De Vorsterman Bijbel

§ Dat .vi. Capittel.

1

⁺ENde Dauid vergaderde weder al die ionge wtuercoren mannen van Israel, drie duysent,

+ A

2

ende hi stont op, ende ghinc henen, met alle den volck dat bi hem was, wt den borgeren van Iuda, dat hi die arcke Gods van daer op soude halen, ^* van die welcke aengheroepen wort) Die naem des HEEREN der heyrscharen woonende daer op ouer die Cherubim,

* the. wiens naem heet

3

Ende si stelden die Arcke Gods, om te voeren, op eenen nieuwen wagen, ende haeldense wt den huyse ^* Aminadab) die tot Gabaa woonde ^* Osa) ende Haio die sonen Aminadab dreuen den nieuwen wagen,

* th. Abinadab,

* thebr. Vsa

4

Ende doen si hem metter Arcken wt den huyse Aminadab voerden die tot Gabaa woonde, Ende Haio ghinck voor die Arcke,

5

Ende Dauid speelde, ende dat geheele huys van Israel voor den HEERE henen, met alderhande snaren spel van dennen houte, met harpen ende psalteren, ende tamboeren, ende schellen ende cymbalen.

6

⁺Ende doen si quamen totten scueruloer Nachor, soo greep Osa toe ende hielt die Arcke Gods, want die runderen traden besiden wt,

+ B

7

Doen verbolch des HEEREN gramschap ouer Osa, ende hi sloech hem aldaer, om zijnder vermetentheyts wille, also dat hi daer sterf bi die Arcke Gods,

8

Doen wert Dauid bedroeft, om dat die HEERE Osa also geslagen hadde, Ende hiet die selue plaetse die ^* verslaghinghe Osa) tot op desen dach,

* the. PeresVsa,

9

Ende [kolom] Dauid vreesde den HEERE in dien dage ende sprac, Hoe soude darcke des HEEREN tot mi gecomen?

10

Ende en wildese niet tot hem laten brengen in Dauids stadt, maer lietse brenghen int huys Obed Edon des Gethiters,

11

Ende doen darcke des HEEREN drie maenden bleef int huis Obed Edoms des Gethiters gebenedide hem die HEERE ende al zijn huys.

12

⁺Ende het wert den coninck Dauid ghebootschapt, dat die HEERE thuys Obed Edom gebenedide, ende al wat hi hadde, om der arcken Gods wille, ^* Ende Dauid seyde, Ick sal gaen ende wederom brengen die arcke Gods met de gebenedijnge in mijn huis) Doen ginc hi henen, ende haelde darcke Gods, wt den huyse Obed Edom opwaerts, in die stadt Dauid met vruechden,

+ C

* ten is niet int hebree.

13

Ende als si voort gheghaen waren die die Arcke des HEEREN droeghen, ses ghangen, offerdemen eenen osse, ende ^* eenen ram,)

* th. een vet schaep

14

Ende Dauid ^* speelde ap orgelen diemen op die schouderen veste, ende) danste met alder macht voor den HEERE, ende was geghort met eenen heyligen lijnen lijfrock,

* ten is niet int hebree.

15

Ende Dauid met tgheheel huys van Israel leyden darcke des HEEREN op met tgheluyt van trompetten ende basoenen.

16

Ende doen die Arcke des HEEREN in Dauids stadt gecomen was, keeck Michal Sauls dochter, ⁺ door die venster, ende sach den coninck Dauid springhen ende dansen voor den HEERE, ende verachte hem in haerder herten,

+ D

17

Ende si hebben die arcke des HEEREN ingebrocht, ende die ghestelt op haer plaetse, midden inden tabernakule, dien Dauid voor haer op hadde geslagen, Ende Dauid offerde brantoffer ende vreedsaem offer voor den HEERE,

18

Ende doen Dauid volbracht hadde den brantoffer ende den vreedsamen offer, ghebenedide hi dat volck inden name des HEEREN der heyrscharen,

19

ende deylde wt alle den volcke, ende der menichte van Israel den mannen ende vrouwen, elc, eenen brootkoec, ende een stuc gebraden ossen vleesch ende eenen olikoecke. Doen ghinck alle tvolc wech, elck in zijn huys.

20

Ende Dauid is wederom gecomen, om zijn huys te gebenedien, ende Michal Sauls dochter is Dauid buyten te gemoet gegaen, ende seyde, Hoe heerlijc is huyden die coninck van Israel geweest, die hem voor die maerten zijnre knechten ontdect heeft, so hem die netteboeuen ontdecken.

21

Dauid sprac tot Michal ^* Also waer als di HEERE leeft) Ic sal voor den HEERE spelen, die mi vercoren heeft voor uwen vader, ende voor alle zijn huys, also dat

* ten is niet int hebree.

[p. s4v]

hi mi beuolen heeft een Hertoge te zijn ouer dat volc des HEEREN ouer Israel,

22

ende ic sal spelen ende noch snooder worden, dan also ick geweest ben, ende sal neder zijn in minen oogen, ende metten maerten daer ghi afghesproken hebt, sal ick heerlijck vertoont worden.

23

Ende Michal Sauls dochter en hadde gheen kint tot aenden dach haers doots.

§ Hoe Dauid thuys Gods woude timmeren, en hoe die Propheet Nathan hem des HEEREN wodrt antwoorde.