Veelderhande gheestelicke liedekens
(1558)–Anoniem Veelderhande gheestelicke liedekens–
AuteursrechtvrijC Na de wijse. Het saten dry Lansknechten inden coelen wijn.
IEzabels priesters zijn opghestaen Ga naar margenoot+
Met die valsche Propheten hoort dit vermaen
Sy bringhen tvolck in dolen
Sy leerense tot houten tot steenen beelden gaen
Gods eere worter door ghestolen
Ten blijft niet verholen.
| |
[pagina 230]
| |
Sy segghen dat sy Gods stehouders zijn
Sy brenghen donnoosele in swaer ghepijn
Uan die Gods woort vermonden
Sy vergheuen om ghelt door eenen heyligen schijn
Den menschen haerlieder sonden
Tzijn valsche vonden.
Wort yemant oock met siecten ghequelt
Sy segghen gaet beuaert offert daer v ghelt
Brenght eyeren, vleesch, boter en kooren
Een wassen keersse die moet daer zijn gestelt
Och vrienden tis al verloren
Alsulck oorboren.
Dan stichten sy eenen ommeganck
Sy brenghen tvolck in sulcken bedwanck
Wildy in dees gulde comen
So suldy zijn beurijt met v huys v leuen lanck
Door tghebet van deser heyligher bloemen
Schout sulck verdoemen.
Dies moet ghy brenghen of senden alle iaer
U offerhande op desen outaer
Tot onderstant van desen dienst en lichte
Die wy hier celebreren voor elcken openbaer
Gheeft penninghen goet van ghewichte
Tis een quaet ghestichte.
Den offer vander beuaert tot alder stont
Ualt Iezabels priesters inden mont
Alsomen mach aenschouwen
Niet tot profijt der armen, siet desen loosen vont
Maer sy gheuent den lichten vrouwen
Al diese houwen.
Hoe souden de sulcke Gods stehouders zijn
Die niet en onderhouden Gods geboden fijn
Die ghiericheyt en dronckenschap hantieren
Hoereerders, afgoden dienaers rekent God fenijn
Gheslachte der slanghen ghieren
En boose dieren.
| |
[pagina 231]
| |
Die daer dienen en wandelen byden outaer
Die moeten daer by louen dit seggen sy voorwaer
Het staet oock so gheschreuen
Der menschen gheboden leeren sy eenpaer
Gods woort worter door verdreuen
En wt ghewreuen.
Den outaer daer ons schriftuer af seyt
Is Christus den steen seer hooghe gheleyt
Die vanden wercklieden was verdreuen
Hy is den rechten wech en oock de salicheyt
De waerheyt en dat leuen
Is ons ghegheuen.
Die by desen outaer wel leuen wilt
Doe aen tghelooue tot eenen schermschilt
Ter salicheyt wilt v begheuen
Aenueert Gods woort van dongelooue stilt
So suldy byden outaer leuen
Soot staet gheschreuen.
Paulus die heeft by nachte ghewrocht
Door dwerc zijnder handen heeft hy den cost ghecocht
Inden dach ginck hy preken en leeren
Die niet en werct en sal niet eten ten helpt niet ondersocht
Al draghen sy langhe cleeren
Tis dwoort des Heeren.
Och vrienden betrout op Christus woort
En wandelt in zijnder liefden voort
Wilt v van alle boosheyt keeren
Tis te vergeefs dat ghy afgods dienst orboort
Tis teghen tghebot des Heeren
Schout sulcken leeren.
Den val van Babylon sal comen schier
De beeste wert ghegrepen door Gods bestier
Met alle haer valsche Propheten
En al diese dienen salmen worpen in dat vier
In den poel van fenijnigher beten
Met haer vermeten.
|
|