Veelderhande gheestelicke liedekens(1558)–Anoniem Veelderhande gheestelicke liedekens– Auteursrechtvrij Vorige Volgende C Na de wijse alst beghint. MEnsche misdadich, vol sonden smadich Wilt gheensins wesen desperaet Christus ghenadich, wert v beradich En ghy wt gront des herten tot hem gaet Suchtende weent voor v misdaet God sal vergheten v sondich fenijn Ons sonde schadich, droech hy gestadich Coemt al tot desen medecijn. Int openbaer, van elck sondaer Heeft hy veel lieuer tleuen dan die doot Coemt alle gaer, tot dien outaer daer muechdy vinden troost in alder noot Uersoeckt zijn bloedighe wonden root Dat is den troon der gracien fijn Hy is klaer, ons middelaer Coemt al tot desen medecijn. Christus verresen, gesont maect desen Die tot hem komt met een gelooue vast Hy heuet bewesen, also wy lesen Aen Centurions knecht seer belast Christus die heeft hem aenghtast Die hy ghenas van synen ghepijn Christus ghepresen, wilt hem ghenesen [pagina 301] [p. 301] Coemt al tot desen medecijn. O Christe almachtich, hebt lof eendrachtich Die selue ons noot tot v gracie soet Dit bleeck warachtich, ghy wert ghedachtich Den blinden gheboren daer hy stoet Hy riep tot v den schamelen bloet U Godlickheyt deet ghy hem aenschijn Hy was deelachtich, in v gracie krachtich Coemt al tot desen medecijn. Desen blinden gheboren, hiet ghy al voren Hem wasschen tot eenen water gaen Daer heeft hy verloren, so ghy moecht horen Sijn verblintheyt daer hy mede was beuaen By desen water mach elck verstaen Sijn bloedich wonden claer als wijn Daer moechdy versmoren, v sondich toren Coemt alle tot desen medecijn. Bit sonder vermijden, God tallen tijden So volchdy tvrouken van Cananeen naer Groot was haer lijden, in allen zijden Haer dochter zijnde in lijden swaer Sy riep op Christum door tghelooue eenpaer Al weygherde hy haer, een lanck termijn Alsulck bestrijden, wert haer verblijden Coemt al tot desen Medecijn. Hoort zijn oorconden, men sal die honden Niet gheuen sprack God der kinderen broot Dats waer beuonden, was haer vermonden Maer onder die tafelen vanden Heeren broot Die hondekens eten cruymkens ter noot O wijf groot is tghelooue dijn Dwelck heeft ontbonden, v kint van sonden Coemt al tot desen medecijn. Laet ons des Heeren, lof vermeeren En singhen eewich zijn bermherticheyt Hy wilse eeren, die tot hem keeren So Christus selue heeft gheseyt [pagina 302] [p. 302] Lof hebbe zijn goedertierenheyt Sy gaet te bouen al die wercken zijn Na Dauids leeren, met uwen seeren Coemt al tot desen medecijn. Hy heeft zijn leuen, voor ons ghegheuen Al waer hy doot so wie in hem betrout Wert leuendich beseuen, ons sondich sneuen Heeft hy versoent aent cruyce menichfout Al en hebdy schat, siluer noch gout Coemt al tot hem hy en eyscht v niet een twijn Die hem aencleuen, werden verheuen Coemt al tot desen medecijn. Ons sondige wichten, o God wilt verlichten Ghy hebt ons lieuer dan een moeder haer kint Helpt ons beuichten, des vyants schicten Want v licht oock ouer de sondaren schint Als ouer den goeden so men beuint Die v gracie diuijn Haer sinnekens stichten, sullen niet swichten Ghy zijt ons wapen ende medecijn. Vorige Volgende
Auteursrechtvrij Auteursrechtvrij Auteursrechtvrij
Auteursrechtvrij
Auteursrechtvrij