De Vorsterman Bijbel

§ Dat .xvi. Capittel.

1

⁺ OM dese dingen ende deser gelijc, so hebben si wel verdiende pijne geleden, ende si zijn door menichte der beesten vernielt

+ A

2

Voor welcke pinen ghi v volck wel beschict hebt, den welcken ghi begeerlicheit hebt gegeuen van leckerder spijsen, nieuwen smake, bereydende hen velthoenderen,

3

op dat si die spijse begheerende, om die dingen die hen ghetoont ende gesonden waren, ooc vander nootdruftiger begheerlicheit, af ghekeert souden worden. Maer dese in corter tijt arm gheworden, hebben nieuwe spise gesmaect,

4

Want het was van noode dat hen sonder onsculdinge die doot ouerquam, die tyransscap oeffenden, maer desen moestmen alleen toonen, hoe haer vianden vernielt werden,

5

Want als hen die wreede gramschap der beesten ouer quam, ⁺ so werden si met den beten der wreeder slangen vernielt

+ Num. xxi.b

6

Maer uwe gramschape en bleef niet eewelijc, maer si werden eenen corten tijt gestoort tot haer berispinge, hebbende een teeken der salicheit, tot ghedenckenisse des gebots uwer wet,

7

Want die bekeert was en wert niet ghesont ghemaect door dat gheene dat hi sach, maer door v salichmaker alre creaturen.

[p. E6v]

8

⁺In dit thoonde ghi uwen vianden, dat ghi die ghene zijt die van allen quaden verlost,

+ B

9

want die beten der sprinchanen, ende der vliegen dooden die, ende daer en is gheen ghesontheit haerder sielen geuonden, want si waren weerdich van dusdanighen vernielt te worden,

10

Maer noch der draken, noch der venijndiger dieren tanden en hebben v kinderen niet verwonnen, maer uwe ontfermherticheit nakende hen, maectse ghesont,

11

Si werden in die gedenckenis uwer redenen verdreuen, ende si werden haestelic gesont gemaect, op dat si niet in een diepe verghetentheyt vallende, uwer hulpen niet en souden moghen gebruyeken, ⁺

+ i.regum .ij.a. Tobi. xiij a.

12

Want cruyt noch plaester en ghenasse oock niet, maer HEERE uwe woort, dat alle dingen ghesont maect.

13

HEERE ghi zijt die de macht des doots ende des leuens hebt, ende ghy leyt totter poorten des doots toe, ende leyt wederom.

14

⁺ Het is wel waer, die mensce doot zijn siele door zijn boesheit, ⁺ ende als die geest wt is gegaen, soo en keert hi niet weder, noch hy en sal die siele niet weder roepen die ontfaen is

+ C

+ Exo. ix.d.

15

Maer het is onmogelic v hant te ontulien,

16

Want die ongodlike die v loochende te kennen zijn door de stercheit uwer hant gegeesselt, si doochden veruolghinge met niewen wateren, ende haghel steenen, ende regene, ende doort viere zijn si verteert,

17

Want dat wonderlijc was, dat viere vermocht meer int water, dat alle dinghen wt blust. Want die werelt is der gherechtiger wrake,

18

Dat viere wert op eenen tijt ghestilt, dat die dieren niet en souden worden verbrant, die totten boosen menschen gesonden waren, maer op dat si dat siende souden weten, dat si mids Gods oordeele veruolginghe lijden.

19

⁺ Ende op een tijt brande dat vier int water aen allen siden: bouen crachte, op dattet die ongherechtige geslachten der aerden soude te niet doen.

+ Exo. xvij d Ioan. vi.d Psal. lxxvij

20

Voor welcke ghi v volc voeydet met bereyde spise der engelen, ende ghi verleendet hen broot vanden hemel, sonder arbeyt, dat alle welluste in hem hadde, ende alle soeticheyt van allen smake.

21

⁺ Want uwe rijcdom ende soeticheit die ghy tot den kinderen hebt, betoonde ghi, ende het was dienende eens yeghelijcs wille, ende waer toe elc wilde, daer toe werdet hi bekeert,

+ D

22

Snee ende ijs gedoochden des viers cracht, ende si en versmolten niet, op dat si souden weten dat dat viere der vianden vruchten bederf, bernende in hagel, ende weerlichtende inden regen.

23

Dat vier verghat ooc weder zijnder cracht, [kolom] op dat die gherechtige souden worden geuoet.

24

Want die creature v haren scepper dienende, onsteect tot pijnen teghen die onrechtueerdige, ende het wert saechter om voor die gene wel te doen die in v betrouwen,

25

Om dyes wille alle dinghen getransfigureert zijnde dienden si der voeyster van allen uwer genaden totten wille der dingen die van v begeert werden

26

op dat v kinderen die ghi HERE lief hadt, weten souden dat der geboorten vruchten die menscen niet en voeden. Maer v woort behout die gene die in v geloouen,

27

Want dat vanden viere niet vernielt en mocht worden, dat wert ter stont van een clynder sonne verwermt, ende versmilte,

28

op dat allen menschen kenlic soude zijn, datmen voor die sonne tot uwer benedictien moet comen, ende v ten opganc des lichts aenbidden,

29

Want die hope des ondancbaren versmilt als herfts ijs, ende sal verghaen als onnut water.