C Een ander.
IOnstich saluyt, sy v elck hier gheschoncken
In v veriuyt, ghy Cristen broeders van prijse
U hier onsluyt in een vierich ontfoncken
Het soete conduyt, van shemels paradijse
des vaders liefde soete, die ons comt te gemoete
de kracht van al zijn woorden, zijn deuin accorden
Tonswaert gemeyn, elc sy hier op voordachtich
segt groot ende cleyn, lof eewich god almachtich
Naer Adams val, duer tsvyants becueren
Sprac God ick sal, viantschap tusschen v stellen
Die dat getal, van Tserpent sal doen trueren,
In tswerelts dal, sal v een vrouwe quellen
Touwen spijte voor bringhen, al die v macht sal dwinghen
Want tsmenschlick verkiesen, sult ghy daer by verliesen
Des vaders woort is om ons vleesch bedegen,
Met goet accoort, ons sonden al ghedweghen.
Noch heeft belooft, God Abraham drij saken
In liefden beschooft, door Abrahams betrouwen
zijt niet verdooft, ick sal v saet crachtich maken
Des wert berooft, tsvyandts macht sonder flouwen.
Ick sal v om v verblijden, v saet gebenedijden
| |
Dat sal ick ooc versadich, op deerde zijn genadich
Sijt niet versaecht, ick ben tot v ghehuldich
U sy ghewaecht, v saet wert menichuuldich.
So daer noch staet, wel tonser confoorte
Dese woorden vaet, wt Tsvaders godlijcke liefde
Noch sal v saet, besitten de poorte
zijn tsviants quaet, ghy die mijn woort geriefde
U onderdanichede, sal v brenghen in vrede
Duer zijn deuijne tale, iont hy ons principale
Den heyligen geest, ons voor een goede exempel
Elck mensche eerst, maeckt God oock eenen Tempel.
Noyt gheen so groot, voor tsmenschelijc geslachte
Die voor ons boot, siele ende lijf te pande
Die straf den doot, als Christus de met machte
Uerres minioot, als leuende offerhande
Hy selue om ons gewinne, bequaem was wt minne
Als Lam vol van virtuyten, dat den boeck mochte ontsluyten
Noyt gheen so reyn, noch van so grooter weerden
Uoor ons ghemeyn, in hemel oft op eerden.
Den vader goet spreect tot ons wtuercoren
Met woorden soet, met goddelijcke gheduene
Dees woorden vroet, en die sult ghy aenhooren
Tuwen voorspoet, dits mijn beminde sone
Cristus die domineerde, daer hy transfigureerde
duer zijn deuin berayen, wilde hy zijn liefde sayen
Als vader vrij, wil hy zijn lijf ons ionnen
Nv is daer by, helle ende doot ouerwonnen.
Gods gracie ient, die is by ons ghebleuen
Seer excellent, singt hem nv aen met loue
Seer diligent, zijn vleesch zijn bloet gegeuen,
Uoor ons present, tot onser siele beschoue
Noch heeft hy tonser baten, ons een gebot gelaten
Dat wy na ons vermoghen, malcander liefde betoogen.
Neempt hier af danck, ghy mannen en wijuen,
Wilt vrij en vranck, in Christus liefde blijuen.
|
|
Auteursrechtvrij