Veelderhande gheestelicke liedekens
(1558)–Anoniem Veelderhande gheestelicke liedekens–
AuteursrechtvrijC Na die wijse. Mocht ick met lust singhen.
HElp God my mach ghelinghen
Du edelen schepper mijn
Den selfsten te volbringhen
Ende loue den Heere fijn
Dat ick mach vrolick heffen aen
Uan dynen woorden en lijden te singen
O Heere wilt ghy my bystaen.
By v woort willen wy blijuen
Na Esaias doet vermaen Ga naar margenoot+
In zijn boeck doet schrijuen
Eer die weerelt soude vergaen
Ende wat God oyt voor ons gewracht
Soude hy dat laten bederuen
Het waer bouen natuer en kracht.
Iesus dat woort des Uaders
Is komen sy v vertelt.
Met grooter wonder daders
Uerkocht om snoode ghelt
Door Iudam synen Iongheren een
Wert hy verkocht verraden
Iesus dat Lam Gods reen.
Na dat sy hadden ghegheten
Met namen dat Paeschelam
Christus en wilde niet vergheten
Dat broot in zijnder hant nam
Sprack etet het is dat lichaem mijn
Dat voor v wert ghegheuen
Tot verghiffenisse der sonden dijn.
Gaf hen daer oock te drincken
In wijn zijn bloet so root
Sijn doot daer by te ghedincken
Soot is beschreuen bloot
Wie weerdich etet van dit broot
| |
[pagina 206]
| |
Ende van desen kelck mach drincken
En sal niet sien den doot.
Iesus die wiesch haer voeten
Als doen ter seluer stont
Leerdese niet om versoeten
Ut synen Godlicken mont
Hebt lief malcanderen tot alder tijt
Daer by salmen bekennen
Dat ghy mijn kinderen zijt.
Christus al inder gaerden
Doen hy ghebeden hadt
Die Ioden hem daer waerden
Al op den seluen padt
Ende brachten hem voor den rechter daer
Daer hy ghegheesselt ende ghecroonet
Ende totter doot veroordeelt waert.
Noch aenden cruyce ghehanghen
Die hooghe gheboren Uorst
Na ons dede hem verlanghen
Daeromme sprack hy my dorst
Met name nae onse salicheyt
Daerom heeft hy ontfanghen
Hier opter eerden die menscheyt.
Met synen hoofde gheneghen
Hy synen gheest op gaf
Ga naar margenoot+ So Ioannes heeft beschreuen
Ende wert ghenomen af
Uanden cruyce int graf wert hy gheleyt
Aenden derden dach opstanden
Als hy voor hadde gheseyt.
Ende na den seluen daghen
Christus zijn iongheren heeft gheleert
Alleen zijn woort te draghen
Ga naar margenoot+ Te preken in de weerelt vermeert
So wie ghelooft, en is ghedoopt
Die heeft dat eeuwighe leuen
Tis hem door Christum ghecocht.
| |
[pagina 207]
| |
Recht laet ons allen bidden
Christus voor douerheyt
Wen wy schoon van hen lijden
Ghewalt ellendicheyt
Dat haer God wil ghenadich zijn
Heeft Henyrick Molenaer ghesonghen
Inder gheuancnis zijn.
|
|