Veelderhande gheestelicke liedekens

C Na de wijse. De lustelicken Mey is nv inden tijt.

LOf hoochste duecht, door v zijn wy verblijt
Ende beschermt voor thelsche ghetrueren
Lof God die ons behoeder zijt
U moet noch lof ghebueren
Ghy zijt toch ons toeuerlaet
En hebt verwonnen al ons quaet
Doot, duyuel, sonde elck moet belijen
Lof God in eewighen tijen

Lof God almachtich v moet noch lof gheschien
Die ons roept om duechts verclaren
Comt alle die dorst en wilt van my niet vlien
Comt drinckt en wilt niet sparen
Comt drinct alle mijn roode bloet
En eet van mynen vleesche soet
Om niet sal hijt ons gheuen
Lof Heere der Heeren verheuen.

Lof Iesus Christus die ons allen hebt gelaeft
Al met de leuende fonteyne
En hebt ons alle om niet rijckelick begaeft
Ghestelt net suyuer en reyne
Ghy hebt ghestelt van sonden bloot
Ende leuende die waren doot
Door v doot ende verrijsen
Dies wy v louen en prijsen.

[p. 275]

 

Lof Princelick God die ons menschen hebt so lief

 

Soot claer blijckt int aenschouwen

 

Sy zijn beschermt voor alle ongherief

 

Die vast op v betrouwen

 

Ghy sult haer gheuen des leuens broot

 

Uan hongher en sal hy niet lijden noot

 

Inder eewicheyt en sal hem niet dorsten

 

Looft hem ghy Heer ende vorsten.