De Vorsterman Bijbel

§ Dat .vi. Capittel.

1

⁺INden iare, dat die Coninck ^* Ozias) ghestoruen is, sach ick den HEERE sitten opten hooghen ende verheuen coninclijcken stoel, ende dat huys was vol van zijnder moghentheyt, ende die dinghen die onder hem waren veruulden den tempel.

+ A

* th. Vzia

2

Die Seraphim stonden bouen opten stoel ses vloghelen die eene, ende ses vloghelen die andere, met den tween ouerdecten si zijn aensichte, ende met den tween bedecten si zijn voeten, ende metten tween vloghen si.

3

Ende die een riep totten anderen, ende seyde, Heylich, heylich, heylich, is die HERE die God der heyrscharen, al die aerde is vol zijnder heerlicheyt.

4

Ende die posten bouen aen die harren zijn beroert, vander stemmen des roependens, ende dat huys is veruult met roecke

5

⁺Ende ick seyde, wee mi, want ick ghesweghen hebbe, want ick ben een man besmet van lippen, ende ick woone int midden des volcs dat besmette lippen heeft, Ende met mijn ooghen heb ick den Coninck den HERE der heyrscharen ghesien.

+ B

6

Ende een vanden Seraphim vlooch tot mi, ende in zijn hant was een gloeyende kole, die welcke hi met een tanghe vanden outaer hadde ghenomen.

7

Ende hi raecte minen mont, ende seyde, Siet, ick heb uwe lippen hier mede geraect [kolom] ende uwe boosheyt sal afghenomen worden, ende uwe sonde sal ^* ghesuyuert) worden.

* th. versoent

8

⁺Ende ick hoorde des HEREN stemme, segghende, wien sal ick doch seynden? ende wie sal ons gaen? Ende ick seyde, ic ben hier, seynt mi.

+ C

9

Ende hi seyde, gaet, ende segt desen volcke, Hoort hoorende, ende en willes niet verstaen, ende siet een ghesichte, ende en willes niet bekennen.

10

Verblint dat herte dees volcs, ⁺ ende verswaert zijn ooren, ☞ ende sluyt zijn ooghen, op dat meschien met haeren ooghen niet sie, ende met sinen oore hoore, ende met haerder herten verstaen, ende worden bekeert, ende ick hem ghenese.

+ Mat. xiij b Mar. iiij d Lu. viij.b. act. xxiiij.f Rom. xi.b.

11

Ende ick seyde, Hoe langhe HERE? Ende hi seyde, ⁺ Tot dat die steden verwoest worden sonder bewoonder, ende die huysen sonder mensche zijn, ende die aerde woest sal worden ghelaten.

+ D

12

Ende die HEERE sal die menschen verre van malcanderen setten, ^* ende si sal worden vermenichfuldicht, die verlaten is int midden der aerden,

* th. ende tlant sal zeer verlaten zijn, nochtans sal thiende deel daer inne blijuen ende tsal bekeeren, ende sal wesen gelijck een linde, ende

13

Ende noch sal thiendinghe in haer zijn, ende si sal bekeert worden, ende sal tot een verthooninghe zijn, ghelijck den Therebinthijn boome, ende die) eycke zijn telgherkens wtbreydende is, Het sal heylich zaet wesen, dat in haer staen sal.

§ Vanden ghenen die Ierusalem wilde wt stormen. Ende van die ontfanckenisse des maechts, ende van die verlossinghe van Ierusalem.