De Vorsterman Bijbel

§ Dat .ij. Capittel.

1

⁺MIin sone ghaende totten dyenste Godes, staet in rechtuaerdicheyt, ende in vreesen, ende bereyt v siele tot temptacien,

+ A

2

Druct v herte neder ende lijt, ende neyget v oore ende ontfanget woorden der verstandenissen, ende en haest niet inder tijt der ouerdeckinghe

3

Ghedoecht Gods onderhoudinghen, wort God toegeuoecht, op dat v leuen int wterste wassen mach,

4

Alle dat v toegheschict wort,

[p. E8v]

ontfangt, ende ghedoocht in smerte, ende hebt lijdsaemheit in uwer vernederinge,

5

want inden viere wort gout ende siluer geproeft, maer ontfanckelijcke menschen int forneys der vernederinge,

6

Ghelooft Gode ende hi sal v vermaken, ende rechtet uwen wech, ende hoept in hem, Hout sine vreese, ende wort daer inne out

7

Ghi die den HERE vreest, ontbeyt zijn ontfermherticheyt, ende en wijct niet van hem, op dat ghi niet en valt.

8

⁺Ghy die den HEERE vreest, ghelooft hem, ende v loon en sal nyet ydel worden ghemaect,

+ B

9

ghi die den HEERE vreest, hoept in hem, ende die ontfermherticheyt sal v tot vrolicheit comen,

10

Ghi die den HEERE vreest, hebt hem lief, ende v herten sullen verlicht worden,

11

Kinderen, beschouwet dye gheslachten der menscen, ende weet dat nyemant beschaemt gheworden en is, die inden HEERE hoepte

12

Ende wie heeft in sinen geboden ghebleuen ende is verlaten? Oft wie heeft hem aengeroeroepen, dien hy versmade?

13

⁺Want Godt is goedertieren ende ontfermhertich, ende inden dage des drucs vergeeft hy die sonden, ende hi is een beschermer allen den ghenen dye hem inder waerheyt soecken.

+ C

14

Wee hem die dubbel van herte is, den sondighen lippen, ende den quaetdoenden handen, ende den sondaer die dat lant ingaet met tween weghen,

15

Wee den ongebondene van herten, die Gode niet en geloouen, ende daer omme en sullen si van hem niet beschermt worden,

16

Wee den ghenen die de ghedoochsaemheit verloren hebben, ende die de gerechte wegen verlaten hebben, ende zijn afgekeert in crommen wegen,

17

Ende wat sullen si doen, als die HEERE beghint te ouerbesien.

18

Die den HEERE vreesen, die en sullen sinen woorde niet ongeloouich zijn, ende dye hem liefhebben, sullen zijn woort onderhouden,

19

Die den HERE vreesen, sullen die dingen ondersoecken die hem behaechlijck zijn, ende die hem lief hebben, sullen met zijnder wet veruult worden,

20

Die den HEERE vreesen, sullen haer herten bereyden, ende si sullen haer sielen in zijn aenschouwen heylighen,

21

⁺Die den HEERE vreesen, bewaren zijn gheboden, si sullen lijdsaemheyt hebben tot sinen aenschouwen,

+ D

22

seggende, Ist dat wi gheen wercken des berous en doen, so sullen wy inden handen des HEEREN vallen, ende niet inden handen der menschen,

23

Want nae zijn grootheyt, also is ooc zijn ontfermherticheyt met hem.