De Vorsterman Bijbel

§ Dat .xxv. Capittel.

1

⁺ENde tgeuiel int negenste iaer zijns conincrijcks opten .x. dach der thiender maent dat Nabuchodonosor de coninc van Babilonien ende alle zijn heyr te Ierusalem quam, ⁺ ende si legerden hen daer tegen, ende timmerde bolwercken rontsomme die stadt,

+ A

+ Ie. xxxix.a ende .lij.a

2

Ende die stadt was belegert tot int elfste iaer des conincs Zedechie.

3

Maer inden negensten dach der maent wert den honger sterc in die stadt, also dat dat volck des lants niet teten en hadde.

4

Ende die stadt wert gebroken, ende al die crijsmannen vluchteden bider nacht door den wech vander poorten, tusschen die twee mueren die tot des conincs hof gaet, Maer die Chaldeen lagen om die stadt.

⁺ Ende Sedechias vloot daerom door den wech totten vlacken velde der woestinen,

+ B

5

Maer theyr vanden Chaldeen veruolchde den coninc, ende vingen hem int vlac velt tot Iericho, ende die oorloochs luyden die bi hem waren, die werden van hem verstroeyt,

6

ende si grepen den coninc, ende leyden hem op totten coninc van Babilonien te Reblatha, Ende ^* hi sprack) met hem van rechte

* the. si spraken

7

Ende hi ^* doode) Zedechie kinderen voor zijn oogen, ende Zedechias oogen ^* groefde hi wt, ende bondt hem met ketenen, ende leide) hem tot Babilonien.

* the. si doodeden

* the. blindeden si ende bonden hem met ketenen leyden

8

Inden seuensten dage der vijfster maent, dat is dnegentienste iaer des conincs van Babilonien quam NabusarAdan

[p. z3r]

die ^* velthooftman des heyrs,) een dienaer van den coninck van Babilonien tot Ierusalem,

* theb. hoofmeester

9

ende verbrande dat huys des HEEREN, ende dat huys des conincs, ende al die huysen te Ierusalem, ende al de groote huysen verbrande hi metten viere,

10

Ende dat geheele heyr der Caldeen dat metten hoefmeester was brac die mueren rontsomme Ierusalem,

11

Maer dat ander volc dat in die stadt ghebleuen was, ende die totten coninck van Babilonien vielen, ende dat ander ghemeyne volck voerde Nabusar Adan die hoefmeester wech,

12

Ende vanden alderslechsten vanden lande, liet die hoefmeester wijngardeniers ende ackerluyden.

13

Maer die metalen calomnen die inden tempel des HEEREN waren, ende die stuenselen, ende die metalen zee, dye inden huyse des HEEREN was, braken die Chaldeen ende voerden dat metael te Babilonien,

14

ende die metalen potten, die schuppen, messen, lepelen, ende alle metalen vaten, daermen mede diende, namen si wech,

15

⁺Daer toe nam die hoefmeester die ^* wieroock vaten,) ende die beckens, ende al wat gulden oft silueren was,

+ D

* th. pannen

16

twee calomnen, een zee, ende die stuenselen die Salomon ghemaect hadde totten huyse des HEEREN, Dat metael en was niet te weghen van allen dese vaten.

17

Een calomne was achtien ellen hooch, ende haeren knoop daer op, die was oock metalen, ende drie ellen hooch, ende dat verheuen wert, ende die granaet appelen aenden knoope rontsomme waren al metalen, Op dye maniere was ooc die andere calomne, met den verheuen wercke.

18

⁺Ende die hoefmeester nam den priester Seraia vander eerster oorden, ende den priester Sephania, vander anderder oordene, ende drie duerwachters,

+ E

19

ende eenen camerlinck wt der stadt, die gheset was ouer die oorloochs mannen, Ende ooc vijf mannen die ghestadelijcken voor den coninc waren, die inder stat gheuonden werden, ende Sopher die velt hooftman die dat volc inden lande leerde oorloghen, Ende noch tsestich mannen vanden volcke vanden lande die inden steden gheuonden werden,

20

dese nam Nabusar Adan dye hoefmeester, ende hy brachtse totten coninck van Babilonien, te Riblath,

21

Ende die coninc van Babilonien die sloechse doot, tot Riblath inden lande Hemath, Alsoo wert Iuda wech gheuoert wt zijn eyghen lant.

22

Maer ouer dat ouergebleuen volc inden [kolom] lande Iuda dat Nabuchodonosor de coninc van Babilonien ouer liet, sette hy Godaliam Ahikam sone des soons Saphan.

23

Doen nv alle des crijschuolcs hooftluyden si ende die mannen hoorden, ⁺ dat die coninck van Babilonien Godoliam gheset hadde, quamen si tot Godoliam te Maspha, te wetene, Ismael Nathania sone, ende Iohannan Karea sone, ende Sarias Tanhumeth sone die Netophatijt, ende Iasanias Machathi sone met haeren mannen,

+ F

24

Ende Godolia swoer hen, ende haeren mannen, ende sprack tot hen En ontsiet v niet den Chaldeen onderdanich te zijn, ende blijft int lant, ende zijt den coninck van Babilonien onderdanich, soo salt v wel ghaen.

25

Ende het is geschiet inder seuenster maent dat Ismael Nathanie sone, ⁺ des soons Elisama vanden coninclijcken geslachte quam, ende thien mannen met hem, ende si sloeghen Godoliam doot, daer toe die Ioden ende Chaldeen die bi hem waren te Maspha.

+ G

26

Doen stont alle dat volc op, beyde cleyn ende groot, ende douerste des oorloochs, ende quamen in Egypten, want si vreesden die Chaldeen.

27

Maer het is gheschiet inden seuenendertichsten iaer, na dat Ioachim die coninc van Iuda wechgheleyt was inden seuenentwintichsten dach der twaelfster maent, hief Euil Merodach die coninc tot Babilonien inden eersten iaer zijns conincrijcs, dat hooft Ioachim des conincs van Iuda wt den kercker,

28

ende sprac vriendelijck met hem, ende hi settede sinen stoel bouen den coninclijcken stoel der coninghen die bi hem waren te Babilonien,

29

ende veranderde die cleederen zijnder gheuanckenissen die hy inden kercker ghehadt hadde. Ende hi adt altoos voor hem zijn leefdaghe lanck voor sinen aensichte,

30

ende sette hem zijn deel datmen hem altoos ghaf vanden coninck, op elcken dach, zijn gheheel leuen lanck.

§ Hier eyndt dat vierde boeck der Coninghen .iiij.Regum dat tweede boeck der Coningen int Hebreus.