De Vorsterman Bijbel

§ Dat .xxix. Capittel.

1

⁺DIe Philistinen vergaderden alle haer heyr tot Apheck, Ende Israel legerde ^* op die fonteyne) die in Iesrael was,

+ A

* th. te Ain

2

Ende die princen der Philistinen gingen voort henen met honderden ende met duysenden, Maer Dauid ende zijn mannen ginghen achter na bi Achis,

3

Doen spraken dye princen der Philistinen, Wat willen hen dese Hebreen? Achis sprac tot hen ^* Ende kent ghi niet) Dauid, die Sauls knecht geweest is des conincs van Israhel? die bi mi gheweest is veel dagen, ende iaren, ende ic en hebbe niet aen hem gheuonden, sint der tijt, dat hi af geuallen is, ende tot mi gheuloden tot nv toe?

* th. Ist niet

4

⁺Maer die princen der Philistinen werden toornich op hem, ende seyden tot hem, Laet den man weder omme keeren, ende in zijn plaetse blijuen, daer ghi hem gestelt hebt, op dat [kolom] hi niet met ons af en trec ten strijde, ende onse wederpartijder worde, als wi beghinnen te strijden, Want waer aen mocht hi sinen Here bet te vreden stellen, dan aen den hoofden ^* van ons?)

+ B

* theb. deser mannen

5

En is hi niet dye Dauid van dien si aenden reyen songhen, Saul heefter duysent geslaghen, maer Dauid thien duysent?

6

⁺Doen riep Achis Dauidem, ende sprac tot hem, so warachtelic als God leeft, Ick houde v voor oprecht, ende uwen wtghanc ende inganc met mi int heyr, behaecht mi wel, ende en hebbe niet archs aen v gespuert, sint ter tijt dat ghi tot my ghecomen zijt, tot nv toe, Maer ghi en behaecht den princen niet

+ C

7

Aldus keert nv wederom, ende gaet henen met vrede, op dat ghi niet qualijck en doet voor den ooghen der princen der Philistinen,

8

Dauid sprac, Wat heb ic ghedaen, ende wat hebdy aen uwen knecht gespuert, sint ter tijt dat ic voor v aensicht geweest ben tot nv toe, dat ic niet en soude comen ende strijden, teghen die vianden mijns Heeren des Conincs?

9

⁺Achis antwoorde ende sprack tot Dauid, Ick weet wel dat ghi goet zijt in minen oogen als een Enghel Gods, Maer der Philistinen princen hebben gheseyt, En laet hem nyet met ons op trecken inden strijt,

+ D

10

Dus maect v nv morghen vroech op, ende die knechten dijns heeren die met v op gecomen zijn, ende als ghy v morghen vroech op ghemaect hebt, dat licht is, so gaet henen,

11

Also stont Dauid ende zijn mannen vroech op, dat si des morghens wech souden ghaen, ende weder inder Philistinen lant souden comen, Maer dye Philistinen trocken op, tot Iesrael.

§ Hoe dat Dauid weder keerende sicelech aenghesteken vandt, ende vraechde Godt om raet, ende veruolcht dye moordenaers, ende hoe hi den man van Egypten spijsde ende hoe dat Dauid op die vianden viel.