Veelderhande gheestelicke liedekens
(1558)–Anoniem Veelderhande gheestelicke liedekens–
AuteursrechtvrijC Na de wijse. Die Lupaert voert de roosen root.
RIist wt den slaep, nv niet en vaect
Naer vruechde haect
Trijck Gods ghenaect
Doet op v ooghen, siet ende smaect
Wonder moecht ghy beschouwen
Gods gheest in vierigher tonghen blaect
Door dwoort volmaect, bidt ende waect
Tlicht is gheresen, den duyster schaect
Wilt nv den acker behouwen
Gheheeten vast betrouwen.
| |
[pagina 359]
| |
De waerheyt heeft nv haer vluegels ontdaen
Om ons te ontfaen, coemt laet ons gaen
En soect anders gheen weghen noch vreemde paen
Door menschelicke droomen
Maer wilt alleene op Christum staen
Die heeft voldaen hoort zijn vermaen
Ureest duyuel noch hel, ten mach v niet schaen
Ic hebbe haer macht benomen
Tot my alleene wilt comen.
Ick ben dat licht der weerelt claer Ga naar margenoot+
Sprack Christus daer, coemt volght my naer
Want ick klem op tot mijnen hemelschen vaer
Om v den wech te bereyden
Dus blijft in mijnder liefden eerbaer
Eendrachtich eenpaer, en vreest niet een haer
Ick sende v eenen trooster voorwaer
Die salt al verbreyden
En laet v niet verleyden.
Ick ben die wech die waerheyt pleyn
Een claer fonteyn, coemt al ghemeyn
Drinct van dat leuende water reyn
Om niet sal ict v gheuen
Ghy zijt versoent door my alleyn
Ende anders gheyn, ick ben dat greyn
Hoe sydy in uwen ghelooue dus cleyn
Daer staet van my gheschreuen
In hem ist eewich leuen.
Al ist dat v die weerelt verlaet
Weest niet desperaet, smaect datter staet
Sy hebben my om niet ghehaet
Nochtans ick haer beminde
Ick quam saeyen dat Goddelick saet
Sy hebbent versmaet, wacht v die daet
Met recht op mijnen weghen gaet
Uolstandich totten inde
En waeyt niet met allen winde.
Nv hebdy ghehoort dat soete accoort
| |
[pagina 360]
| |
Des Uaders woort, gaet Suyt en Noort
Ende leert ten rechte mijn volck voort
Dat sy my leeren kennen
Staet op die ligghen in sonden versmoort
Blijschap oorboort, den nest is ghestoort
Dat helsche serpent leyt nv vermoort
Wilt v tot God omwenden
Synen gheest sal hy ons senden.
Prince ghy Koorenbloemkens fijn
Smaect desen wijn sonder fenijn
Twort v gheschoncken wilt vrolick zijn
Hout mate in allen dinghen
Leeft met ghenoechten op dit termijn
Trect een lijn, so en machmen dijn
Uerneren blameren in gheenen schijn
Maer lof sal van ons springhen
So moghen wy vrolick singhen.
|
|