De Vorsterman Bijbel

§ Dat .xxvij. Capittl.

1

⁺DAuid dachte in zijnder herten. Ic sal tot eenigen dage Saul in die handen vallen Ist mi niet beter dat ic ontuluchte ende behouden worde inder Philistinen landt, dat Saul wanhope ende ophoude van mi voorder te soecken in al die palen van Israel, so sal ic sinen handen ontgaen,

+ A

2

ende hi stont op, ende ginc ouer metten ses hondert mannen die bi hem waren tot Achis den sone Maoch coninc tot Beth,

3

Also bleef Dauid bi Achis tot Beth met sinen mannen, elc met sinen huyse. Dauid ooc met sinen twee huysurouwen Ahinoam die Iesraelitin, ende Abigail Nabals wijf, die Carmelitinne.

4

Ende doent Saul gebootscapt wert dat Dauid tot Beth gheulucht ware, soo en socht hi hem niet meer.

5

⁺Ende Dauid sprac tot Achis. Heb ic genade voor uwen ooghen gheuonden, so laet mi een ruymte geuen in een vanden steden inden lande, dat ic daer in woone. Wat soude dijn knecht in die coninclike stadt bi v woonen?

+ B

6

Doen gaf hem Achis in dien dage Zicelech, daer af is Zichelech der coningen Iuda tot desen dage toe.

7

Dat getal der daghen die Dauid inder Philistinen lant woonde, is vier maenden lanck.

8

⁺Doen trock Dauid op met sinen mannen, ende viel int lant der Gessuriten ende Girsiten

+ C

[p. r8r]

[afbeelding] ende Amalekiten, want dese waren die inwoonders van outs af van desen lande, alsmen coemt tot Sur tot aenden lande van Egypten,

9

Maer Dauid sloech al dat lant, ende en liet man noch wijf leuen, ende nam schapen, runderen, ezels, kemelen, ende cleederen, ende keerde weder, ende quam tot Achis,

10

Als dan Achis seyde, Teghen wien sidi huyden ingeuallen? so sprack Dauid, tegen tzuyden Iuda, ende tegen dat zuyden der Ierahmeliten, ende teghen tzuyden der Ceniten.

11

⁺Maer Dauid en liet man noch wijf leuen, noch en lietse niet tot Geth comen, ende dacht Si mochten misschien tegen ons spreken ende clappen, Also dede Dauid, ende dat was zijn maniere, also lange als hi inder Philistinen lant woonde,

+ D

12

Daer om gheloofde Achis Dauid, ende dacht, Hi heeft veel quaets ghedaen teghen zijn volck van Israel, daer omme sal hi altoos mijn knecht zijn

§ Hoe die Philistinen teghen tvolc van Israel vergaderden. Ende hoe Saul die waersegghers doode. Ende hoe Saul der waersegghersse raet vraecht, ende wilt Samuelem verwect hebben