De Vorsterman Bijbel

§ Dat .xi. Capittel.

1

⁺ENde het is gheschiet doen dat iaer om quam, inder tijt als die coninghen plegen wt te trecken ten oorloge om te strijden, soo sandt Dauid Ioab ende sine knechten met hem, ende alle die kinderen van Israel, ende si hebben die kinderen van Ammon verwoest, ende beleyden Rabba, maer Dauid bleef te Ierusalem

+ A

2

Als dese dingen geschieden, soo ist bi geual ghebuert, dat Dauid op eenen dach op stont naden middach van sinen bedde, ende wandelde op den solder des coninclijcs huys, ende sach vanden solder een vrouwe haer was-

[p. s6r]

scen, Ende dat wijf was zeer schoone, ^*)

* th. van gedaente

3

Ende Dauid sandt ende dede vragen wat vrouwe dattet was, ^* Ende hem is ghebootschapt, dat was) Betsabea, die dochter van Eliam, die huysfrouwe, Vrie des Hethithers,

* th. Ende seggen, Is dat niet

4

Ende Dauid sandt, ende heeftse doen halen, Ende als si tot hem ingheghaen was, soo sliep hi by haer, Ende ter stont is si geheylicht van haerder onsuyuerheyt,

5

ende si is in haer huys wederom gheghaen. Nv doen si een vrucht ontfanghen hadde, sandt si, ende liet Dauidi vercondigen ende seggen, Ick ben beurucht.

6

Dauid sandt tot Ioab, segghende, Seyndt mi Vriam den Hethiter, Ende Ioab sandt Vriam tot Dauid.

7

Ende Vrias quam tot Dauid, ende Dauid vraechde hem, hoe dat metten volcke, ende Ioab stonde, ende hoemen doorloghe voerde.

8

Ende Dauid sprac tot Vriam, Ghaet neder in v huys, ende wascht uwe voeten. Ende Vrias is geghaen wt sconincs huys, ende hem volchde coninclijcke spise.

9

Ende Vrias leyde hem slapen voor die poorte des conincks huys, daer alle die knechten zijns heeren lagen, ende en ghinck niet neder tot zijn huys.

10

Ende tis Dauid ghebootschapt, van die hem seyden, ⁺ Vrias en is niet neder in zijn huis ghegaen, ☞ So sprac Dauid tot hem, En sidy niet vanden weghe ghecomen? Waerom en sidy niet af in v huys gegaen?

+ B

11

Vrias sprac tot Dauid, Die Arcke Gods, ende Israel bliuen in tenten, ende Ioab mijn heere ende mijns heeren knechten liggen te velde, ende soude ic in mijn huys gaen, om te eten ende te drincken ende bi mijn huysfrouwe slapen? Bi v salicheyt ende bi die salicheyt mijnder zielen, ick en sal dusdanigen dinc niet doen,

12

Hierom sprac Dauid tot Vriam, So blijft huyden ooc hier, morghen vroech sal ic v laten gaen, Aldus bleef Vrias te Ierusalem dien dach, ⁺ ende sanderdaechs daer toe,

+ Iudi. ix.c.

13

⁺Ende Dauid noode hem, dat hi bi hem soude eten ende drincken, ☞ ende maecte hem droncken, Ende tsauonts ghinc hi wt ende sliep op zijn bedde met zijns heeren knechten, ende en ghinc niet neder tot zijn huys.

+ C

14

Ende tis ghebuert dat Dauid tsmorghens eenen brief schreef, tot Ioab, ende sandt dien door Vriam,

15

Hi screef aldus inden brief, ☞ Stelt Vriam inden strijt daer die alderhartste is, ende keert v achter hem af, dat hi verslaghen worde, ende sterue.

16

Als nv Ioab die stadt belach, so stelde hi Vriam aen die plaetse, daer hi wist dat dalder stercste mannen waren,

17

Ende doen die mannen wt der stadt gegaen zijn, ende streden tegen Ioab, so vielen sommighe des volcks van Dauids knechten, Ende Vrias de Hethiter sterf oock.

18

Doen sandt Ioab henen ende dede Dauid [kolom] bootschappen alle die handelinge des strijts

19

ende gheboot den bode ende sprack, Als ghi alle die handelinghe des strijts wt ghesproken hebt metten coninck,

20

Ende siet dat hi toornich daerom is, ende die coninc tot v spreect, Waer om sidy so na des stadt mueren gegaen om te striden? En wist ghi niet hoemen vander mueren plach veel geschuts te schieten?

21

Wie sloech Abimelech Ierobaals sone? En wierp niet een wijf, een stuc van eenen molensteen op hem vander mueren, ende doode hem tot Thebez? Waeromme hebdy v so na der mueren ghemaect? so suldy seggen, Vwe knecht Vrias die Hethiter is oock doot.

22

⁺Die bode ghinc henen, ende quam ende bootschaptet Dauid al, daer hem Ioab om ghesonden hadde,

+ D

23

Ende die bode sprac tot Dauid Die mannen namen douerhant tegen ons, ende quamen tot ons wt opt velt, Ende wi waren aen hen gheuallen met een ghedruyssche, ende veruolchdense tot voor de duere der poorten,

24

Ende die schutters schoten vander mueren geschutte op uwe knechten, ende daer isser somige doot gebleuen, daer toe so is Vrias die Hethiter v knecht oock doot.

25

Dauid sprac totten bode, Aldus suldy tot Ioab seggen, En laet v dat niet qualijc beuallen, Want den wtghanck des oorloochs is verscheyden, ende tswaert verslindt nv desen, nv den ghenen, Versterct die strdijtbarighe mannen teghen die stadt, dat ghise verderft, ende vermaentse, om cloeckelijcken te vechten,

26

Ende doen Vrias wijf hoorde, dat Vrias haer man doot was, droech si rouwe om haeren man, ende beweenden,

27

Maer doen dat roudragen ende beweenen volbracht was so sandt Dauid henen, ende dedese in zijn huys halen, ende si wert zijn wijf, ende baerde hem eenen sone. Maer dat woort dat Dauid gedaen hadde, behaechde den HEERE qualijck.

[afbeelding]

§ Hoe die propheet Nathan, Dauid zijn sonden thoonde, door die gelijckenis van eens armen mans schaep, dat die rijcke doode sparende zijn eygen schapen.