De Vorsterman Bijbel

§ Dat .xv. Capittel.

1

ENde hi geboot haer (sonder twifel Mardocheus Hesteren) dat si totten coninck in gaen soude, ende voor haer volc, ende voor haer vaderlant bidden,

2

Gedenct (sprac hi) der dagen uwer ootmoedicheyt, hoe ghi in mijn handt opgeuoet zijt want Aman die tweetste naest den coninc heeft tegen ons ghesproken tot die doot,

3

ende aenroept ghi den HERE, ende spreect den coninc voor ons, ende verlost ons vander doot ^* Ende tgene dat hier nae volcht, vont ic ooc in die gemeyne translacie)

* De woorden Ieronymi

4

⁺Opten derden dach leyde si die cleederen haerder vercieringe af, ende si dede haer eere aen,

+ B

5

Ende si blincte met den coninclike gewade, ende si den regeerder ende behouder god van al aengeroepen hadde, so nam si twe maerten,

6

ende op die een stuende si, als van weelden ende grote tederheyt haren lichaem niet mogende dragen,

7

maer dander maerte volchde der vrouwen ende die sleypende cleederen, hielt si op,

8

maer met roden rooseliker verwen ouergote int aensichte, ende met aengenamen ende blinckende oogen bedecte si haere droeuich ghesicht, welck met seer groote vreese beuaen was,

9

Als si aldus alle die doren, deen na den anderen ingegaen was, stont si tegen den coninc, daer hi op zijns rijcs stoel sadt, gecleet met coninclike cleederen, ende blinckende met gout ende costelike gesteenten, ende hi was veruaerlijc aen te sien,

10

⁺Ende doen hi zijn aensicht opgeheuen hadde, ende die verbolgentheyt zijns herten met barnenden ooghen te kennen gegeuen hadde, so viel die coninginne, ende haer verwe wert in bleecheyt verandert, ende si neychde haer metten hooft op haer dienstmaechdeken,

+ C

11

Ende god bekeerde den geest des conincs,

[p. Ff6r]

in saechtmoedicheit, ende haestende ende vreesende, spranc hi van sinen stoele, ende hy onderhieltse met sinen armen, tot datsi tot haer seluen quam ende smeectese met desen woorden.

12

Wat hebdy Hester? Ic ben v broeder, en wilt niet vreezen

13

Ghi en sult niet steruen, Want dese wet en is niet ingeset om uwent wille, maer voor alle dander,

14

⁺daerom coemt herwaerts, ende roert den scepter aen. ⁺

+ D

+ ge .xxxij.b.

15

Ende als si sweech, so nam hi die gulden roede, ende leydese op haeren hals, ende hi custese ende sprac. Waerom en spreect ghi my niet toe?

16

Si antwoorde. Ick sach v heere, als gods engel, ende mijn herte was verscrict van vreesen uwer eeren,

17

Want here ghi zijt alte wonderlijc, ende v aensicht is vol gracien.

18

Ende als si sprac, viel si weder, ende was bi na doot.

19

Ende die coninc verscricte, ende alle zijn dienaers troosteden hem ^* Dit is dwtscrift des briefs des conincs Artaxerxis, welcken hi voor die Ioden tot alle den prouincien zijns rijcs seinde, dwelc ooc int Ebreeusch boec niet en staet).

* De woorden Ieronimi

§ Hoe den brief inhielt den welcken Artaxerxes wtsandt om die Ioden te behouden.