De Vorsterman Bijbel

[p. t6r]

[kolom]

§ Hier beghint dat derde boec der Coninghen .iij.Regum int Latijn.

§ Van Dauids ouderdom, ende van Abisag van Sumen, die den Coninc diende, ende bi hem sliep, nochtans die Coninc en bekendese niet, Ende van Adonias die Coninc wilde zijn

§ Dat eerste. Capittel.

1

⁺ENde die Coninc Dauid was out geworden, ende hadde veel daghen des ouderdoms, ende als hy met cleederen ouerdect was, soo en wert hi niet verwarmt.

+ A

2

Doen spraken sine knechten tot hem. Laet ons minen Heere den coninc een ionghe maget soecken, die voor den coninc stae, ende hem hantere, ende slape in sinen schoot, ende verwarme minen Heere den coninc.

3

Ende si sochten een schoon deerne in allen den palen van Israhel, ende vonden Abisag van Sunem, ende brachtense totten coninck.

4

Ende si was een seer schoon meysken, ende si sliep biden Coninc, ende diende hem, Maer dye coninck en bekendese niet.

5

⁺Maer Idonias dye sone Hagith verhief hem ende sprac. Ic sal Coninc worden, ende maecte voor hem seluen eenen wagen, ende rosuolc, ende vijftich mannen tot lackeyen dye voor hem henen souden loopen,

+ B

6

ende zijn vader en ^* berispede) hem noch niet daerom, dat hi hadde geseyt waerom doet ghi also? Want hy was ooc seer schoon, die tweede geboren na absalom,

* the. becommerde

7

ende zijn woorden waren bi Ioab den sone Saruie, ende bi Abiathar den priester, die holpen die bende van Adonia.

8

Maer Sadoch dye priester ende Banaias die sone Ioiada, ende Nathan dye prophete, ende Semei, ende Chereti, ende Pheleti, ende die vromen des heyrs Dauids en waren met Adonia niet.

9

Ende doen Adonia rammen ende kalueren ende gemeste vee offerde bi den steen Sohelet, die neffens die fonteyne Rogel leghet, ⁺ noodede hi alle sine broeders des coniucs sonen, ende alle dye mannen van Iuda des conincs knechten.

+ C

10

Maer den prophete Nathan ende Banaia, ende dye vromen, ende Salomon sinen broeder en noode hi niet.

11

So sprack Nathan tot Betsabee Salomons moeder, en hebt ghy niet ghehoort, dat Adonia die sone Agith Coninc is gheworden, ende onse Heere Dauid en weet daer nyet af?

12

Dus coemt nv, ende neemt raet van my, ende bewaert v siele, ende die siele van uwen sone Salomon,

13

Gaet henen, ende gaet in totten Coninc Dauid, ende spreect met hem. Mine heere Coninc, en hebbet ghy uwer maerten niet ghesworen, ende ghesproken, dat v sone Salomon na mi coninc zijn sal, ende hy sal op

[p. t6v]

minen stoele sitten? waerom is dan Adonias coninc geworden? ende regneert nv.

14

Ende als ghi daer noch zijt, ende metten coninc spreect, so sal ic na v in comen, ende uwe woorden volcomelick wtspreken.

15

⁺Ende Bethsabee ghinc totten coninc, in die slaepcamer, ende die coninc was seer out, ende Abisagag van Sunem diende den Coninck

+ C

16

Betsabee nijchde haer, ende aenbadt den Coninc. Die coninc sprac. Wat wildi voor v?

17

Si antwoorde, ende sprac tot hem. Mijn HERE, ghi hebt uwer maerte, bi den HERE uwen God ghesworen, uwe sone Salomon sal Coninc zijn na mi, ende op minen stoel sitten.

18

Maer nv siet Adonias is coninc geworden, ende ghi mijn heere coninc en weet daer niet af.

19

Hi heuet ossen ende ghemeste vee, ende vele scapen geoffert, ende heeft genoot alle des conincs sonen, daer toe AbIathar den priester, ende Ioab den velthooftman. Maer uwen knecht Salomon en heeft hi niet ghenoot.

20

Maer mijn heere Coninc, die ooghen des geheels Israel sien op v, dat ghi hen te kennen gheuet, wie opten stoel mijns heeren des conincx na hem sitten sal.

21

Ende tsal ghescieden als mijn heere die coninc met sinen vaderen slapen sal so sullen ic ende mijne sone Salomon sondaers zijn.

22

Als si noch sprack metten Coninc, quam die propheet Nathan.

23

Ende si bootscaptent den coninc, segghende. Nathan dye propheet is hier tegenwoordich. Ende als hi in voor den coninc quam, aenbede hi den coninc op zijn aensicht ter aerden ende sprac.

24

Mijn heere Coninc hebdi gheseyt, Adonias sal na mi coninc zijn, ende hi sal op minen stoel sitten?

25

Want hi is huyden afgegaen, ende heeft ossen geoffert, ende ghemest vee, ende veel scapen, ende heeft alle des conincs sonen genoot, ende de hooftluyden, daer toe den priester AbIathar Ende siet, si eten ende drincken voor hem ende seggen. Adonias die Coninc moet leuen.

26

Maer mi uwen knecht ende Zadoch den prister, ende Banaia, den sone Ioiada, ende uwen knecht Salomon en heeft hi niet ghenoot.

27

Is dat woort van minen heere den Coninc beuolen, ende heuet sinen knecht niet laten weten, wie opten stoel mijns heeren des Conincks nae hem sitten sal?

