De Vorsterman Bijbel

§ Dat .xxviij. Capit.

1

⁺ENde ghi sult Aaron uwen broeder ende zijn sonen tot v nemen vanden kinderen van Israel dat hi mijn priester si, te wetene Aaron ende zijn sonen Nadab, Abihu, Eleazar, ende Ithamar,

+ A

2

ende ghi sult Aaron uwen broeder heylighe cleederen maken tot eeren ende tot vercieringe,

3

ende ghi sult den wijsen van herten segghen, die ic metten geest der wijsheyt veruult hebbe, dat si Aaron uwen broeder cleederen maken tot ^* eere ende cieraet, inden welcken hi mi diene, als hi geheilicht is)

* the. zijnder wijnge dat hi mijn priester si

4

Dit zijn die cleederen die si maken sullen, ^* Eenen borstlap der redelicheit, eenen lijfroc die de scouderen decke, eenen enghen lijnen rock) een miter ende gordel. Also sullen si heilige cleederen maken dijnen broeder Aaron ende sinen sonen, dat si ter eeren van mi dat priesterscap bedienen,

* the. Eenen borstlap, lijfroc, siden roc, engen rock.

5

daer toe sullen si gout nemen, gheel side, purpure ende peerse side tweemael gheuerwet witte side.

6

Den lijfroc sullen si maken van goude, geelder siden, ⁺ purpure, ende peerse side, tweemale geuerwet, ende getweernde witte side, met barduerwerc,

+ B

7

datment op beide siden met sinen zoom te samen vate.

8

Ende sinen gordel daer op, sal vander selfder consten ende werc zijn. Van goude, van geelder siden, purpur, ende peerse side tweemael gheuerwet, ende ghetweernde witte side.

9

Ende ghi sult nemen twee Onix steenen, ende daer op grauen die namen der kinderen van Israel,

10

op elcken ses namen. Na die ordinancie haers ouderdoms,

11

dat suldi door dat werc der steengraueerders snijden, ende der ghenen die wercken in costelike gesteente, grauen doen. Ende sultse ingrauen met [kolom] den name der kinderen van Israel. Also datsi met goude ronts omme begrepen worden.

12

⁺Ende ghi sultse op die schouderen des lijfrocks hechten, dat die steenen mogen wesen in gedachtenisse der kinderen van Israel, ende Aaron sal haer namen op beide zijn scouderen dragen voor den HEEEE tot een gedachtenisse.

+ C

13

Ende ghy sult gulden spannen maken,

14

ende twee gewrongen ketenen vanden alder suyuersten goude, dye achter ouer gaen. Ende sultse aen die spannen doen.

15

Den borstlap der reden des oordeels suldi maken nader const der barduerwerckers gelijc den lijfroc. ⁺ Van goude, geelder siden, purpure, ende peerse side tweemael geuerwet, ende getweernder witter siden,

+ Sapien. x.b.

16

viercant sal hi zijn ende dubbel. Een hantbreet sal zijn lengde zijn, ende een hantbreet zijn breyde.

17

Ende ghi sult in hem voegen vier rijen vol steenen In deerste rije sal zijn een Sardix, Topaes, smaragdus.

18

In die ander een Carbunkel, Saphir, ende Iaspis.

19

In die derde Ligurius, Achates, Ametistus.

20

In die vierde een Berillus, Onix, Diamant. Alle die vier rijen sullen in gout gesloten zijn,

21

ende sullen na die .xij. namen der kinderen van Israel staen gegrauen van steen graueerders, ⁺ een yegelijc sinen naem na die .xij stammen,

+ D

22

ende ghi sult gewrongen ketenen aen den borstlap ouer een doen, vanden alder fijnsten goude,

23

ende twee gulden ringhen, also dat ghi die selue twee ringen hecht aen die twee hoecken des borstlaps,

24

ende doet die twee gulden gewrongen ketenen in die selue twee ringen,

25

Maer die twee eynden vanden twee gewrongen ketenen, suldi in die twee spannen doen, ende hechtense aen die hoecken vanden lijfroc, teghen malcanderen ouer.

