Veelderhande gheestelicke liedekens
(1558)–Anoniem Veelderhande gheestelicke liedekens–
Auteursrechtvrij
[pagina 282]
| |
Ons vleesch is crancker dan een riet
Alsomen siet.
Christus gebiet, geen spijse tonderscheyden
Wy en wistens niet
Sy ghinghen ons verleyden
Het sal ons qualick ghereyden, vermeyden
Die vuyle criot
Sy sleypent al in haren pot
Sy maken ons sot.
Haren spot, die ghingen sy met ons houwen
Eenen houten afgodt
Deden sy ons betrouwen
Daer op so gingen sy houwen, en trouwen
Met haesten groot
Wy arme schaepkens worden verstoort
Al om Gods woort.
Nv hoort, wat Mattheus heeft beschreuen
Eenen grooten moort
Die wort daer noch bedreuen
Den vader sal ouer gheuen, beneuen
Sijn eyghen kint
So wie Gods woort niet en bemint
Die wort heel blint.
Uerslint, die leeringhen der Poeten
Wacht v als vrint
Uoor die valsche Propheten
Sy zijn seer hooghe gheseten, vermeten
In swerelts ghetal
Sy roepen, sy crijten, sy crijghent al
Tsy by gheual.
Heel mal, so gingen sy ons vermuyten
Den aflaets bal
En wilde niet meer stuyten
Sy setten ons groote tuyten, gelijck fluyten
Met schalcker list
Dan setten sy ons een aflaet kist
Als elck wel wist.
| |
[pagina 283]
| |
Eenen grooten twist
Die sal daer noch ghebueren
Ghelijck den mist
So sullen haer leeringhen schueren
Met haren valschen lueren, ter cueren
Sy sullen vergaen
Deen volck sal tegen dander opstaen, hoort mijn vermaen.
Princersselick graen
Wilt ons toch wel bewaren
Uan sonden ontslaen
Ende in duechden sparen
Gods woort sullen wy verclaren, vermaren
Hier ontrent, het was een broeder int fondament
Diet heeft gheent.
|
|