De Vorsterman Bijbel

§ Dat .xix. Capittel

1

⁺MAer Iosaphat die coninc van Iuda quam weder thuys met vreden te Ierusalem,

+ A

2

Ende Iehu Hanans sone, dye siender ginc wt hem te gemoete ende sprac totten coninc Iosaphat Soudi den ongodliken helpen, ende vrientschap maken met die ghene die den HEERE haten? ende om dies wille hebdi verdient des HEREN gramschap,

3

Maer doch so is wat goets aen v geuonden, dat ghi die boschkens hebt wt geueecht wten lande, ende hebt v herte ghestelt God te soecken.

4

⁺Alsoo bleef Iosaphat te Ierusalem. ⁺ Ende hi trock wederom wt onder dat volc, van Bersabee aen, tot opt geberchte van Ephraim, ende brachtse weder totten HEERE haerder vaderen God,

+ B

+ Gene. i. Roma. ij.b.

5

Ende hi stelde rechters inden lande, in alle vaste steden van Iuda, in elcke stadt sommige,

6

Ende sprack totten rechteren, Siet toe wat ghi doet, Want ghi en hout dat oordeel ^* der menschen) niet, maer ^* des HEREN, Ende wat ghi qualijcken oordeelt dat sal ouer v comen)

* th. den menschen

* th. den Heere, ende hy is met v int oordeel.

7

Daeromme laet die vreese des HEEREN bi v zijn, ende wat ghy doet, dat doet met neersticheyt, Want bi den [kolom] HEERE onsen God en is gheen onrecht, ⁺ noch aensien der persoonen, noch aennemen der ghiften.

+ Roma. ij.b. Int werck der apo. x.f

8

Ooc stelde Iosaphat te Ierusalem wten Leuiten ende priesteren, ⁺ ende wten ouersten vaderen onder Israel ouer dat ordeel des HEREN, ende ouer die saken, ende lietse te Ierusalem woonen,

+ C

9

ende geboot hen, seggende. Doet also inder vreesen des HEREN inden gelooue, ende met rechter herten

10

in alle saken die tot v comen van uwen broederen, die in haer steden woonen tusschen bloet ende bloet, Waer dat twist is vander wet ende vanden gheboden ende vanden ^* cerimonien ende rechtuaerdichmakingen) suldise onderwijsen, dat si hen niet en besondigen aenden HERE, ende gheen gramscap ouer v ende uwe broeders en come, Doet ghy alsoo, soo en suldi v niet besondigen.

* theb. zeden ende rechten.

11

⁺Maer Amarias die priester ende v bisscop sal die ouerste rechter onder v zijn in alle saken die God aengaen, Maer Sabadias Ismaels sone vorste inden huyse van Iuda sal zijn in alle saken die tot des conincs dienst behooren, ende ghi hebt officiers die leuiten voor v, Sijt vroom, ende wort sterc, ende doet dat naerstelic, ende de HERE sal metten goeden zijn

+ D

§ Van Ammons ende Moabs kinderen, Ende hoe Seir tegen Iosaphat vergaderde, Ende hoe Iosaphats mannen malcanderen sloegen, Ende hoe Iosaphat ghestraft wert om tverbont met Ochosia den coninc van Israel