Veelderhande gheestelicke liedekens

C Na de wijse. O bloeyende iuecht notabel wijs van sinne.

O Christus kercke soet
Wilt v veriubileren
Hebt goeden moet
Al wiltmen v persequeren
Al is uwer vyanden groot ghetal
U capiteyn domineert bouen al
Hy sal wel optineren

[p. 330]

 

En brenghen zijn vyanden in den val

 

Al maken sy noch so groot gheschal

 

Sy moeten reculeren.

 

 

 

O dochter van Syon

 

Maeckt vruecht wilt triumpheren

 

Want v vrome campioen

 

Die koemt v assisteren

 

Hy koemt saechtmoedich en soet ghesint

 

Die wijse koninck die v bemint

 

Wilt v tot hem waerts keeren

 

Want al dat hy heeft zijn vleesch en bloet

 

Coemt hy ons schencken wt liefden goet

 

Om te ghenesen onse seeren.

 

 

 

⁺ O roose van Iericho

 

⁺ Ghy zijt Christus bruyt eersame

 

Uerhuecht en weest nv vro

 

Want goet is uwe fame

 

Ende die v beurijt coragieus

 

Ende van v seer amoreus

 

Want gheheel zijn lichame

 

Heeft hy voor ons te pande ghestelt

 

Wy en zijn ghekocht met gout noch met ghelt

 

Maer met zijn bloet bequame.

 

 

 

O Lelie die inde doornen staet

 

En wilt v niet versaghen

 

Al zijn die dorens quaet

 

En wilter niet na vraghen

 

Al doen v die menschen gheen onderstant

 

Ons koninck sorcht aen elcken kant

 

Uoor alle die zijn beladen

 

Want ghelijck een moeder is ghesint

 

Om te bewaren haer eyghen kint

 

So sal hy sorghe voor ons draghen

 

 

 

O Prince van Israel

 

Ierusalem van Gode vercoren

 

En sorcht voor gheen ghequel

 

Want v koninck sal v aenhooren

+ Marc.8.

+ Luce.9

[p. 331]

 

Roept tot hem als ghy zijt beswaert

 

Want gelijck een hinne haer kiecxkens bewaert

 

Al voor der wouwen sporen

 

Also heeft hy ons dicwils beurijt

 

Uoor al die ons hebben benijt

 

Alst blijet in Pharaons versmoren.