De Vorsterman Bijbel

§ Dat .xx. Capittel

1

⁺ENde Phassur Emmers sone dye priester die gheset was ouerste in des HEREN huys, ⁺ hoorde Ieremiam propheteren alle dese redenen,

+ A

+ § Pashur, dat is, een vermeerderinghe der vryheyt

2

Ende Phassur sloech Ieremiam den propheet, ende leyde hem in eenen stock, die in Beniamins hoochste poorte was in des HEREN huys,

3

Ende doent des anderen daechs dach geworden was, so dede Phassur Ieremiam wten stock halen, Ende Ieremias seyde tot hem, Die HERE en heeft uwen naem niet geheeten Phassur, maer anxt van alle siden,

4

Want dit seyt die HERE, Siet, ic sal v gheuen tot anxt, ende alle uwe vrienden, ende si sullen vallen door haerder vianden swaerden, ende uwe oogen sullent sien, Ende ic sal geheel Iuda gheuen in des conincs hant van Babilonien, ende hi salse ouer voeren in Babilonien ende verslaense metten swaerde,

5

Ende ic sal al dat goet van deser stadt ende haeren arbeyt, ende alle haeren ^* prijs,) ⁺ ende alle die scatten der coningen van Iuda, geuen in haerder vianden hant, ende si sullense roouen ende si sullense nemen, ende voerense in Babilonien,

* the. ware

+ B

6

Ende ghi Phassur, ende al die gene die met v woonen in v huys, sult gaen in geuangenisse, ende sult comen in Babilonien, ende daer suldy steruen, ende daer suldi begrauen worden, ghi ende alle uwe vrienden, dien ghi luegenen ghepropheteert hebt,

7

^* Ghi hebt my verleyt HERE, ende ic ben verleyt, ghi waert starcker dan ic, ende ghi quaemt te bouen,) Ic ben geworden tot een bespotten al den dach, Si bespotteden mi alle,

* theb.. Ghi hebbet my wijs ghemaect ende ic hebt mi laten wijs maken ghi hebt mi gegrepen ende gedwonghen

8

Want te hants, spreke ic al roepende, die quaetheyt, ende die verwoestheyt roep ic, Ende des HEREN woort is mi gheworden in lachtere, ende in bespotten alle den dach,

9

ende ic seyde, Ic en sal zijns niet gedencken, noch ick en sal nimmermeer in sinen name spreken, ⁺ Ende het is gheworden in mijn herte als een bernende vier, ende gesloten in mijn beenen, ende ic ben flauw geworden, om dat [kolom] icks niet verdragen en mochte,

+ C

10

Want ic heb gehoort veel menschen lachteren, ende anxt rontsom ouer al, Veruolcht hem, ende laet ons hem veruolgen, van alle den mannen, die mijn peyselijcke vrienden waren, ende dye mijn side bewaerden, Oft hi in eeniger manieren bedrogen worden mach, ende dat wi tegen hem te bouen comen, ende dat wi gecrigen wrake van hem.

11

Maer die HERE is met mi als een starck vechter, ende hierom sullen die gene die mi veruolgen, vallen, ende cranck zijn, si sullen anxtelijc bescaemt worden, want si en verstonden niet den eewigen lachtere, die nimmermeer wtgewist en sal worden,

12

Ende ghi HERE der heyrscharen, die den rechtuaerdigen proeft, die die lendenen siet ende dat herte, ⁺ laet mi toch v wrake van haer sien, Want v heb ic mijn sake ontdect,

+ D

13

Singet den HERE, louet den HERE, Want hi heeft des armen menschen siele verlost, vander quader menschen hant.

14

Vermaledijt si dien dach daer ic ingeboren was, ⁺ die dach daer mi mijn moeder inne baerde, en si niet gebenedijt,

+ Iob. iij.a.

15

Vermaledijt si die man, die minen vadere bootscapte, seggende, V is een knechtken gheboren, ende hi verblide hem als met blijscappen,

16

Die man moet zijn als die steden zijn, die die HERE omwierp, ende ten beroude hem niet, Hi moet hooren den roep, vroech, ende dat gehuyl inden tijde vanden middaghe,

17

dye mi niet doot en sloech wt mijnre moeder vrouwelicheit, dat my mijn moeder gheworden hadde een graf, ende haer vrouwelicheyt een eewighe ontfanck, ⁺

+ Iob. iij.b

18

Waerom ben ic wter vrouwelicheyt gecomen, dat ic sien soude arbeyt, ende rouw ende dat mijn dagen verteert worden tot schande

§ Hoe Ieremias propheteerde dat dat volc van Iherusalem ende zedechias met sinen knechten ende zijn volc geuangen souden worden van Nabuchodonosor den coninck van Babilonien, Ende dat die stadt van Ierusalem verbrant soude worden