28

⁺Die Coninc Dauid antwoorde ende sprac, Roept mi Betsabee, ende si quam voor den Coninc, ende doen si voor den Coninc stont,

+ D

29

swoer die Coninc ende sprac. So warachtelic als die HEERE leeft, die mine siele verlost heeft wt alder noot,

30

ic sal huyden doen so ic v gesworen hebbe, bi den HERE den God van Isra-[kolom]el, ende gesproken dat Salomon v sone na my Coninc sal zijn, ende hi sal op minen stoel sitten voor mi.

31

Doen nijchde haer Betsabee met haeren aensichte ter aerden, ende aenbede den Coninc, ende sprac. Mine heere die Coninck Dauid moet eewelic leuen.

32

⁺Ende die coninc sprac. Roept mi den priester Zadoch, ende den prophete Nathan, ende Banaia die sone Ioiada, ende doen si in quamen voor den coninc,

+ E

33

so sprac die Coninc tot hen, Neemt met v ws heeren knechten, ende set minen sone Salomon op minen muyl, ende leyt hem af tot Gihon,

34

ende die priester Zadoch metten prophete Nathan salue hem daer tot eenen Coninc ouer Israel, ende blaest metter basoenen, ende segt. Die Coninc Salomon leue,

35

ende trect hem na opwaerts, ende coemt ^* te Ierusalem) so sal hi sitten op minen stoel, ende Coninc zijn voor mi, ende ic sal hem ghebieden dat hi vorste si ouer Israel ende Iuda.

* Ten is niet int he.

36

Doe antwoorde Banaia die sone Ioiada den Coninck ende sprac, Amen, Die HERE die God mijns heeren des Conincs segge ooc also.

37

So dye HERE met minen here den Coninc geweest is, so si hi ooc met Salomon, op dat sinen stoel hoogher worde, dan den stoel mijns heeren des Conincs Dauids.

38

Doen gingen neder dye priester Sadoch, ende die propheet Nathan, ende Banaias die sone Ioiade, ende Chereti ende Pheleti, ende setteden Salomon op Dauids des Conincs muyl, ende leyden hem tot Gihon.

39

⁺Ende dye priester Sadoch nam den oly hoorn wt den tabernacule, ende salfde Salomon, ende si bliesen metter basoenen, ende allet volc sprac, Die Coninc Salomon leue.

+ F

40

Ende allet gemeyn volck clam opwaerts hem nae, ende dat volck pepe met pipen, ende was seer vrolic, also dat dye aerde van haeren geroepe gheluyt gaf.

41

Ende Adonias hoorde dat, ende alle die hi genoot hadde die bi hem waren, ende die maeltijt was nv geeyndt. Ende doen Ioab der basoenen gheluyt hoorde, so sprac hi. Wat wil dat geroepe der stadt, ende dat ghetuymel?

42

Doen hi noch sprac, siet, doen quam Ionathas die sone Abiathar des priesters. Ende Adonias sprac tot hem. Coemt in, want ghi zijt een sterck man, ende brengt goede bootscap.

43

Ionathas antwoorde, ende sprac tot Adoniam.

Ten is niet also in gheender manieren. Want onse heere die Coninc Dauid heeft Salomon tot eenen Coninc gemaect,

44

ende heeft den priester Sadoch ende den propheet Nathan gesonden ende Banaias den sone Ioiada, ende Chereti, ende Pheleti, ende si hebben hem op sconincs muyl

[p. t7r]

geset,

45

ende Zadoch die priester met den propheten Nathan heeft hem ghesalft tot eenen coninc te Gihon, ende zijn van daer op getrocken met vruechden, dat die stadt in rueren is, dat is dat ghi gehoort hebt,

46

Daer toe sidt Salomon opten conincliken stoel,

47

ende des conincs knechten zijn inne gegaen, om onsen Heer den coninc Dauid te gebenedien, ende hebben geseyt, V God make Salomon meerderen name dan uwen name is, ende make sinen conincliken stoel grooter dan uwen conincliken stoel, ende ^* Dauid die coninc heeft op zijn beddeken aengebeden)

* th. hebben den coninc aengebeden

48

ende hieren bouen heeft die coninck also geseyt, Geloeft si die HERE die God van Israel, die huyden eenen op minen stoel gegeuen heeft te sitten, dattet mijn ooghen ghesien hebben.

49

⁺Doen verscricten ende stonden op alle die bi Adonia ghenoot waren ende ginghen henen, elck sinen wech,

+ G

50

Maer Adonias vreesde hem voor Salomon, ende stondt op, ende ginc henen inden tabernakel des HEEREN, ende vaettede die hoornen des outaers,

51

Ende twert Salomon gebootscapt, Siet, Adonia vreest den coninc, ende hi vaettet die hoornen des outaers, ende seydet, Die coninc Salomon swere mi huyden dat hi sinen knecht niet dooden en sal metten swaerde,

52

Ende Salomon sprac Is hi een goet man, so en sal gheen har van hem opter aerden vallen, maer wort quaet aen hem gheuonden, so sal hi steruen,

53

Ende dye coninc Salomon sant henen, ende liet hem vanden outaer halen. Ende doen hi inquam, aenbadt hi den coninc Salomon, Ende Salomon die coninc sprack tot hem, Ghaet in v huys.

§ Hoe Dauid sinen sone Salomon veel geboden gaf, Hoe Adonias gedoot wert, om dat hi begeerde Abisag van Suna, Ende hoe Abiathar van tpriesterschap wert geworpen