De Vorsterman Bijbel

§ Dauids .ix. Psalm Hooch te singhen vander iuecht des soons. § Confitebor tibi domine

2

⁺ICk sal v HERE ^* belijden) wt alle mijn herten, ende sal alle uwe wonderen vertellen

+ A

* th. dancken.

3

Ick sal my verbliden ende vrolick zijn in v, ende louen uwen name o ghi alderhoochste.

4

Dat ghy omkeert mine vianden achterwaerts. Si sullen ghecrenct worden ende verghaen voor v aensicht.

5

Want ghi hebt mijn recht ende sake voluoert Ghy hebt gheseten op den stoel, dye ^* dye rechtueerdicheyt) oordeelt. [kolom]

* theb. rechtueerdelick

6

⁺Ghi hebt die heydenen berispt, ende die ongodlike verdaen, ghi hebt haren name wtghedaen altoos ende eewelijck, ende van ouderdoms des tijts tot die eewen.

+ B

7

Die sweerden des viants hebben een eynde. Die steden hebt ghi verdoruen, haer gedachtenisse is verghaen met den gheluyt

8

Maer die HERE blijft eewelic, Hi heeft sinen stoel bereyt totten oordeele.

9

Ende hi sal daertrijc in gerechticheyt oordelen, ende die lieden sal hi oordelen in rechtueerdicheyt

10

⁺Ende die HERE is des armen toeulucht geworden, een hulper in nootsakelicheden, ende in bedructen tijt.

+ C

11

Daeromme laetse in v hopen die uwen name kennen, want ghi en verlaet niet, dye v HERE soecken.

12

Looft met sange den HEERE die in Sion woont, Vercondicht onder die luyden zijn doen.

13

Want hi eyschende huer bloet is des gedachtich geweest, Hi en heeft niet vergeten dat roepen der armen.

14

Sijt mi HERE barmhertich, Aensiet mine vernedertheyt onder mijn vianden,

15

Ghi die mi verheft wt die poorten des doots. Op dat ick vertelle allen uwen prijs in die poorten der dochteren Sion,

16

ick sal vrolijc zijn in uwe salicheyt. Die heydenen zijn versoncken in die verderffenisse die si gemaect hebben, hueren voet is geuangen inden stric dien si verborgen hadden.

17

⁺Die HERE sal bekent zijn dat hi recht oordeel doet, die sondaer is gheuanghen inden wercken zijnder handen.

+ D

18

Laet die sondaren in die helle ghekeert worden, alle heydenen die Gods vergheten,

19

Want datmen den armen vergetet, en sal niet dueren totten eynde, die ^* lijdtsaemheyt) der armer en sal ten eynde niet verghaen,

* th. hope

20

⁺HERE staet op, laet die menschen in v niet verstercken: laet alle heydenen voor v aenschijn gheoordeelt worden

+ E

21

HERE settet ouer hen eenen rechter der wedt, dat die heydenen bekennen dat si menschen zijn

22

^+* HEERE waer omme zijt ghy soo verre wech ghegaen? ghy versmaet ons in bequame nootdruft ende in druck,

+ A

* Hier beghinnet int Hebreus den x. Psalm.

23

Als dye ongodlike hem verhoueerdicht, so wort dye arme aengesteken, si worden beuonden in die raden de si dencken.

24

Want die sondaer wort ghepresen in die begeerlicheden zijnder herten, ende die quade wort ghebenedijt,

25

Die sondaer heuet den HEERE tot suerheyt verwect, ende en sal niet vraghen na dye menichte zijnder gramscappen,

26

⁺Gheen God en isser in zijn aensien, zijn weghen zijn in allen tijden besmet.

+ B

[p. Hh4r]

V oordeelen worden afghenomen van sinen aensicht, hi sal heerschappie hebben ouer alle zijn vianden.

27

Want hi heeft gesproken in zijnder herten ic en sal van gheslachte tot ghebuerte niet beroert worden, sonder quaet.

28

Sinen mont is vol vloeckens, bitterheits ende bedrochs, onder zijn tonge is arbeyt ende smerte.

29

Hi sidt in die lagen met den rijcken int heymelic op dat hi den onnooselen soude dooden

30

zijn ooghen aensien den armen. ⁺ Hi leet lagen int verborghen, gelijc eenen leeuwe in zijn hol, Hi leet lagen dat hi den armen soude vaen, ende vaen hem als hi hem nae hem trect.

+ C

31

In sinen stricke sal hi hem verootmoedigen, hi sal hem seluen buygen, ende sal vallen, als hi die arme verheert.

32

Hi heeft geseyt in zijnder herten, God heuet vergeten, hi heeft zijn aensicht afgekeert, op dat hijt int eynde niet en soude sien.

33

Staet op HEERE God, verheft v hant, op dat ghi niet en vergetet der armen.

34

Waeromme heeft die ongodlike God verwect tot toorn? want hi heeft geseyt in zijn herte, hi en salt niet eysschen.

35

⁺Ghi siet immer (want ghi aenscout dien arbeyt ende die pijne) op dat ghise sout leueren in uwen handen, Die arme mensche is v gelaten ghi sult der weesen hulper wesen.

+ D

36

Breket den arm des sondaers, ende des quaetwilligen zijn sonde sal gesocht worden, ende niet gheuonden.

37

Die HERE regneert altoos ende inder eewicheyt der tijden, ghi heydenen sult van sinen lande vergaen.

38

Die HERE hoort dat verlangen der armen haer herten bereyden heeft v oore ghehoort.

39

Dat ghi recht doet den weesen ende ootmoedigen, Dat die mensche niet meer en pijne hem seluen groot te maken opter aerden.