26

Ende ghi sult twee ander gulden ringen maken, ⁺ ende aen die twee ander hoecken des borstlaps hechten, te weten aen sinen cant daert buyten opten lijfroc mede hanghet.

+ E

27

Ende ghi sult noch twee gulden ringen maken, ende op die twee hoecken aen den lijfrock van buyten teghen malcanderen ouer hechten, daer den lijfroc te samen coemt.

28

Ende men sal den borstlap met sinen ringhen met eenen ghelen snoere, aen die ringhen des lijfrocs knopen, dattet opten lijfroc vast aen ligghe, ende den borstlap niet los en worde vanden lijfrock.

29

Ende Aaron sal die namen der kinderen van Israhel draghen inden borstlap des rechts, op zijnder herten, als hi in dat heylighe gaet, totter gedachtenisse voor den HERE altijt.

30

Ende ghi sult inden borstlappe

[p. e6v]

des oordeels doen leeringe ende warachticheyt) op dat si op Aarons borst zijn, als hi ingaen sal voor den HERE ende draghen dat oordeel der kinderen van Israel op zijn borst voor den HEERE altijt.

31

Ghi sult ooc den siden rock totten lijfrock maken, al van geelder siden,

32

ende bouen midden daer in, sal een gadt zijn, ende eenen boort rontomme dat gat, om dat te samen te houden, dattet niet en scuere.

33

Ende onder aen sinen zoom suldi granaet appelen maken van geelder siden, ⁺ purpure, roset root tweemael gheuerwet, ronts om. Ende ghi sult daer tusschen gulden bellen ronts omme hanghen,

+ F

34

also dat daer een gulden belle, daer na een granaet appel, ende noch een gulden belle, ende dan weder eenen granaet appele, ende also voort ronts om aen den zoom des seluen siden rocs.

35

Ende Aaron sal hem aen hebben als hi dient datmen zijn geclanc hoore als hi wt ende in ghaet, indie heylighe plaetse voor des HEEREN aensichte, op dat hy niet en sterue.

36

Ghi sult ooc een voorhooft plate maken, vanden alder puersten goude, ende daer inne grauen, na steen graueerders const, Dien heyligen name den HERE,

37

Ende ghi sult de plate met een gheel siden lint hechten, ende si sal op den miter wesen hangende aent voorhooft des Bisscops,

38

Ende Aaron sal draghen dye misdaden van huer, die de kinderen van Israel gheheylighet hebben, ende gheoffert in alle haer ghiften ende offerhanden, ende dye plate sal alle reysen aen zijn voorhooft zijn, op dat dye HEERE met hem te vreden si.

39

Ghi sult oock den Enghen rock vast maken met witter siden, ende eenen miter van witter siden, ende eenen ghesticten gordele van verheuen baerduerwercke.

40

⁺Ende Aarons sonen suldi linen rocken, gordels, ende miters bereyden, ter eeren ende tot vercieringhen,

+ G

41

ende ghi sultse uwen broeder Aaron met sinen sonen aentrecken, ende ghi sult yegelicx handen saluen, ende ^* wiense) dat si tot mijn eere den priesterlijcken staet ghebruycken,

* the. vullense

42

Ende ghi sult hen linen broecken maken, om te bedecken dat vleesche der scamelheyt, van den lendenen tot aen dye dgye,

43

ende Aaron ende zijn sonen sullense aen hebben, als si in die tabernacule des getuychnis gaen, oft als si gaen totten outaer op dat si dienen in die heilighe plaetse, dat si der misdaet niet sculdich en zijn, ende so steruen. Dat sal Aaron ende sinen zade na hem [kolom] een eewighe zede zijn.

§ Van die widinghe der priesteren, ende van die offerhanden ende van haer gewoonten.