De Vorsterman Bijbel

Dat .xxxvi. Capittel.

1

ENde tgeschiede int vierde iaer van Ioachim Iosias sone des conincs van Iuda, ⁺ dat dit woort vanden HERE gheschiede tot Ieremiam, segghende,

+ A

2

Neemt eenen boeck ende scrijft daer inne alle die woorden die ic tot v gesproken heb tegen Israel ende Iuda, ende tegen alle die heydenen, van dien dage dat ic tot v gesproken hebbe, van Iosias dagen, tot desen dage toe,

3

Oft misschien dat huys van Iuda, horende alle dat quaet dat ic hen dencke te doen, bekeeren sal, elc man van sinen quaden wegen, ende ic sal genadich zijn ouer haer boosheyt ende sonden.

4

Hier omme riep Ieremias Baruch Nerias [kolom] sone. Ende Baruch screef wt Ieremias monde alle des HEEREN redenen, die hy tot hem gesproken hadde, in dien boeck.

5

⁺Ende Ieremias beual Baruch, seggende Ic ben geuangen, ende ic en mach in des HEREN huys niet comen,

+ B

6

Hier om gaet ghi daer inne, ende leest dat boeck daer ghy in ghescreuen hebt des HEREN woorden wt minen monde, Inden vastendaghe daert dat volck hoort in dat huys des HEREN, Ende hieren bouen daert alle Iuda hoort, die van haren steden comen. Ghi sullet hen lesen,

7

oft misschien haer gebet vallen mochte in des HEREN aenschouwen.

Ende dat hem een yegelic afkeerde van sinen quaden wege, Want die gramscap ende die toornicheyt is groot, die die HEERE tegen dat volc ghesproken heuet.

8

Ende Baruch Nerias sone dede, na alle dat hem Ieremias die propheet beuolen hadde, ende hi las in des HEREN huys wten boeck die woorden des HEEREN.

9

Ende het gheschiede in Ioachims Iosias sone des conincs van Iuda vijfste iaer, in die neghenste maent, datmen riep een vasten wt, in des HEEREN aenschouwen, alle den volcke in Ierusalem, ende alder ghemeynte die daer te samen gecomen was vanden steden van Iuda ende van Ierusalem.

10

⁺Ende Baruch las wten boecke alle Ieremias woorden, in dat huys des HEEREN In die offercamer van Gamarias Saphans sone des scriuers, in dat bouenste portael, inden inganck der nieuwer poorten, des huys des HEREN, daert alle dat volck hoorde.

+ C

11

Ende doen Micheas Gamarias sone, dye Saphans sone was, alle dye woorden des HEREN gehoort had wt den boecke,

12

Soo ghinc hi neder in des Conincs huys tot des scriuers scatcamer, Ende siet, daer saten al die princen, Elisame die scriuer, ende Dalaias Semeyas sone, ende Helnathan Achabors sone, ende Gamarias Saphans sone, ende Sedechias Hananias sone, ende alle die princen,

13

Ende Micheas, gaf hen te kennen alle die woorden die hi Baruch had horen lesen in des volcs ooren wt den boecke,

14

Ende die princen sonden Iudi Nathanias sone, de sone Selemei die Chusi sone was, tot Baruch, ende seyde. Neemt den boec in v hant daer ghi wt laest, doent volc hoorde, ende coemt Doen nam Baruch Nerias sone den boec in zijn hant, ende quam tot hen,

15

Ende si seyden tot hem, Sidt hier, ende leest dese woorden in onsen ooren. Ende Baruch last in haer ooren.

16

⁺Als si alle dese woorden gehoort hadden verwonderden si, elc tot sinen naesten, Ende si

+ D

[p. O2r]

seyden tot Baruch, Wi moeten den Coninck alle dese redenen vercondigen?

17

Ende si vraechden hem segghende, Segt ons, hoe screefdy alle dese redenen wt sinen monde?

18

Ende Baruch seyde hen, Wt sinen monde sprac hi alle dese redenen recht oft hise gelesen hadde, ende ick screefse met incte in desen boeck.

19

Ende die princen seyden tot Baruch. Gaet ende verberget v, ghi ende Ieremias, ende en laet niemant weten waer dat ghi zijt.

20

⁺Ende si ghingen in totten coninck, in die voorsale, maer den boec ghauen si te bewaren in des scriuers Elisama schatcamere, ende si verteldent aldaert die coninc hoorde, alle dese redenen.

+ E

21

Ende die coninck sandt Iudi, dat hi den boec nemen soude, ende hi nam den boec van Elisama des scriuers scatcamere, ende last dattet die coninc, ende alle die princen die omtrent den coninc stonden, hoorden.

22

Ende dye coninc sadt int winterhuys, inder negenster maent, ende voor hem stont een vier panne, vol gloeyende colen.

23

Ende als Iudi gelesen hadde drie oft vier siden, soo sneet hi den boec ontwee, met des scriuers scrijfmes, ende hy werp den boec int vier, dat in dye vierpanne was, ⁺ tot dat alden boeck verbrandt was int vier, dat inder vierpannen was.

+ F

24

Ende die coninc met alle sinen knechten, die alle dese redenen hoorden, en ontsaghen hen nyet, noch en schoerden haere cleederen niet.

25

Maer Elnathan, ende Dalias, ende Gamarias weder seyden den Coninck, doen boeck te verbranden ende hi en hoordese niet.

26

Ende die coninc beual Hieramiel, Amalech sone, ende Saraie Esriels sone, ende Selemie Achdels sone, dat si Baruch den scriuere, ende Ieremiam den propheet vanghen souden, Maer die HERE verberchse.

27

Ende des HEEREN woort ghesciede tot Ieremiam den propheet, na dat die coninc dat boeck verbrant hadde, ende die redenen die Baruch ghescreuen hadde, wt Ieremias mont, seggende.

28

Neemt weder eenen anderen boec ende scrijft daer inne alle die redenen, die inden eersten boec ghescreuen waren, die Ioachim die Coninc van Iuda verbrant heuet.

29

Ende ghi sult Ioachim den Coninc van Iuda segghen. Dit seyt die HERE. Ghi hebt den boec verbrant, seggende. Waerom screefdy daer in, bootscappende, Die Coninc van Babilonien sal haestelijc comen, ende sal dit landt verwoesten, ende hi sal dit landt wech doen ende op doen houden, menschen ende beesten?

30

Daerom seyt die HEERE teghen Ioachim den Coninck van Iuda, Daer en sal niemant wt hem wesen, dye op Dauids throon sitten [kolom] sal, ende men sal zijn lichaem wt worpen totter hitten des daechs, ende totter veruriesinghe des nachts.

31

Ende ic sal teghen hem, ende tegen zijn zaet, ende zijn knechten versoecken, zijn boosheden, ende ic sal brengen op hem, ende op die ghene die te Ierusalem woonen, ende op die mannen van Iuda, alle dat quaet, dat ick tegen hen gesproken hebbe, ende si en hebbens niet ghehoort.

32

Ende Ieremias nam eenen anderen boec, ende gaf dien Baruch Nerias sone den scriuere, ⁺ ende hi screef daer in wt Ieremias monde, alle de woorden vanden boecke die Ioachim die Coninc van Iuda verbrant hadde int vier, ende hierenbouen waren daer toe gedaen veel meer redenen, dan daer te voeren in waren.

+ G

§ Hoe zedechias beueelt, datmen den HERE voor hem bidden soude. Ende Ieremias wilde wtghaen, ende hi wert gheuanghen, ende die coninc sprack hem toe, ende alle daghe wert hem een stuck broots ghegheuen.