De Vorsterman Bijbel

§ Dat .x. Capttel

1

⁺MAer die Philistinen streden tegen Israel, ⁺ Ende dye kinderen van Israel vluchteden voor die Philistinen, ende dye verslaghene vielen ghewont, opten berch Gelboe,

+ A

+ i.reg. xxxi.

2

Maer als die Philistinen genaecten Israel veruolghende Saul ende zijn sonen, so sloegen si Ionathan, Aminadab, ende Melchisue Sauls sonen,

3

Ende den strijdt wert hert teghen Saul, Ende die bogen scutters vonden hem, ende wondeden hem met gescutte.

4

Doen sprac Saul tot sinen wapendrager, Trect v swaert wt ende doodet mi daer mede, op dat messchien dese onbesneden niet

[p. z8r]

en comen, ende met mi spotten, Maer sine wapendragher en wildet niet doen, want hi ontsachs hem zeer, Doen nam Saul zijn sweert ende viel daer inne,

5

Doen dat zijn wapendragher sach, dat Saul doot was, viel hi ooc op zijn sweert ende sterf.

6

⁺Also sterf Saul ende zijn drie sonen, ende zijn gheheele huys te samen.

+ B

7

Doen die mannen van Israel die inden gronde woonden saghen ^*) dat Saul ende zijn sonen doot waren verlieten si haer steden ende vluchten, ende zijn hier ende daer verstroyet, Ende die Philistinen quamen ende woonden daer inne.

* theb. dat si gheulucht waren ende

8

Des anderen daechs als die Philistinen quamen, om den verslagenen die cleederen wt te trecken, so vonden si Saul ende zijn sonen liggen op den berch Gelboe,

9

Ende als si hem berooft hadden, ende zijn hooft af gesneden, ende zijn wapenen, ⁺ sonden zijt in der Philistinen lant om datment om dragen soude, ende lietent vercondigen voor haer afgoden ende den volcke.

+ C

10

Ende stelden zijn wapenen int huys haers gods ende zijn hooft schele vestichten si aen Dagons tempel.

11

Doen nv alle die mannen die tot Iabes in Galaad woonden, hoorden alle dat die Philistinen Saul ghedaen hadden,

12

maecten hen al die strijdtbaer mannen op, ende namen Sauls lichaem, ende zijnder sonen, ende brachtense tot Iabes, ende begroeuen haer gebeenten onder die eycke, tot Iabes, ende vasteden seuen daghen.

13

⁺Also sterf Saul om zijnder misdaet, dat hi des HEREN gebot ouertreden hadde, dat hi hem beuolen hadde, ☞ ende en hadde dat niet bewaert, Ooc daer en bouen, dat hi der waersegster raet vraechde,

+ D

14

ende en hoepte inden HERE niet, daerom doode hi hem ende keerde dat conincrijck tot Dauid Isai sone.

§ Hoe dauid Coninc ghesalft wert in Hebron, vanden Iebusiten, Van Dauids dertich alderstercste ridderen, Ende vander macht ende strenghicheyt zijnder princen ende ouersten