesteent.

36

Weder heeft hi ghesonden ander knechten, meer dan deerste, ende si hebben haer des gelijcs ghedaen.

37

Ende ten laetsten heeft hi gesonden tot haer sinen soon, seggende. Si sullen misschien minen soon ontsien.

38

Ende die ackerlieden, als si den soon gesien hebben, hebben geseyt onder malcanderen. Dit is dye erfgenaem, coemt laet ons hem dooden, ende wi sullen zijn erf hebben.

39

Ende als si hem geuaet hebben, hebben si hem wt den wijngaert geworpen ende gedoot.

40

Daer om, wanneer die here des wijngaerts coemt wat sal hi desen boulieden doen?

41

Sij seggen hem. Die quade sal hi qualic doen vergaen, ende sinen wijngaert sal hi ander boulieden verhueren, welcke hem vrucht sullen gheuen op sinen tijt.

42

Iesus sprac tot haer. Hebt ghi noyt gelesen in die scriften. ⁺ Die steen, welcke die werclieden verworpen hadden, dye is gemaect int hooft des hoecs? Dat is vanden heer gedaen ende tis wonderlic in ons oogen.

+ Psal. c.xv. Marci xxij.a Luce. xx.c

43

Daer om segge ic v, dat rijck Gods sal van v genomen worden, ende tsal gegeuen worden den heydenen, doende zijn vrucht.

44

Ende die daer valt op desen steen, sal ghebroken worden. Maer op wien dat hi valt, sal hi te niet maken.

45

Ende als die princen der priesteren ende die pharizeen gehoort hadden dese parabolen, hebben

[p. C3v]

si verstaen dat hi van haer sprack,

46

ende soeckende hem te vanghen, hebben gheureest dye scharen, want si hielden hem voor een propheet.

1

Ende Ihesus antwoordende, heeft weder om gesproken tot haer, door parabolen ende gheseyt. *