Veelderhande gheestelicke liedekens

C Na de wijse. Ick had een ghestadich minneken.

HOe soudick my verblijden
In al mijn boosheyt quaet
Want die tot allen tijden
Al naer mijn siele staet
God ist dien ick verlaet
En gae naer vreemde Goden
Wijckende van zijn gheboden
En doe der boosheyt raet.

Ick hebbe hooren claghen
Ouer mijn boosheyt groot
Want die mijn siele iaghen
Die haecken naer mijn doot
Daer toe dat herte vloot
Om ouerspel te bedrijuen
Mocht ick noch troost ghecrijghen
Ick en claechde gheenen noot.

Soude hy my oock begheuen
Die eens ghelaten heeft
Sijn Rijcke ende hier zijn leuen
Uoor my die nv dus sneeft
En met ander herders leeft
Boelerende met ontrouwen
Dwelck my wel mach berouwen.
Want my mijn cracht begheeft.

Ick wil gaen soecken
Al inder Roosegaert
En vraghen in alle hoecken
Naer hem seer onghespaert
So Ieremias verclaert
En laten nv dboeleren

[p. 170]

 

Uan hout en steen passeren

 

Daer door my therte beswaert.

 

 

 

Het staet my al te haten

 

Daer ick my op verliet

 

En schuwen die hooghe staten

 

En volghen hem sonder verdriet

 

Och wat is mijns gheschiet

 

Dat ick hem hebbe begheuen

 

Den Coninck van mijn leuen

 

Want buyten hem en leeftmen niet

 

 

 

De Goden deser weerelt

 

Sijn boos naer Schrifts vermaen

 

Al zijnse net bepeerelt

 

Sy moeten alle vergaen

 

Dus wil ickse al versmaen

 

En wederomme keeren

 

Tot mijnen bruydegom met eeren

 

Hy sal my wel ontfaen.

 

 

 

Al dat hier is voor ooghen

 

Dats stof en asschen snoot

 

Dus wil ick my tot hem pooghen

 

Die voor my inde doot

 

Ghinck door lijden groot

 

En heuet mijn last ghedraghen

 

Om mijn schult is hy gheslaghen

 

So die Schrift tuyghet bloot.

 

 

 

Prince aenhoort mijn kermen

 

Ick come tot v beschaemt

 

Ick bidde v wilt mijns ontfermen

 

Want v dat wel betaemt

 

Want ghy daerom hier quaemt

 

Dus wil ict al verlaten

 

En houden my na der maten

 

Met v in ionsten versaemt.