De Vorsterman Bijbel

§ Dat .v. Capittel.

1

⁺DOen antwoorde Tobias sinen vadere, ende seyde. Vader alle die dingen die ghi mi geboden hebt, die sal ic doen,

+ A

2

Maer hoe dat ic dit ghelt sal soecken, en weet ic niet, hi en kent mi niet, ende ic en ken hem niet, Wat [kolom] teeken sal ic hem gheuen? noch ick en heb den wech ooc noyt gheweten, door den welcken men derwaerts reyst,

3

Doen antwoorde hem zijn vader ende seyde, Ic heb tis waer zijn hantscrift bi mi, dwelcke als ghi hem toont, sal hi terstont weder gheuen,

4

Maer gaet nv ende soeckt v eenigen ghetrouwenn man, die met v gae, behouwelijc sinen loon, te wile ic noch leue, op dat ghijt ontfanghet.

5

Doen ghinc Tobias wt, ende vant eenen blinckende iongelinc staende ghescort, ende als bereyt te wandelen,

6

⁺Ende niet wetende dat die enghel des HEEREN was, gruete hem ende seyde. Van waer zijt ghi goede ionghelinck?

+ B

7

Ende hi antwoorde, Wt den kinderen van Israel Ende Tobias seyde tot hem. Weet ghi den wech die tot der Meden lantscap leyt?

8

Den welcken hi antwoorde, Ic weet die, ende ic heb alle zijn wegen dicwils gewandelt, ende ic heb gewoont bi Gabelum onsen broeder, die daer woont in Rages der Meden stat, die daer leet op den berch Egbathanis.

9

Tobias sprac tot hem, Ic bid v verbeyt mi, tot dat ic minen vader dese selue dinghen vercondighe.

10

⁺Doen ginc Tobias in, ende gaf sinen vader alle dese dinghen te kennen, Ouer dwelcke hem die vader verwonderde, ende badt dat hi tot hem in soude gaen.

+ C

11

Ingegaen zijnde, so gruete hi hem, ende seyde. V si altijt bliscap,

12

Ende Tobias sprac, Hoedanige bliscap sal ic hebben, die in duysternissen sitte, ende tlicht des hemels niet en sie?

13

Tot welcken die iongelinc sprac, Sijt sterck van moede, het is seer nae bi, dat ghi van Gode ghenesen sult worden

14

Ende Tobias sprac tot hem. Soudy minen sone niet moghen brenghen tot Gabelum in Rages der Meden stat? Ende als ghi weder coemt sal ic v uwen loon geuen,

15

Ende die enghel seyde tot hem, Ic sal hem leyden, ende weder brengen ghesont tot v.

16

Den welcken Tobias antwoorde, Ic bid v, geeft mi te kennen van wat huyse oft van wat gheslachte ghi zijt?

17

Tot welcken denghel Raphael seyde. Soect ghi tgeslachte des huerlincs, oft den huerlinc selue, dye met dinen sone gae?

18

Maer op dat ic v niet messchien sorchfuldich en make, Ic ben Azarias die sone des grooten Ananie,

19

Ende Tobias antwoorde. Ghi zijt wt eenen groten geslachte, maer ic begheere dat ghi niet gram en wort dat ic v gheslachte heb willen weten.

20

Dye enghel seyde tot hem, Ic sal dinen sone ghesont leyden, ende ic sal hem v ghesont weder brenghen.

21

Tobias antwoorde ende seyde. Wandelt wel, ende God si in uwen wech, ende sinen enghel gae met v inden wech.

[p. Dd8v]

22

⁺Ende doen alle dingen bereyt waren, diemen inden wech soude draghen, so seyde Tobias sinen vader ende zijnder moeder, blijft gesont ende si wandelden beyde tsamen.

+ D

23

Ende als si ghereyst waren, so begonste zijn moeder te weenen ende te segghen. Ghi hebt den stock ons ouderdoms wech genomen, ende hebt hem van ons ghesonden,

24

Och ofte dat ghelt noyt en ware gheweest, daer ghi hem om ghesonden hebt,

25

want onse armoede hadde ons genoech gheweest, dat wi dat voor rijcdommen hadden gherekent, dat wi onsen sone hadden ghesien.

26

Ende Tobias seyde tot haer, En wilt niet weenen, onse sone sal ghesont comen, ende sal weluarende weder keeren tot ons, ende uwe ooghen sullen hem sien,

27

Want ic ghelooue, dat die goede enghel Gods, met hem ouer den wech sal gaen, ende dat hi alle dingen wel sal beschicken, die bi hem ghedaen worden, also dat hi weder met vruechden tot ons sal keeren.

28

Tot dier stemmen hielt zijn moeder op van weenen ende sweech.

[afbeelding]

§ Hoe die engel Tobiam wachte dat den vissche hem niet verslinden en soude, ende leert hem vant herte ende van die leuere, ende van die galle des vischs waer toe dat si nutte zijn, Ende vander bruyloft leert hi.