De Vorsterman Bijbel

§ Dat .xxi. Capittel.

1

⁺DIe HEERE besocht Saram, alsoo hie gheloeft hadde, ende dede met haer also hi geseyt hadde,

+ A

2

⁺ Ende Sara ontfinck, ende baerde Abrahamme eenen sone, in zijn oude daghen, ter tijt, dien hem God geseyt hadde,

+ Hebr. xi.c. Iosue xxiiij. Matt. i.a.

3

Ende Abraham hiet sinen sone die geboren was, Ysaac, dien hem Sara baerde,

4

ende besneet hem ten achtsten dage, so hem God gheboden hadde, als hi hondert iaren out was.

5

Abraham was hondert iaert out, ende doen wert hem zijn sone Ysaac gheboren.

6

Ende Sara sprac, God heeft mi tot eenen ghelache ghemaect, want wie dat hooren sal, die sal mijnder belachen,

7

noch seyde si ^* Wie salt geloouen als hijt hooren sal Abraham) seggen, dat Sara kint sooget, ende heuet hem eenen sone gebaert in zijn oude dagen?

* th. wie dorstet Abraham selfs

8

Ende dat kint wies ende wert ghespeendt, Ende Abraham bereyde een groote maeltijt inden daghe doen Ysaac ghespeent wert.

9

Ende Sara sach Agars van Egipten sone, ⁺ dien si Abrahamme gebaert hadde, ^* spelende met Ysaac haeren sone) ⁺ ende sprac tot Abraham,

+ Rom. vi.b. Gal. iiij.d.

* Rom. ix.b. the. dat hy een bespotter was ende

+ B

10

Drijft dit ioncwijf wt met haeren sone, want dees ioncwijfs sone en sal nyet erfgenaeme wesen met minen sone Ysaac.

11

Dat woort beuiel Abraham qualic om zijns soons wil,

12

Maer God sprac tot hem, Ende latet v niet qualicken beuallen om des knechtkens ende ioncwijs wil, Alle dat Sara v geseit heeft, dat verhoort, Want in Ysaac sal v dat zaet ghenoemt worden,

13

Oock sal ick des ioncwijfs sone maken tot eenen grooten volcke, om dat hi uwe zaet is.

14

Ende aldus soo stont Abraham des morghens vroech op, ende nam broot ende een flesse met water, ende leydet op Agars scouderen ende tknechtken mede, ende lietse gaen Doen troc si wech, ende ginc in die woestine dolen bi Bersabee,

15

Als nv dat water wt der flessen was, werp si dat knechtken onder eenen struyck,

16

ende ghinc henen, ende ghinc sitten van verre teghen ouer, eenen boochscuet verre, Want si seyde, Ic en sal tkint niet moghen sien steruen, ende si sadt [kolom] tegen ouer, ende hief haer stemme op ende weende

17

Maer Godt verhoorde die stemme des kindts, ende die Enghel Goodts riep vanden hemel Agar, ⁺ ende sprac tot haer, wat doedy Agar? en vreest niet, want God heeft verhoort de stemme des kints, daert leyt,

+ C

18

staet op, neemt dat kint met uwen handen, want ick sal hem tot een groot volck maken.

19

Ende God dede haer oogen op, dat si een water fonteyne sach, Doen ghinc si henen, ende vulde die flesse met water, ende ghaf den kinde te drincken,

20

^* ende si woonde met den kinde) ende twies, ende woonde inder woestynen, ende werdt een ionghe schutter,

* thebr. ende God was met den kinde

21

ende woonde inder woeystine Pharan, ⁺ ende zijn moeder nam hem een wijf wt Egipten lant.

+ Galat. iiij.

22

Ter seluer tijt sprac Abimelech ende Phicol zijns heyrs hooftman, met Abraham, ende sprac, God is met v in alle wat ghi doet

23

Daerom sweert mi by Godt, dat ghy my, noch minen kinderen, noch minen neuen, niet letten en sult, maer die barmherticheyt die ic v bewesen heb, aen mi oock bewijst, ende aenden lande, daer ghi een incomelinc in zijt,

24

Doen seyde Abraham, ic salt sweren.

25

⁺Ende Abraham strafte Abimelech, om des waterputs wille, die Abimelechs knechten met gewelt ghenomen hadden,

+ D

26

Doen antwoorde Abimelech, Ick en hebs niet gheweten, wie dat ghedaen heeft, oock en hebdijt mi niet geseyt, daer toe en heb ict nyet ghehoordt, dan huyden.

27

Doen nam Abraham scapen ende runderen, ende ghafse Abimelech, ende maecten beyde een verbont met malcanderen,

28

ende Abraham stelde daer seuen ionghe oyen bysondert,

29

Doen seyde Abimelech tot Abraham Wat willen dese seuen oyen die ghi daer bisondert gestelt hebt?

30

Hi antwoorde, seuen lammeren suldy van mijnder hant nemen, dat si mi tot een ghetuychnis zijn, dat ic desen put geghrauen hebbe,

31

daer af hiet die stede Bersabee, ⁺ want si allebeyde daer ghesworen hebben,

+ (Berseba) in duytsch een eetput het mocht ooc wel seuenput heeten.

32

ende alsoo maecten si tverbont tot Bersabee, om den put des eedts.

33

Doen stont Abimelech op, ende Phicol zijns heyrs hooftman, ende trocken weder inder Philistinen lant, Maer Abraham plantede boomen tot Barsabee, ende aenriep aldaer den naem des HEEREN, des eewighen Gods,

34

ende was een incomelinc inder Philistinen landt, eenen langhen tijt.

§ Hoe Abraham sinen sone te offeren, gehoorsaem was ende wederomme die belofte ontfinck.