De Vorsterman Bijbel

§ Dat .xvi. Capittel.

1

⁺HOut die maent ^* der nieuwer vruchten) op dat ghi Paesschen maken moecht den HERE uwen God, Want in die maent heeft v die HERE uwe God wt Egipten geleyt inder nacht,

+ A

* theb. Abib Abab heet een taxken oft rusken daer af comet Abib, dese maent is onsen April.

2

Ende ghi sult den HERE uwen God tot een Paesschlam offeren runderen ende schapen, in die stede die de HERE verkiesen sal, om dat sinen naem aldaer woonen soude,

3

⁺ Ghi en sult gheen geheeft broot eten op die feeste, seuen dagen suldy ongeheeft broot uwer armoeden eten, want met ^* vreesen) sidy wt Egipten lant getrocken, op dat ghi gedachtich wesen moecht alle uwe leuen lanc, des daechs van ws wtgancs wt Egipten,

+ Exo. xxiiij § Paesscen

* the. haeste

4

ende dat geheefde en sal niet gesien worden seuen dagen in alle uwe palen, ende ooc en sal vanden vleesche, dat tsauonts inden eersten daghe geoffert is, ⁺ ouernacht niet bliuen, tot des morgens

+ B

5

Ghi en moecht tpaesschlam niet offeren binnen eenige van uwen poorten die de HERE v God v gegeuen heeft,

6

sonder alleen in die stede, die de HERE v God vercoren heeft dat sinen naem daer woonen soude, daer suldy tpaesschlam offeren, tsauonts, als die Sonne onder geghaen is, tot dier tijt, als ghi wt Egipten troct, ⁺

+ Vergaderinge, dat is, dat tvolc te samen quam om de wet te hooren in den voorhof des tempels.

7

ende ghi sullet koken ende eten in die stede die de HERE v God vercoren heeft, ende daer na keeren tsmorghens ende ghaen weder tot uwer tenten,

8

Ses dagen lanck suldy ongeheeft eten, ende inden seuenuensten daghe ist die verghaderinghe des HEEREN ws Gods, dan en suldy gheen werck doen. [kolom]

9

Seuen weken suldy tellen, ⁺ ende beghinnen te tellen alsmen beghint metter sickelen int zaet,

+ § Pinxten Ex. xxiij.c.

10

ende ghi sult houden die feeste der weken den HERE uwen Gode offerende een vriwillich offer van uwen handen naer dien dat de HERE v God v ghebenedijt heeft, ⁺

+ § Die ghedachtenis hoe si dye wet ontfangen hadden op den berge Synai.

11

ende ghi sult vrolijc zijn voor God uwen HERE, ghi en v sone, v dochter, v knecht, v maerte ende die Leuijt die binnen uwer poorten is, die vremdelinck, die weesen, ende weduwen, die onder v zijn, in die stede die de HERE uwe God vercoren heeft, dat sinen naem daer woonen soude,

12

Ende gedenct, dat ghi een knecht in Egipten zijt geweest, ende houdt ende doet naer dese zeden, ende geboden die v gheboden zijn.

13

Ghi sult die feeste der Loouertenten seuen daghen houden, ⁺ als ghi vergadert hebt die vruchten des dorschuloers ende der wijnperssen,

+ § Die feeste der loouerhutten was een gedachtenis der wtwendigher weldaden dye Godt hen veertech iaren lanc in die woestine bewesen hadde.

14

⁺ende ghi sult vrolic zijn, op die feeste, ghi ende v sone, v dochter, v knecht, v maerte die Leuijt, die vremdelinck, die Weese, die weduwe die binnen uwer poorten zijn,

+ C

15

Seuen daghen suldy den HERE uwen Gode die feeste houden, in die stede die de HERE vercoren heeft, Want die HERE v Godt sal v gebenedien in alle dat ghene dat v incomende is, ende in alle uwe wercken van uwen handen, Daerom suldy vrolijck zijn.

16

Driemael des iaers sal al dat manlic is, onder v, voor den HERE uwen God openbaren, in die stede, die de HERE vercoren heeft, Op de feeste der ongeheefder brooden ⁺ Op der wekenfeeste, ende op die feeste der loouertenten, Ende niemant en sal ydel voor den HERE openbaren,

+ Exo. xxiij. ende xxiiij.

17

Eenyegelic, naer de gauen van zijnder hant, naer de gebenedijnghe die de HERE v God v ghegheuen heeft.

18

☞ Ghi sult rechters ende officiers in alle uwe poorten stellen, ⁺ die die HERE v god v gheuen sal onder uwe geslachten, dat si rechten met rechten vonnis

+ D

19

^* en sien sullen) dat recht niet buygen, ende ghi en sult ooc gheenen persoon kennen, noch ghiften nemen, Want die ghiften verblinden de oogen der wijsen ende veranderen die rechte saken,

* the. ghi en sult

20

Dat ghene dat recht is, dat suldy rechtueerdelic volgen, op dat ghi leuen ende besitten moecht dat lant, dat v die HERE v god v geuen sal.

21

Ghi en sult noch bosschen noch boomen planten biden altar des HEREN ws gods den welcken ghi v maect,

22

Ghi en sult v gheen collomnen op rechten, die welcke die HEERE v god hatet.

§ Datmen gheen gebreckelijke noch besmette offerhande offeren en mochte, Ende der afgoders straffinghe, ende een twifelachtige sake totten oppersten rechter te brenghen, Ende die wederspannige te straffen.