De Vorsterman Bijbel

§ Dat .xv. Capittel.

1

⁺ENde als alle dat heyr Holofernis hoorde, dat Holofernes onthooft was, soo vloot sin ende raet van hen, ende alleen met beuinge ende ontsich bedraeyt, namen si tbehulpe der vluchten,

+ A

2

also dat niemant met sinen naesten en sprac, maer met neder geneychden hoofde, alle dingen achterlatende, haesten si tontgaen den Ebreen, die si hoorden dat gewapent ouer hen quamen, vliende door die wegen der velden, ende die paden der hueuelen.

3

⁺Ende doense die kinderen van Israel sagen vlien, so volchden si hen, Ende si daelden af, blasende met basoenen, ende huylende achter hen

+ B

4

Ende want de Assyrien niet vereenicht, en vluchteden nederwaerts, ende die kinderen van Israel met eender scaren veruolchden, so vercrancten si alle die si mochten vinden,

5

Ende Ozias seynde boden door alle de steden ende lantschappen van Israel,

6

Ende hierom sandt alle tlantschap ende elck stadt, haer wtgecoren gewapende ioncheyt na hen, ende veruolchdense metten scerpten des sweerts tot dat si quamen totten wtersten haerder eynden,

7

Maer die ander die in Bethulien waren, zijn inden heyrlegher der Assiriers gegaen, ende den roof die die Assiriers vluchtende achter gelaten hadden, dien namen si wech, ende zijn zeer geladen,

8

⁺Ende die ghene die den strijdt gewonnen hadden, zijn weder gekeert tot Bethulien, ende si nament al wech, dat hen toebehoorde, alsoo datter geen getal en was van beesten ende van peerden, ende in allen haeren hauelike goeden, also dat si alle vanden minsten totten meesten, rijck werden van haeren beroouingen,

+ C

9

Maer Ioachim die ouerste bisschop van Ierusalem quam tot Behulien, met alle zijn priesters dat hi Iudith soude sien,

10

Die welcke als si tot hem wtgegaen was, hebben sise al gebenedijt, met eender stemmen seggende, Ghi zijt die eere van Ierusalem, ghi zijt die blijschap van Israel, ghi zijt die eerlicheyt ons volcs,

11

⁺want ghi hebt manlijck ghedaen, ende v herte is gesterct, om dat ghi die reynicheyt bemint hebt, ende dat ghi na uwen man geenen anderen geweten en hebt, daerom heuet v die hant des HEEREN gesterct, ende

+ D

[p. Ee8v]

hierom sult ghi gebenedijt zijn inder eewicheyt,

12

Ende allet volck seyde, Dat moet so gheschieden,

13

Ende die roouen van Assyrien en zijn nauwelijck, binnen dertich dagen, vanden volcke van Israel vergadert,

14

Maer alle die dingen diemen heeft beuonden, dat Holefernes eygen waren, die hebben si Iudith gegeuen, in gout ende in siluer, ende cleederen ende costelijcke gesteenten, ende alle huysraet, ende si zijn haer alle ouer gheleuert vanden volcke,

15

Ende alle dat volc verblide, met vrouwen maechden, ende iongelingen, in orgelen ende herpen

§ Hoe Iudith den Heere eenen lofsanck sanck, ende hoe si ghestoruen is.