De Vorsterman Bijbel

§ Dat .xxxi. Capittel.

1

⁺ENde die HERE sprac tot Moysen segghende,

+ A

2

siet, Ic heb geroepen by name Bezeleel Huri sone, die Hurs sone was vanden geslachte Iuda,

3

ende hebbe hem veruult metten geest Gods, met wijsheyt ende verstande, wetentheit in alderley werc,

4

om te verdencken watmen smeden mach wt gout, siluer, latoen,

5

marmorsteen ende costelike gesteenten ende wt houte te maken alderley werc.

6

Ende ic hebbe hem eenen geselle gegeuen Ooliab Ahizamachs sone vanden geslachte Dan, ende ic heb elcken wijsen die wijsheit int herte gegeuen, ⁺ dat si maken sullen, al wat ic v geboden hebbe.

+ B

7

Den tabernakel des verbonts, dye Arcke des ghetuyghenis, die tafel ^* der antwoort) daer op, ende alle gereetscap des tabernakels,

* th. den genaden stoel.

8

die tafele ende haer gereetscap, den alder suyuersten candelaer ende al zijn ghereetscap, den outaer des ruecwercs,

9

des brantoffers outaer, met alle zijnder gereetscap, dat watervat met sinen voete,

10

die heilige cleederen totten dienste des priesters Aaron, ende die clederen zijnder sonen, om dat priesterscap tot mijnder eeren te bedienen,

11

die salfolie, ende dat ruecwerc van specerie totten heilichdom. Al wat ic v gheboden hebbe sullen si maken.

12

Ende die HEERE sprac tot moysen seggende.

13

⁺Segt den kinderen van Israel, ende spreect tot hen. Siet, dat ghi minen Sabboth bewaert, want hi is een teeken tusscen mi ende v, tot op uwe nacomelingen, Om dat ghi weeten sult dat ick die HEERE ben die v heylich make.

+ C

14

Daerom bewaert minen Sabboth, want hi is v heilich, wie hem beulect, dye sal dye [kolom] doot steruen. Want wie dat eenich werc daer in doet, diens siele sal vergaen wten middel van sinen volcke.

15

Ses dagen suldi v werc doen Maer die seuensten dach is die Sabboth die heilighe ruste des HEEREN. Wie dat eenich werc doet in desen dach, die sal die doot steruen.

16

Die kinderen van Israel sullen den Sabboth houden, ende oock by haer nacomelinghen vieren.

⁺ Het is een eewich verbont

+ D

17

tusscen mi, ende die kinderen van Israel, ende oock een eewich teeken, Want binnen ses dagen so maecte die HEERE hemel ende aerde, ⁺ Ende op den seuensten dach rustede hi, ende hielt op van allen wercke.

+ Gene. i.d.

18

Ende als die HEERE alle dusdanighe redenen gheeyndet hadde met Moysen opden berghe Synai, Soo ghaf hy hem twee Tafelen des ghetuyghenisse, dye steenen waren, ende ghescreuen metten vinghere Gods.

[afbeelding]

§ Hoe dat volc dat calf aenbidt, als Moyses vertoefde, ende die tafelen gebroken worden, ende die afgoders verslagen worden.