De Vorsterman Bijbel

§ Dat .xv. Cap.

1

⁺DIe God ontsiet, sal goet doen, ende die die gherechticheyt onderhoudende is salse vercrijghen,

+ A

2

ende sal hem te ghemoete comen als een gheeerde moeder, ende hi sal hem ontfaen, als een vrouwe van haeren maechdom,

3

Ende si sal dien spijsen metten broode des leuens ende der verstandenisse, ende si sal hem metten water der salicheyt drencken, Ende si sal in dien vast ghemaect worden, ende en sal niet ghebuyht worden,

4

ende si sal hem onthouden, ende hi en sal niet beschaemt worden, ende si sal hem verheffen bi sinen naesten,

5

ende si sal sinen mont int midden der vergaderinghe open doen, ende si sal dien metten gheest der wijsheyt ende der verstandenisse veruullen, ⁺

+ bouen .vi.d

6

ende si sal hem metten cleede der heerlicheyt cleeden, ende si sal ghenoechlicheyt ende verhueghinghe op hem tot eenen schat vergaderen, ende si sal hem met eenen eewighen name beeruen.

7

⁺Sotte menschen en sullense niet begrijpen, ende wel ghesinde menschen sullen haer te ghemoete gaen, Sotte menschen en sullense niet sien, Want si is verre af van houaerdicheyt ende bedroch,

+ B

8

Lueghenachtighe mannen en sullen haerder niet ghedachtich zijn, ende warachtighe mannen sullen in haer worden gheuonden, ende si sullen voortganck hebben totter aenschouwinghe Gods toe.

9

⁺Den lof en is niet schoon in des sondaers mont,

+ C

10

Want hi en is vanden HEERE niet ghesonden, Want van Gode is volmaecte wijsheyt, ende den lof sal bi Gods wijsheyt staen, ende sal oueruloeyen in eenen ghetrouwen mont, ende die ouerheerschap salse hem gheuen,

11

en segt niet bi Gode, si is van hier, En doet niet dat hi hatet,

12

en segt niet, Hi heuet mi in dolinge gebrocht, want ongodlijcke menschen en zijn hem van gheenen node,

13

God hatet alle onwaerdicheyt der dolinghe, ende si en sal niet minlijc zijn den ghenen die God vreesen

14

God heeft den mensche van tbeghin ghestelt, ⁺ ende heeft dien inder hant zijns raets ghelaten, ⁺

+ D

+ Mat. xix.

15

Hi heefter zijn gheboden ende beuelen toe ghedaen,

16

Ist dat ghi die gheboden wilt houden, so sullen si v behouden, ende inder eewicheyt behaechlijcke trouwe houden, [kolom]

17

Hi heeft v water ende vyer voorgheset, tot welck dat ghi wilt steect v hant wt, ⁺

+ Iere. xi.c.

18

voor den mensche is leuen ende doot, goet ende quaet, welck hem behaecht, sal hem ghegheuen worden,

19

want die wijsheyt Gods is veel, ende sterck inder macht siende alle menschen sonder ophouden,

20

Die ooghen des HEEREN zijn totten ghenen die hem vreesen, ⁺ ende hi bekent alle des menschen naersticheyt,

+ psal. xxx.c. Hebr. iiij.c

21

Hi en heeft niemanden gheboden ongodlijck te doen, ende hi en heeft niemanden termijnen ghegheuen te sondighen,

22

Hi en begheert gheen menichte der onghetrouwer ende onnutter kinderen.