De Vorsterman Bijbel

§ Dat .xvi. Capittel.

1

⁺ENde die HERE sprac tot Samuel. Hoe lange beweent ghi droeflijc Saul dien ic verworpen hebbe, dat hi geen coninc en si ouer Israel? Vullet uwen hoorn met olie ende coemt, dat ic v seynde tot den Bethlehemite Isai, want onder sinen sonen hebbe ic mi eenen coninc versien.

+ A

2

Samuel sprac. Hoe sal ic henen gaen? Saul salt vernemen ende my dooden. Die HERE sprack. Neemt een calf vanden rinderen tot v, ende spreect. Ic ben gecomen om den HERE te offeren.

3

Ende ghi sult Isai totten offer nooden, daer sal ic v dan wi-[kolom]sen wat ghi doen sult, dat ghi mi dien saluet dien ic v segghen sal

4

Samuel dede so hem die HERE geseyt hadde, ende quam tot Bethlehem, doen verwonderden hen die ouders vander stadt, ende gingen hem te gemoete, ende spraken. Is uwe toecoemst ooc vreedsaem? ⁺

+ iij.Regum. ij. Leui. xx.

5

Hi seide. Ia. Ic ben gecomen om den HERE te offeren. Heyliget v, ende coemt met mi totten offer. Ende hi heylichde Isai ende sine sonen, ende noodese totten offer

6

Als si nv in quamen, sach hi Heliab aen, ende dachte, oft voor den HERE zijn gesalfde si,

7

Maer die HERE sprac tot Samuel. En aensiet sine ghedaente niet, ⁺ noch die hoocheyt zijns persoons, ic hebbe hem verworpen, noch ic en oordeele niet naet aensien der menschen Een mensch siet dat voor oogen is, Maer die HEERE siet dat herte aen.

+ B

8

Doen riep Isai Aminadab, ende liet hem voor Samuel gaen Ende hi sprac. Desen en heeft die HERE ooc niet vercoren.

9

Doen liet Isai voort comen Samma. Hi sprac. Desen en heeft die HERE ooc niet vercoren.

10

Doen liet Isai zijn seuen sonen voor Samuel gaen. Maer Samuel sprack tot Isai. Die HERE en heeft ghenen van allen desen vercoren.

[afbeelding]

11

⁺Ende Samuel sprac tot Isai. Sijn nv hier die knechtkens alle? Hi sprack. Die cleynste is noch ouer, ende hi huet die schapen. Doen sprac Samuel tot Isai, seyndt henen ende laet hem halen, want wi en sullen niet sitten tot dat hi hier come.

+ C

12

Doen sandt hi heenen ende liet hem halen. Ende hi was rosachtich met frayen ooghen, ende van goeder ghedaenten. Ende die HERE sprack. Staet op ende salft hem, die ist.

13

Doen nam Samuel sinen olie hoorn ende salfde hem, midden onder sine broederen. Ende die geest des HEREN wert spoedich ouer Dauid van dien dage aen, ende voort Maer Samuel stont op ende ghinck tot Ramatha.

14

Die gheest des HEREN weeck van saul, ende een boose gheeste vanden HERE blies hem op.

15

Doen spraken dye knech-

[p. r2r]

ten Saul tot hem, Siet een boose gheest van Godt quelt v,

16

onse Heere ghebiede sinen knechten, dye voor hem staen, dat si eenen man soecken, die opter harpen ende snaren spelen can, op dat, als dese boose gheest Gods ouer v coemt, hi met zijnder hant spele dattet beter met v worde,

17

Doen sprack Saul tot sinen knechten, siet na eenen man, die goet si opt snaren spel, ende brengt hem tot mi.

18

Doen antwoorde der knapen eene, ende sprack, ⁺ Siet, ick heb ghesien eenen sone Isai des Bethlehemiten, die op snaren spelen can, een redelijc man ende strijtbaer, ende verstandich in saken ende schoone, ende die HEERE is met hem,

+ D

19

Doen sant Saul boden tot Isai, ende dede hem seggen, seynt uwen soon Dauid tot mi die bi die schapen in die weyde is,

20

Doen nam Isai eenen ezel met broot, ende een flecsce wijns ende een geyten bocxken, ende seyndet Saul door sinen sone Dauid,

21

Alsoo quam Dauid tot Saul, ende stont voor hem, ende hy creech hem zeer lief, ende wert zijn wapendragher.

22

Ende Saul sant tot Isai, ende dede hem seggen, Laet Dauid staen voor mijn aensicht, want hi heeft genade gheuonden voor mijnen ooghen,

23

Als dan den boosen geest Gods ouer Saul quam, soo nam Dauid die harpe, ende speelde met zijnder hant, soo vermaecte hem Saul, ende twert beter met hem, ende dye boose gheest weeck van hem

§ Hoe die Philistinen teghen tvolck van Israel streden, Ende Goliaths ghesteltenisse. Ende van Dauids moedicheyt. Ende hoe Dauid Goliath verwan met eenen slinghere. Ende hem thooft met zijns selfs swaert af sloech