De Vorsterman Bijbel

§ Dat .xviij. Capittel.

1

⁺ENde die HEERE sprack tot Moysen, segghende,

+ A

2

Spreect met den kinderen van Israel, ende segt tot hen, Ick ben die HERE uwe God,

3

Ghi en sult niet doen na die ghewoonte des Egipschen lants, daer ghi inne ghewoont hebt, Oock niet na die wercken des lants Canaan, daer ic v in brengen sal, ghi en sult ooc in haeren rechte niet wandelen,

4

maer alleen na mijn recht suldy doen, ende mijn insettinge suldi houden, ende daer in wandelen, ⁺ Want ick ben die HEERE uwe God,

+ Roma. x.a. Esechi. x.b Gala. iij.b

5

daerom suldi mijn insettingen houden ende mijn rechten. Want die mensche die de selue doet, die sal daer door leuen, want ick ben die HEERE.

6

Niemant en sal tot zijnder naesten vriendinne van sinen bloede ghaen, om haer scamelheit te ontdecken, want ic ben die HEERE,

7

Ghi en sult ws vaders ende ws moeders scamelheit niet ontdecken, Het is uwe moeder, daerom en suldi haer schamelheyt niet ontdecken.

8

Ghi en sult ws vaders wijfs scamelheit niet ontdecken, want het ws vaders scamelheit.

9

⁺Ghi en sult ws susters schamelheyt die ws vaders ofte ws moeders dochter is, die thuys oft buyten geboren is, niet ontdecken

+ B

10

Die scamelheit van ws soons dochter, ofte ws dochters dochter en suldi niet ontdecken, want het is uwe scamelheit.

11

Ghi en sult ws vaders wijfs dochter, die si uwen vader gebaert heeft, ende v suster is, haer scamelheyt niet ontdecken.

12

Ghi en sult ws vaders suster schamelheyt niet ontdecken, want het is ws vaders vleesch.

13

Ghi en sult ws moeders susters schamelheit niet ontdecken, want het is ws moeders vleesch.

14

Ghi en sult ws vaders broeders schamelheit niet ontdecken, noch ghy en sult tot

[p. g6v]

zijn huysurouwe niet gaen, die v aengaet in zwagherschappe. ⁺

+ hier volcht maechscap.

15

⁺Ghi en sult niet ontdecken uwer behouder dochteren scamelheit, want het is ws soons wijf, daeromme en suldi haer scamelheit niet ontdecken.

+ C

16

Die schamelheit van ws broeders huysurouwe en suldi niet ontdecken, want het is dijns broeders scamelheit.

17

Ghi en sult ws wijfs ende haerder dochter schamelheit niet ontdecken, noch haers soons dochter, oft dochters dochter nemen, om haer schamelheyt te ontdecken, want haer vleesch zijn, ende sulcke ghemeynscap is sonde met maechscap ende verboden.

18

Ghi en sult ooc ws huysurouwen suster niet nemen tot dijnder wellusticheit, noch ghi en sult haer onschamelheit nyet ontdecken, so lange als die leeft.

19

Ghi en sult niet tot eenen wiue ghaen, die wile dat si haer crancheit heuet, ende haer schamel onreynicheit niet ontdecken.

20

Ghi en sult niet met ws naesten wijf te doen hebben, noch niet besmet worden met die menghinge des zaets.

21

Ghy en sult oock van uwe zaet niet geuen, dattet geoffert worde den afgod ^* Moloch) noch ghi en sult den naem ws Gods niet besmetten, want ic ben die HEERE.

* th. Moloch § Moloch was een afgod dien zij haer eigen kijndren tot dienst verbranden ghelijc Manasses dede de coninc van Iuda ende meijnde gode daer mede te dienen gelijc Abraham dede doen hi Isaac sinen sone offerde door gods beueel.

22

Ghi en sult met een knechtken niet te doen hebben, als met een vrouwe, want dat is onmenschelic.

23

Ghi en sult ooc by gheen beest ligghen, noch met haer niet veronreynicht worden. Ende gheen vrouwe en sal onderligghen, noch met een beeste te doen hebben.Want het is een grouwelicheit.

24

Ghi en sult v in gheenen van desen veronreynighen, Want in allen desen hebben haer die heydenen veronreynicht, die ic voor v wech sal wtstoten,

25

ende dat landt is daer door ontreynicht, ende ick sal haer misdaet aen hen versoecken, dat dat lant zijn inwoonders wt spouwe,

26

Daeromme houdet mijn insettingen ende rechten, ende en doet niet een van desen grouwelicheden, noch die ingheboren, ⁺ noch vremdelinc die onder v is,

+ D

27

want alle alsulcken grouwelicheden hebben die luyden van desen lande ghedaen, die voor v waren, ende hebben dat lant ontreynicht

28

op dat v oock dat landt moet wt en spouwe, als ghijt ontreynicht, ghelijct die heydenen heeft wtghespogen, die voor v waren,

29

Want so wie dese grouwelicheyt doen, dier sielen sullen verghaen van dat midden van haeren volcke.

30

Daerom bewaert mijn ghebo-[kolom]den, ende en wilt die dingen niet doen, die gene die voor v geweest zijn, gedaen hebben, ende en wort daer inne niet onsuyuerlic besmet, Ic ben die HEERE uwe God.

§ Hier worden sommige gheboden verhaelt, ende die sorghe voor die arme menschen, ende sijnen naesten lief te hebben ende recht te oordeelen, gheen wrake te doen, gheen waerseggers te lijden.