De Vorsterman Bijbel

§ Dat .xix. Capittel.

1

⁺ENde tis geschiet doen Iesus dese sermonen gheeynt hadde, vertrac hi van Galileen, ⁺ ende is gecomen in die eynden van Iudeen ouer die Iordaen,

+ A

+ Mar. x

2

ende veel scaren zijn hem na geuolcht, ende heeftse daer gesont gemaect.

3

Ende die pharizeen zijn tot hem gecomen, tempterende hem, ende seggende hem. Ist een man geoorloft te scheyden van zijn huysurouwe om een yeghelike sake? ⁺

+ i.Cor. vi.b Ephe. v.d Ge. i. ende ij.

4

Die welcke haer antwoordende, heeft haer gheseyt. Hebt ghi niet ghelesen, dat die ghene die de mensche maecte van beghin, heeft haer een man ende vrou gemaect?

5

Ende hi heeft haer geseyt. Daer om sal een mensch vader ende moeder laten, ende sal bi zijn

[p. C2r]

wijf geuesticht wesen, ende si sullen zijn twee in een vleesch,

6

alsoo en zijnse nv niet twee, maer een vleesch. Daer om dat God te samen gheuoecht heeft, laet dat die menschen niet scheyden.

7

⁺Si segghen hem: waer om heeft dan Moyses gheboden te geuen een verstoot brief, ⁺ ende haer te laten.

+ B

+ Mat. v.e. Deu. xxiiij

8

Hij heeft haer geseyt. Moyses heeft v toeghelaten, om die herdicheyt uwer herten, te verlaten v wiuen. Maer vanden beghin en heeftet so niet gheweest.

9

Maer ic seg v dat, so wie zijn wijf verlaet anders dan om ouerspel, ende een ander trout, dese doet ouerspel, ende wie die verlaten trout, die doet ouerspel.

10

Ende zijn discipulen seyden hem. ⁺ Ist dat die sake des menschen met zijn wijf aldus heeft, so en ist niet goet te houwen.

+ Luc. xvi.c.

11

Die welcke heeft haer geseyt. Nyet al en verstaen dat woordt, mer dient gegeuen is,

12

want daer zijn besneden die van moeders buyck also gheboren zijn, ende daer zijn besneden, die vanden menschen besneden gemaect zijn. Ende daer zijn besneden, die hen seluen besneden hebben om trijc der hemelen. Diet nemen mach, die nemet.

13

Doe zijn hem gebrocht kinderen, om dat hi die hant op haer leggen soude, ⁺ ende bidden. Die discipulen straften haer.

+ Lu. xviij.c. Mar. x.b.

14

Mer Iesus seyde haer. Laet die kinderen toe, ende en verbiet haer niet tot mi te comen, ⁺ want sulcker is trijc der hemelen.

+ Mar. x.c

15

Ende als hi haer die hant op geleyt hadde, is hi van daer gegaen.

16

+ Ende siet een tot hem comende, heeft hem geseit Goede meester, ⁺ wat sal ic goets doen, op dat ic dewige leuen mach hebben?

+ Lu. xviij.d

17

de welke heeft hem gheseyt. Waer om vraechstu mi vanden goede? ⁺ daer is een goet, dat is god. ⁺ Wilt ghi ingaen int leuen? onderhout die geboden.

+ Exo. xx.c.

+ C

18

Hi seit hem, welcke? Ende Ihesus seyde. Ghi en sult niet doot slaen. Ghy en sult gheen ouerspel doen. Ghi en sult niet stelen. Ghi en sult gheen valsch getuych segghen.

19

Eert vader ende moeder. Ende ghi sult uwen naesten lief hebben als v seluen.

20

Die iongelinc seyt hem. Al dese heb ick onderhouwen van mijn ioncheyt af, wat ghebreect mi noch?

21

Iesus heeft hem geseyt Ist dat ghy volmaect wesen wilt, gaet ende vercoopt al dat ghi hebt, ende geuet den armen, ende ghi sult een scat inden hemel hebben, ende coemt volcht mi. *

22

Ende doen die iongelinc dese reden ghehoort hadde, is hy droeuich wech gegaen, want hy was hebbende veel besittingen.

23

Ende Iesus heeft sinen discipulen gheseyt. Voorwaer seg ic v. Die rijcke sal swaerlick [kolom] int rijck der hemelen gaen.

24

Ende weder om seg ic v. Lichteliker ist een kemel doer een naelden ⁺ ooghe te gaen, dan een rijcke in te gaen dat rijck der hemelen.

+ D

25

Dit gehoort hebbende die discipulen, verwonderden hen zeer, seggende. Wie mach dan behouden worden?

26

Ende Ihesus haer aensiende, heeft haer geseyt. Dat is biden menschen onmogelic, maer by god zijn alle dingen mogelic.

27

+ Doen antwoordende Petrus, heeft geseyt. Siet, ⁺ wi hebben alle dinck ghelaten, ende zijn v na gheuolcht, wat sal ons daer om wesen?

+ Mar. x.d Lu. xviij.e

28

Ende Iesus heeft haer geseit. Voorwaer seg ick v, dat ghi die mi na gheuolcht zijt, in die weder gheboorte, als die soon des menschen sitten sal in die stoel zijns maiesteyts, so sult ghi mede sitten op die .xij. stoelen oordelende die .xij. geslachten van Israel. ⁺

+ Luce. xx.c.

29

Ende al dieghene die laet huys, oft broeders, oft susters, ⁺ oft vader oft moeder, oft huysurou, oft kinderen, oft ackeren om mijnen naem, dye salt honderfout ontfanghen, ende dat eewich leuen sal hi besitten. *

+ Luce. iij.f Mar. x d Mat. x.d.

30

Ende veel die de eerste zijn, sullen die laetste worden, ende die laetste die eerste.