De Vorsterman Bijbel

§ Dat .vij. Capittel.

1

⁺ENde si zijn ingegaen tot Raguel, ende Raguel heeftse met vruechden ontfaen,

+ A

2

Ende Raguel Tobiam aensiende, seyde tot Annam zijn huysfrouwe, Hoe ghelijck is dese iongelinck mijnder suster sone,

3

Ende doen hi dit geseyt hadde, sprack hi, Van waer zijt ghi ionghelinghen, onse broeders? Si seyden, Wi zijn wt den gheslachte Nephtalim, wt der gheuanckenisse Niniue,

4

Ende Raguel seyde tot hen, Kennet ghi Tobiam mijnen broeder? Si seyden, Wi kennen hem,

5

Ende als hi veel goets van hem sprack, soo seyde die enghel tot Raguelem, Tobias van welcken ghi vraecht, is deses vader,

6

⁺Ende Raguel liet hem neder op sinen hals, ende kustede hem met tranen, Ende weenende op sinen hals,

+ B

7

heeft hi geseyt, Mijn sone, v si gebenedijnghe, want ghi zijt eens goeden ende alderbesten mans sone,

8

Ende Anna zijn huysfrouwe ende Sara zijn dochter weenden.

9

Ende na dat si ghesproken hadden, soo gheboot Raguel eenen ram te dooden, ende een maeltijt te bereyden, Ende doen hise vermaende, dat si hen ter tafelen, totter maeltijt souden setten,

10

soo seyde Tobias, Ic en sal hier huyden niet eten, oft niet drincken, ten si dat ghi mijn begheringhe eerste beuestighet, ende dat ghi mi ghelouet te gheuen Saram v dochtere,

11

⁺Doen Raguel dat woort hadde ghehoort, verschricte hi, want hi wiste, wat dien seuen mannen was ghecomen, die tot haer waren geghaen, ende hi beghonste te vreesen, dat desen ooc messchien desgelijcs soude gebueren, Ende doen hi wanckelde, ende den begheerende geen antwoort en gaf,

+ C

12

so seide die engel tot hem, En wilt niet vreesen hem die te geuen, want desen God vreesende behoort v dochtere tot eender huysfrouwen, Daerom en heeftse gheen ander mogen hebben.

13

Doen seyde Raguel, Ick en twifele niet Godt en heeft mijn gebeden ende tranen in sine teghenwoordicheyt toe ghelaten,

14

⁺Ende ick gelooue, dat hi v daerom tot mi heeft doen comen, dat dese ooc haeren maechschape soude worden toegeuoecht, naer die wet Mosi, ende nv en wilt niet twifelen, dat icse v geuen sal,

+ D

15

Ende hi greep die rechter hant zijnre dochter aen, ende leuerdese der rechter hant Tobie, segghende, God Abraham, ende God Isaac, ende God Iacob, si met v, ende hi voege v te samen, ende veruulle zijn ghebenedijnge in v,

16

Ende nemende eenen brief, hebben si een houwelicse voorwaerde gemaect,

17

Ende hier na hebben [kolom] si ghebrast, ende ghebenediden God,

18

Ende Raguel riep Annam zijn huysfrouwe tot hem, ende geboot haer, dat si eeij ander slaepcamer soude bereyden,

19

Ende leyde Saram haer dochter daer inne, Ende si weende,

20

ende si seyde tot haer, Mijne dochter zijt starck van moet, Die HEERE des hemels geue v vruechde voor dat verdriet, dat ghi gheleden hebt.

§ Hoe Tobias die leuere des visschs brande, ende denghel den Duyuel bandt, ende Tobias ende Sara den HEERE aenbaden, ende tgraf wert geghrauen om hem te begrauen maer si worden leuende gheuonden.