De Vorsterman Bijbel

[p. Aa5r]

[kolom]

§ Hier beghint dat boeck Nehemie: datmen heet dat tweede boeck Esdre.

§ Hoe Nehemias des conincs Artarxexes schencker voor dat bedructe volck Godt bidt.

§ Dat .i. Capittel.

1

⁺DIt zijn die geschiedenissen Nehemie des soons Helchie. Het geschiede inder maent Casleu des .xx. iaers, ende ick was tot Susis opt slot,

+ A

2

ende tot mi quam Hanani een van mijn broeders, met sommighe mannen wt Iuda, ende ic vraechde hen, hoe dat den Ioden ghinge, die behouden ende ouergebleuen waren vander gheuangenissen, Ende hoe het te Ierusalem ginc,

3

Ende si spraken tot mi, Die ouergebleuene vander geuanghenissen zijn aldaer inden lande in groot verdriet ende laster Die mueren van Ierusalem zijn gebroken, ende haer poorten met vier verbernt,

4

Doen ic sulcke woorden hoorde, sat ic ende weende, ⁺ ende bedreef rouwe veel dagen ende vaste, ende badt voor dat aensichte Gods des hemels,

+ B

5

ende sprac. ^* Ic bid v HERE vanden hemel sterc, grote ende veruaerlike God, die daer hout dat verbont ende ontfermherticheyt den ghenen die v beminnen, ende uwe geboden bewaren

* Dan. ix.a. Nehe. ix.f

6

Laet doch uwe ooren toe luysteren, ende uwe oogen open zijn, dat ghi dat gebet ws knechts hooret, dat ic nv voor v bidde dach ende nacht voor die kinderen Israhel v knechten, ende bekenne die sonden der kinderen van Israel, dye si tegen v gedaen hebben, Ende ic ende mijns vaders huis hebben ooc gesondicht,

7

Wi zijn verleyt geworden vander ydelheit, ende en hebben niet ghehouden v geboden, ⁺ zeden, ende rechten, die ghi geboden hebt uwen knecht Moysi,

+ C

8

Maer ghedenct doch des woorts dat ghi uwen knecht Moysi gheboot ende spraect, Als ghi ouerghetreden sult hebben, soo wil ic v onder dat volc stroeyen,

9

Maer ist dat ghi v bekeert tot mi, ende houdet mine gheboden, ende doetse, ende al waert ghi verstoten tot aen dat eynde des hemels, so sal ic v nochtans van daer vergaderen, ende wil v brengen totter plaetsen die ic vercoren hebbe, dat mijnen naem aldaer soude woonen,

10

Het zijn doch immer uwe knechten, ende v volc die ghi verlost hebt, door uwe groote crachte ende machtige hant,

11

Och HEERE ic bidde v, ⁺ laet uwe ooren aenmercken dat ghebet dijns knechts, ende dat gebet uwer knechten, dye daer begheeren uwen naem te vreesen, ende latet uwen knecht huyden ghelucken, ende geeft hem ontfermherticheyt voor desen man, Want ic was des conincs scincker

+ D

[p. Aa5v]

§ Hoe Neemias vanden coninck Artarxerxen brieuen verwerfde, ende in Ierusalem quam ende haer mueren op maecte.