Veelderhande gheestelicke liedekens

[p. 399]

C Een liedeken op de wijse, O Venus ghy zijt valsch in uwen gront.

O Weerelt ghy zijt valsch in uwen gront
Dat ghy so wel bedrieghen kont
Die v alhier aenkleuen
Die moeten vergaen in korten stont
Al ist dat ghy haer hier voorspoet iont
Ghy brengt haer siele in sneuen
Hier namaels deruen sy deewich leuen
Die uwen troost al hier verweruen
Och weerelt loos die v vercoos
Die moet bederuen.

Den rijcken man daer ons Lucas af ghewaecht
Die is nv hier onuersaecht
Gheuolghet in zijn affeeren
Al hoortmen datter een van hongher klaecht
Daer en wert doch niet na gheuraecht
Om den noot van hem te weeren
Men siet nv anders niet begheeren
Dan hoocheyt in des weerelts palen
Die soect dit lot, die moet van God hier namaels falen

Hoe oueruloedich is nv de waerheyt bloot
Nochtans wert seer weynich den noot
Des naesten nv verdreuen
Dies men siet dat in velen cleyn ende groot
De liefde is koudt den hart ende nijt snoot
Is nv seer hooch verheuen
Na dat wy klaer vinden beschreuen
So moet ons Gods toekomste naken
Daerom dan hier, doch ons Princhier
Vint in der waken

En laet ons herte doch niet belast

[p. 400]

 

Met sorghe der neeringhe zijn ontpast

 

Maer altijt meer verblijden

 

Al ist dat ons God door tribulacie tast

 

Wy moeten doch in zijn rijcke vast

 

Ghestelt zijn door groot lijden

 

Al ist dat ons nv hier bestrijden

 

Die bloetghierich zijn en wreet int schouwen

 

Laet op den steen groot ende kleen

 

Ons seluen bouwen.

 

 

 

Vreeset haer niet spreeckt de Heer siet

 

Die dooden mach v lichaem vleesch en bloet

 

Maer wilt hem vreese gheuen

 

Die mach na dat hy met oeuelen moet

 

Dat vleesch heeft ghedoodt oock inder hellen gloet

 

De siele mach doen sneuen

 

En brengt de syne int eewighe leuen

 

Die om synen naem hier zijn in lijden

 

Sullen hier naer, vrij openbaer

 

Eewich verblijden.

 

 

 

Prinche God die de uwe hier kastijdt

 

Hier namaels met v seluen verblijdt

 

Wilt ons ghenadich wesen

 

Dat wy v behaghen inden lesten tijt

 

Want ons leuen is hier eenen strijt

 

So wy in Iob wel lesen

 

Maer wilt ons helpen Heer ghepresen

 

Die hier met stricken zijn beuanghen

 

Maer v goetheyt is hier bereyt

 

Al ons verlanghen.

FINIS.