De Vorsterman Bijbel

§ Dat .xxxij. Capittel

1

⁺DOen hielden die drie mannen op Iob te antwoorden, om dat hi hem seluen dochte rechtuaerdich te wesen,

+ A

2

Ende Heliu

[p. Gg7r]

die sone van Baracheel die Busitere vanden gheslachte van Ram, is gram geweest ende veronweerdicht van toorne, want hi was gram tegen Iob, om dat hi seyde dat hi voor God rechtuerdich was,

3

Ende hy was veronweerdicht van toorne teghen zijn vrienden om dat si gheen redelike antwoorde gheuonden en hadden, maer hadden alleen Iob veroordeelt ende verdoemt,

4

Daer om verbeyde Heliu Iob, doen hy sprack om dat si ouder waren die spraken dan hi,

5

Maer als hi sach dat die drie niet en mochten antwoorden, wert hi seer toornich,

6

Ende also antwoorde Heliu die sone Baracheel dye Busitere ende sprack.

Ic ben iongher van iaren, ende ghi zijt ouder, daer omme hebbe ick mijn hooft laten neder hanghen, ende ontsach v mijn gheuoelen te segghen,

7

⁺want ick hoopte dat dye langste ouderdom spreken soude, ende dat die menichte der iaren wijsheyt leeren soude,

+ B

8

Maer soo ick sie, die gheest is in die menschen, ende des almachtighen inblasen geuet verstandenisse,

9

Dye langhe leuen en zijn niet wijs noch die ouden en verstaen dat ordeel niet,

10

Daer omme sal ick spreken, hoort na mi, Ic sal v mine wijsheyt ooc thoonen,

11

want ic hebbe ghebeyt nae uwe redene, Ic hebbe uwe wijsheyt ghehoort, tot dat ghi der redene disputerende een eynde maectet,

12

ende hebbe achte ghehadt op v, so lange als ic meynde dat ghi yet sout seggen, Maer so ick mercke daer en is gheen onder v die Iob straffen mach, oft zijnder reden antwoorde gheuen.

13

⁺Dat ghi messchien niet en segt, wi hebben die wijsheyt gheuonden, dat God hem verstooten heeft, ende gheen mensche

+ C

14

die en heuet mi niet met allen gheseyt, ende ic en sal hem niet na uwer reden antwoorden,

15

Si zijn verzaecht, si en hebben niet meer gheantwoort, si deden dye sprake wech van hem.

16

Want ick dan verbeyt hebbe, Ende si en hebben niet ghesproken, soo staen si stille, ende en antwoorden niet meer,

17

soo sal ick oock mijn deel antwoorden, ⁺ ende sal mijn conste bewijsen,

+ D

18

Want ick ben der reden soo vol, ende den adem in minen buyck benauwet mi,

19

Siet minen buyck is als den most sonder adem ghate, dye de nyeuwe flessen schoort,

20

Ic sal spreken ende een weynich den adem verhalen, Ic sal mine lippen open doen ende antwoorden,

21

Ic en sal nyemants persoon wtnemen, ende en sal God by ghenen mensche gheliken,

22

want ic en weet nyet hoe langhe dat ic [kolom] sal leuen, ende oft mi mijn schepper na eenen corten tijt halen sal.

§ Hoe Heliu seyt, dat God spreect om te onderwijsen, ende straft om ghenadich te wesen.