De Vorsterman Bijbel

§ Dat .xxxiij. Capittel.

1

⁺DEs HEREN woort gesciede anderwerf tot Ieremiam, doen hi in dat voorhuys vanden kercker noch besloten was, ende hi seyde

+ A

2

Dit seyt die HERE. Die dat doen sal ende maken, ende bereyden sal, die HERE is sinen naem,

3

Roept mi aen, ende ic sal v verhooren, ende ic sal v grote dingen bootscappen, ende vaste die ghi niet en weet.

4

Want dit seyt die HEERE God van Israel totten huysen van deser stat, ende totten huyse des conincs van Iuda, die ghebroken zijn, ende totten bolwercke, ende totten zwaerde

5

der genen die comen zijn, om teghen die Caldeeussche te striden, om die te veruullen met doode lichamen der menschen, die ic in minen toorn, ende in mijnder gramscappen geslagen hebbe, mijn aensicht verborgende van deser stat, om alle haerder boosheden wille.

6

⁺Siet ic sal haer ^* litteekenen decken, ende de gesontheit, ende genesende sal ic) hen openbaren dat gebet des vredes ende der waerheyt,

+ B

* th. wonden toeheylen ende gesont maken ende ic sal.

7

^* Ende ic sal bekeeren die bekeeringe van Iuda ende van Israel) ende ic salse timmeren, ghelijc vanden beginne,

* th. ic sal die geuankenis van Iuda ende Israel wederkeeren.

8

ende ic salse suyueren van alle haer boosheden, daer si mi in gezondicht hebben. Ende ic sal genadich zijn alle haerder ouertredingen, daer mede dat si mi misdaen hebben, ende mi verlaten.

9

Ende het sal mi tot eenen naem zijn, ende tot blijscap, lof ende vruechde, allen den heydenen der aerden, die daer sullen hooren, alle dat goet dat ic hen doen sal, ende si sullen hen verscricken ende verslaen, van alle den goede ende vrede, dien ic hen doen sal.

10

Dit seyt die HERE, Noch salmen in deser plaetsen, die ghi woest segt te zijn, om datter noch mensce, noch beest en is, in die steden van Iuda, ende buyten Ierusalem, die verwoest zijn ende sonder mensche gelaten, ende zonder inwoonder, ende zonder vee

11

hooren die stemme der blijscappen, ende der vruechden, die stemme des bruydegoms ende der bruyt, Die stemme der genen die seggen sullen ^* Belydt) den HERE der heyrscaren, Want die HERE is goet, zijn ontfermherticheit duert inder eewicheyt, ende der genen die ^* geloefde dingen) brengen in des HEEREN huys. Want ic sal weder brengen die ^* bekeeringe) der aerden, gelijc vanden beginne, seyt die HERE.

* th. danct

* th. lof.

* th. gheuankenisse.

12

Dit seyt die HEERE der heyrscharen,

[p. N8v]

⁺ In deser woester plaetsen, die sonder menscen ende sonder vee is, ende in alle haer steden sal noch wooninge der herderen ende der rustender cudden zijn,

+ C

13

ende inden steden der bergen, ende inden steden der leeger landen, ende inden steden ten zuyden waert, ende in BenIamins lant, ende rontsomme Ierusalem, ende inden steden van Iuda, die cudden sullen daer noch door die handen gaen, der ghenen diese tellen sullen, seyt die HERE.

14

Siet, die dagen sullen comen, seit die HERE, ende ic sal een goet woort verwecken, dwelc ic gesproken heb totten huyse van Israel ende van Iuda.

15

In die dage ende in dien tijden sal ic Dauid doen groeyen, een zaet der rechtuaerdicheit, ende hi sal oordeel ende rechtuaerdicheit inder aerden doen.

16

In dien dagen sal Iuda behouden worden, ende Ierusalem sal betrouwelic woonen, Ende dit is den naem daer si hem mede noemen sullen. Onse rechtuaerdighe HERE.

17

Want dit seyt die HERE. Een man van Dauid, die daer opten throon des huys van Israel sitten sal, en sal niet verghaen.

18

Ende vanden priesteren ende Leuiten, en sal gheen man te niete gaen, van minen aensichte, die daer brantoffer sal offeren, ende den^* offer) verbranden, ⁺ ende tot allen dagen die offerande doot slaen.

* th spijsoffer

+ D

19

Ende des HEREN woort gesciede tot Ieremiam segghende.

20

Dit seit die HERE. Ist dat mijn verbont metten dage, ende mijn verbont metten nacht te niete mach gedaen worden, also dat den dach niet en si, ende den nacht, elc tot sinen tijt,

21

so sal mijn verbont met Dauid minen knecht ooc te niet mogen zijn, also dat van hem gheen sone en sal zijn die daer regeere op sinen throon, ende die Leuiten, ende die priesteren mijn dienaren.

22

Want alsoomen die sterren des hemels niet tellen en mach noch dat zant der zee ghemeten, also sal ick Dauids mijns knechts zaet vermenichfuldighen, ende die Leuiten mijn dienaren.

23

Ende des HEREN woort ghesciede tot Ieremiam seggende.

24

En hebt ghy niet ghesien wat dit volc gesproken heeft seggende. Die twee geslachten die dye HERE wtuercoren hadde, zijn wech gheworpen, Ende si hebben mijn volc versmaet, om dattet als nv geen volck voor hen en is.

25

Dit seyt die HERE, Ist dat ic mijn verbont tusscen den dach ende nacht ende den hemel, ende der aerden gheen wet gheset en hebbe,

26

so sal ic also ooc verworpen dat zaet van Iacob ende van Dauid mijnen knecht, also dat ic van sinen zade, niet nemen en sal, die princen ouer tzaet van Abraham, van Isaac, ende van Iacob, Want ic sal wederomme leyden haere ^* bekeeringhe) ende haerder ontfermen.

[kolom]

* th. gheuankenisse

§ Van die straffinge om dat si die hebreeusche knechten ende maerten niet los ende vry en lieten, Ende die straffinge daer zijt nochtans belouet hadden met heerliker feesten inden tempel, een calf in twee deelen ghesneden zijnde.